Ebe Matiu 1:1-25
1 Ebe okha* ọghe Jesu Kristi,* nọ re ovbi e Devid, ne ovbi Ebraham:
2 Ebraham ẹre ọ ghaa re erha Aizik;Aizik ẹre ọ ghaa re erha e Jekọb;e Jekọb ẹre ọ ghaa re erha e Juda kevbe etiọnrẹn nikpia;
3 e Juda ẹre ọ ghaa re erha e Pirẹz kevbe Zira, e Tema ẹre ọ biẹ iran nẹẹn;e Pirẹz ẹre ọ ghaa re erha e Hẹzrọn;e Hẹzrọn ẹre ọ ghaa re erha e Ram;
4 e Ram ẹre ọ ghaa re erha Aminadab;Aminadab ẹre ọ ghaa re erha e Nasiọn;e Nasiọn ẹre ọ ghaa re erha e Salmọn;
5 e Salmọn ẹre ọ ghaa re erha e Boaz, e Rehab ẹre ọ biẹ ọre nẹẹn;e Boaz ẹre ọ ghaa re erha Obẹd, e Rut ẹre ọ biẹ ọre nẹẹn;Obẹd ẹre ọ ghaa re erha e Jẹsi;
6 e Jẹsi ẹre ọ ghaa re erha e Devid ne ọba.
E Devid ẹre ọ ghaa re erha e Sọlomọn, ọvbokhan Uraia ẹre ọ biẹ ọre nẹẹn;
7 e Sọlomọn ẹre ọ ghaa re erha e Rehoboam;e Rehoboam ẹre ọ ghaa re erha Abaija;Abaija ẹre ọ ghaa re erha Esa;
8 Esa ẹre ọ ghaa re erha e Jẹhosiafat;e Jẹhosiafat ẹre ọ ghaa re erha e Jẹhoram;e Jẹhoram ẹre ọ ghaa re erha Uzaia;
9 Uzaia ẹre ọ ghaa re erha e Jotam;e Jotam ẹre ọ ghaa re erha Ehaz;Ehaz ẹre ọ ghaa re erha e Hẹzẹkaia;
10 e Hẹzẹkaia ẹre ọ ghaa re erha e Manasẹ;e Manasẹ ẹre ọ ghaa re erha Emọn;Emọn ẹre ọ ghaa re erha e Josaia;
11 e Josaia ẹre ọ ghaa re erha e Jẹkonaia kevbe etiọnrẹn nikpia, vbe ẹghẹ na ya viọ Ivbi e Ju gha rrie Babilọn.
12 Vbe iran ghi rre Babilọn, e Jẹkonaia na biẹ e Sie-atiẹl;e Sie-atiẹl ẹre ọ ghaa re erha e Zẹrubabẹl;
13 e Zẹrubabẹl ẹre ọ ghaa re erha Abaiyọd;Abaiyọd ẹre ọ ghaa re erha Ẹlaiakim;Ẹlaiakim ẹre ọ ghaa re erha Ezọ;
14 Ezọ ẹre ọ ghaa re erha e Zedọk;e Zedọk ẹre ọ ghaa re erha Ekim;Ekim ẹre ọ ghaa re erha Ẹlaiyọd;
15 Ẹlaiyọd ẹre ọ ghaa re erha Ẹlieza;Ẹlieza ẹre ọ ghaa re erha e Matan;e Matan ẹre ọ ghaa re erha e Jekọb;
16 e Jekọb ẹre ọ ghaa re erha e Josẹf, ne ọdafẹn e Meri. E Meri ẹre ọ biẹ e Jesu, na tie ẹre Kristi.
17 Ke egbe Ebraham ya sẹ egbe Devid, ehia kegha re orre iwenẹ (14); ke egbe Devid ya sẹ ẹghẹ na ya viọ Ivbi e Ju gha rrie Babilọn, kegha re orre iwenẹ (14); ke ẹghẹ na ya viọ Ivbi e Ju gha rrie Babilọn ya sẹ ẹghẹ e Kristi, kegha re orre iwenẹ (14).
18 Sokpan, vbene a ya biẹ e Jesu Kristi na khin. E Meri ẹre ọ biẹ e Jesu. E Josẹf ẹre a ya e Meri na vbe ẹghẹ nii. Sokpan, vbene Josẹf te rhie ẹre la owa, a keghi miẹn wẹẹ ọ hanmwa, lekpa orhiọn nọhuanrẹn.*
19 Vbọrhirhighayehẹ, rhunmwuda ne ọdafẹn ọnrẹn ighẹ e Josẹf na gha re ọmwa esi, kevbe wẹẹ, ọ ma hoo nọ fa e Meri rua sirra emwa hia, ọ na ghi zẹ ọre vbe iro wẹẹ, irẹn gha sẹrae, vbene ọmwa rhọkpa i na rẹn.
20 Sokpan, vbe ọ ghi wa tae nẹ vbe ekhọe ọre wẹẹ, erriọ ẹre irẹn khian ru ẹre, odibo e Jehova* keghi rhiegbe ma rẹn vbe imina, ọ na tama rẹn wẹẹ: “E Josẹf ne ovbi e Devid, ghẹ gi ohan mu ruẹ, ne u rhie ọvbokhan ruẹ ighẹ e Meri la owa, rhunmwuda, ọmọ nọ hanmwa, orhiọn nọhuanrẹn ẹre Osanobua loo ro ya rhie ẹre ye ọre ẹko.
21 Ọ gha biẹ ọmokpia; u ghi gha tie ẹre Jesu,* rhunmwuda, irẹn ẹre ọ khian miẹn emwa rẹn fan vbe obọ orukhọ ọghe iran.”
22 Te ena hia sunu, ne ẹmwẹ ne Jehova* loo akhasẹ ọghẹe ya ta mieke na sẹ, nọ khare wẹẹ:
23 “Ghee oo! Okhuo nọ ma rẹn okpia gha hanmwa, ọ ghi biẹ ọmokpia, a ghi gha tie ọmọ nii Imanuẹl.” Emwi na ya eni nii kha vbe a gha zedu ẹre, ọre “Osanobua Gu Ima Rrọọ.”
24 Ẹre Josẹf na ghi rhiọrre vbe ovbe, ọ na wa ru vbene odibo e Jehova* khare, ọ na ghi rhie ọvbokhan rẹn la owa.
25 Sokpan, ọ ma gu ẹre ru emwi ọdọ vbe amwẹ, a te miẹn wẹẹ ọ biẹ ọmọ nii; ọ ghi biẹ ọre nẹ, e Josẹf keghi he ẹre Jesu.
Avbe Futnot
^ Ra “uniẹn.”
^ Ra “Mezaia; Ọmwa Na Hannọ Zẹ.”
^ Ra “ẹtin Osanobua.”
^ Vbe uwu igba 237 ne eni Osanobua ighẹ e Jehova ladian vbe Ebe Nọhuanrẹn Na Ya E Grik Gbẹn, ọna ọre nokaro. Ya ghee Apẹndis A5.
^ Eni na vbe Hibru ọre Jẹsua, ra Jọsua. Emwi na yae kha ọre, “E Jehova Ọre Imiẹnfan.”
^ Ya ghee Apẹndis A5.
^ Ya ghee Apẹndis A5.
