Ebe Mak 6:1-56

  • Emwa ni rre ẹvbo ne Jesu na waan ma miẹn ọnrẹn yi (1-6)

  • Jesu tama ukọ ne Iweva emwi nọ khẹke ne iran ru vbe iran gha khian ya kporhu (7-13)

  • Uwu ọghe Jọn ne Ọ Dinmwi Ọmwa Ye Amẹ (14-29)

  • Jesu rhie evbare ne orhunmwu arriaisẹn vbe ihe isẹn [5,000] (30-44)

  • Jesu khian vbe uhunmwu amẹ (45-52)

  • Jesu mu emwa egbe rran vbe Gẹnẹsarẹt (53-56)

6  Jesu keghi kpa vbe evba, ọ na gha die ẹdogbo nọ na waan, erhuanegbe ẹre na vbe lelẹe.  Ọ ghi rre Ẹdẹ Ikẹtin, Jesu na suẹn gha ma emwa emwi vbe sinagọg,* emwa nibun ni họn vbe ọ guan keghi yan unu ruan, iran na wẹẹ: “De ehe ne okpia na, na ruẹ avbe emwi na hia? Vbọzẹ na na ya ẹwaẹn vbenian we ẹre? Vbọzẹ na na vbe la obọ ẹre winna iwinna ọyunnuan vbenian?  Ẹ i re ọna ọre ekabita ne ovbi e Meri? Ẹ i re irẹn ẹre ọ vbe re ọtiẹn e Jems, e Josẹf, e Judas, kevbe Saimọn ra? Ra ẹ i re irẹn? Ẹ i re etiọnrẹn nikhuo ẹre ọ vbe gu ima rre emwa na?” Rhunmwuda ọni, iran ma ghi yaeyi.*  Sokpan, Jesu keghi tama iran wẹẹ: “A i miẹn ehe ne akhasẹ rhirhi yo, nai na rhie uyi nẹẹn, vbọ gberra ẹvbo ẹre, uwu ẹgbẹe ọre kevbe owa ẹre.”  Rhunmwuda ọni, ọ ma ghi sẹtin ru iwinna ọyunnuan nibun vba. Emwi nọ ghi wa ru ọre wẹẹ, ọ na viọ obọ yan ibozẹghẹ emwa ni khuọnmwi, ọ na mu iran egbe rran.  Vbene ẹmwata, ọ keghi wa kpa ẹre odin, rhunmwuda ne iran ma na gha mwẹ amuẹtinyan. Ọ na ghi kpa, ya gha ma emwa emwi vbe avbe igue ni rre ikinkin nii.  Ọ keghi tie iran Iweva nii, ọ na suẹn gha gie iran ladian eveva. Ẹre ọ na rhie asẹ ne iran, ne iran ya gha ta ẹmwẹ nọ sẹ vbe egbe avbe orhiọn dan.*  Deba ọni, ọ na tama iran, ne iran ghẹ mu emwi rhọkpa lele egbe, vbọ gberra ọkpọ. Ọ na we ne iran ghẹ mu ebrẹd, ra ẹkpo na mu evbare yi, ne iran ghẹ vbe viọ igho* ye ẹsiso ọghe iran.  Ọ na we ne iran gba ibata, sokpan, ne iran ghẹ yọ ẹwu eva.* 10  Yevbesọni, ọ keghi tama iran wẹẹ: “Ehe ke ehe ne uwa na la owa ọmwa, wa ghi dia evba ya, rhinrin, wa te do kpa vbe evba nii rre. 11  Ehe ke ehe ne emwa ma na miẹn uwa yi, ra ne iran ma na danmwehọ uwa, wa ghi bọnmwẹ iku* nọ rre uwa owẹ ye otọ, vbe uwa gha khian kpa vba rre, nọ gha re osẹ ne iran.” 12  Iyeke ọni, iran keghi ladian, iran na ya gha kporhu, ne emwa ro iro fi uyinmwẹ werriẹ, 13  iran na khulo orhiọn dan nibun, iran na ya ori wuo emwa nibun ni khuọnmwi, iran na mu iran egbe rran. 14  Hẹrọd ne Ọba keghi họn ẹmwẹ na, rhunmwuda, te eni Jesu ghi wa titi gba ehe hia, emwa na gha kha wẹẹ: “E Jọn ne Ọ Dinmwi Ọmwa Ye Amẹ rhiọ kpaegbe nẹ vbe idin, ọni ẹre ọ si ẹre nọ na sẹtin winna avbe iwinna ọyunnuan na.” 15  Sokpan, emwa eso na gha kha wẹẹ: “Ẹlaija nọ.” Eso na vbe gha kha wẹẹ: “Akhasẹ nọ, egbe na ghaa miẹn vbe ẹghẹ nẹdẹ.” 16  Sokpan, Hẹrọd ghi họn ẹmwẹ na, ọ na wẹẹ: “E Jọn ne I fian ẹre uhunmwu fua wa nọ, te ọ rhiọ kpaegbe na.” 17  Hẹrọd tobọre ẹre ọ we na ya mu e Jọn, na gbae mu fi eghan, ba ẹmwẹ Hẹrodias ne amwẹ ọtiọnrẹn ighẹ e Filip nọ rhie rọnmwẹ. 18  Rhunmwuda, ẹghẹ hia ẹre Jọn ya gha tama e Hẹrọd wẹẹ: “Ọ ma khẹke ne u rhie amwẹ ọtuẹn rọnmwẹ, rhunmwuda, awua nọ.” 19  Rhunmwuda ọni, Hẹrodias keghi rhie ẹmwẹ e Jọn ye ẹko, ọ na gha hoo nọ gbe ẹre rua, sokpan, ọ ma sẹtin. 20  Te Hẹrọd ghaa mu ohan e Jọn, rhunmwuda, ọ rẹn e Jọn ye ọmwa esi kevbe ọmwa nọhuanrẹn; ọ na gha gbaroghe ẹre, ne emwi rhọkpa ghẹ ru ẹre. Ẹghẹ ke ẹghẹ ne Jọn ya gu ẹre guan, Hẹrọd i ghi rẹn vbene ọ khian ru ẹre hẹ, ọrheyerriọ, ọ na ye gha ya ekhọe hia danmwehọ ọre. 21  Sokpan, ọ ghi sẹ ẹdẹ ọkpa, ẹkpotọ keghi kie ne Hẹrodias ya ru emwi nọ rre ọre orhiọn, ọni ọre ẹdẹ ne Hẹrọd do ugie ẹdẹ ubiẹmwẹ ọghẹe. Ọ keghi le evbare ota ne emwa ni rre ukpo ọdakha vbe arriọba ọghẹe, kevbe avbe ọkaokuo kẹ kevbe ikpia na họn usi ẹre rre vbe Galili. 22  Ẹre ovbi e Hẹrodias nokhuo na rre, ọ na do gha gbe; odẹ nọ ya gbe keghi yẹẹ e Hẹrọd kevbe emwa ni lelẹe rri evbare.* Ẹre Hẹrọd ne ọba na ghi tama ọmokhuo nii wẹẹ: “Tama mwẹ emwi ne u rhirhi gha gualọ, I gha ru ẹre nuẹn.” 23  Uhiẹn, ọ na vẹn ihẹn ya yan ma rẹn wẹẹ: “Emwi ne u rhirhi nọ mwẹ re, ọ gha khọnrẹn wẹẹ, te u we ne I ghae arriọba mwẹ ye ihe eva, ne I mu obọ ọkpa nuẹn, I gha ru ẹre nuẹn.” 24  Ẹre ọ na kpa ya nọ iyẹe wẹẹ: “De emwi ne I gha nọ?” Iyẹe na wẹẹ: “Uhunmwu e Jọn ne Ọ Dinmwi Ọmwa Ye Amẹ.” 25  Ọmokhuo nii na zẹgiẹ bu ọba, ọ na tama rẹn wẹẹ: “I hoo ne u mu uhunmwu e Jọn ne Ọ Dinmwi Ọmwa Ye Amẹ ye ọkpan mẹ, vbene a wa guan na.” 26  Agharhemiẹn wẹẹ, emwi ne ọmokhuo na nọ rẹn wa kakabọ gbe Hẹrọd egbe, ọ ma gi ẹre na he, rhunmwuda, ọ kẹ ọre ya vẹn ihẹn yọ nẹ, kevbe wẹẹ, sirra emwa hia ni rre,* ẹre ọ na yan ma rẹn. 27  Vbobọvbobọ nii, Hẹrọd ne ọba keghi gie ọkpa vbe usun iran ni gbogba ga ẹre, nọ ya mu uhunmwu e Jọn rre. Ẹre ọ na kpa, ọ na ya fian uhunmwu e Jọn vbe eghan, 28  ọ na muẹn ye ọkpan gha dee. Ọ keghi muẹn ne ọmokhuo nii, ẹre ọmokhuo nii na mu ne iyẹe. 29  Erhuanegbe ẹre ghi họn emwi nọ sunu, iran na do mu ikun ẹnrẹn, iran na ya ree ẹre ye idin. 30  Avbe ukọ ghi si egbe koko vbe eke ne Jesu ye, iran na tama rẹn emwi hia ne iran ru kevbe ne iran ma emwa ẹre. 31  Ọ na ghi tama iran wẹẹ: “Wa larre, na gha rrie ehe nọ divbiẹ, ne uwa ya hẹwẹ kherhe.” Rhunmwuda, te emwa wa gha vẹ rre, ni rre ghaa rre, ni kpa ghi gha kpa; iran ma ghi gha mwẹ ẹghẹ ne egbe iran, iran ma ghi kue vbe sẹtin miẹn ẹghẹ ya rri evbare. 32  Ẹre iran na la okọ gha rrie ehe nọ divbiẹ, ne iran ọkpa gha rre evba. 33  Sokpan, emwa keghi bẹghe iran vbe iran khian, emwa nibun na do họn vbekpa ẹre. Emwa keghi ke ẹvbo hia ladian, iran na rhulẹ ke odaro ne iran, iran na ka sẹ evba nii khẹ Jesu vbe erhuanegbe ẹre. 34  Vbe Jesu ghi tuorre vbe okọ, ọ keghi miẹn emwa nibun ni gbẹbu, ohan iran keghi to ẹre ẹsẹse, rhunmwuda, te iran yevbe ohuan nẹi mwẹ nọ su ẹre. Ẹre ọ na suẹn gha ma iran emwi nibun. 35  Na kha na, ẹghẹ khian buan nẹ, ẹre erhuanegbe ẹre na bu ẹre gha dee, iran na tama rẹn wẹẹ: “Ehe nọ divbiẹ ẹre ima ye na, ẹghẹ vbe khian buan nẹ. 36  Tama iran ne iran gha khian, ne iran mieke na gha rrie avbe ẹvbo kevbe igue ni lẹga ena, ne iran ya dẹlẹ evbare re.” 37  Ọ na ghi tama iran wẹẹ: “Wa rhie evbare ne iran, ne iran re.” Ẹre iran na wanniẹn ọnrẹn wẹẹ: “Te u we ne ima ya dẹ ebrẹd ọghe dinariọs* iyisẹn eva (200), ne ima ghae ẹre ne iran ra?” 38  Ọ na nọ iran wẹẹ: “Inu ebrẹd ẹre uwa mwẹ? Wa ya ghee ẹre!” Iran ghi ghee inu nọ khin nẹ, iran na tama rẹn wẹẹ: “Ebrẹd isẹn kevbe ehẹn eva.” 39  Ọ keghi tama emwa nii hia, ne iran ghae egbe ye ẹbu, ne iran tota lele irunmwu. 40  Iran keghi tota, ẹbu eso na gha re orhunmwu iyisẹn (100), eso na gha re ekigbesiyeha (50). 41  Ọ ghi viọ ebrẹd isẹn nii kevbe ehẹn eva nii, ọ na tọn aro mu ghee iso, ọ na na erhunmwu yọ.* Ọ keghi bunnọ ebrẹd nii, ọ na suẹn gha viọ ọre ne erhuanegbe ẹre, ne iran ghae ẹre ne emwa nii. Ọ na vbe ghae ehẹn eva nii gba iran hia obọ. 42  Iran hia keghi re, ẹko na vuọn iran, 43  ẹre iran na ghi si eni ghi dekẹe koko, ọ na vuọn okhuae iweva (12), na kha na, ehẹn ma deba. 44  Emwa ni rri ebrẹd nii, kegha re ikpia arriaisẹn vbe ihe isẹn (5,000). 45  Iyeke ọni, ọ keghi zẹgiẹ tama erhuanegbe ẹre, ne iran la okọ gha rrie obọ nọkpa vbene irẹn te rre, ne iran la ọkpẹn e Bẹtse-ada gberra. Sokpan, irẹn tobọ irẹn keghi ye mudia vba, nọ mieke na gi emwa ni gbẹbu kpa nẹ. 46  Ọ ghi gbe ọ khian ẹdẹ hia ne iran nẹ, ọ na kpa gha rrie uhunmwu oke, nọ ya na erhunmwu. 47  Ọ ghi sẹ ẹghẹ ota, okọ nii na gha rre adesẹ okun, sokpan, Jesu ọkpa na ye gha rre eke nọ ye. 48  Ọ ghi bẹghe ẹre wẹẹ, okọ nii lọghọ iran na gua, rhunmwuda ẹhoho nọ ghaa bi iran ghee iyeke, ọ keghi bu iran gha dee, ọ na gha ya owẹ khian lele uhunmwu amẹ dee; na kha na, odẹ ẹghẹ nogienẹ na ya khẹ odẹ vbe asọn ghaa nọ.* Sokpan, te ọ te gha hoo nọ gberra iran.* 49  Iran ghi miẹn ọnrẹn vbe ọ ya owẹ khian lele uhunmwu amẹ dee, iran na wẹẹ: “Umian ẹre ima wa miẹn na!” Ẹre iran na rhie so. 50  Iran hia ghi miẹn ọnrẹn, orrirri na gbe ku iran. Sokpan, vbe ọwara ọkpa nii, Jesu keghi tama iran wẹẹ: “Wa ghẹ fian afianma!* Mẹ nọ; wa ghẹ gi ohan mu uwa.” 51  Ẹre ọ na ghi la uwu okọ ne iran ye, ẹhoho nii keghi dobọ yi. Ọna keghi kakabọ yan iran unu ruan, 52  rhunmwuda, iran ma miẹn emwi ruẹ vbe emwi ọyunnuan ọghe ebrẹd ne Jesu ru. Te emwi hia ye gha lọghọ iran na rẹn otọ re. 53  Iran ghi fian okun rra nẹ, iran na ghi sẹ e Gẹnẹsarẹt; ẹre iran na si okọ dee ye ọkpẹn evba. 54  Sokpan, vbe iran ghi wa ladian vbe uwu okọ nii, emwa na wa yi Jesu ẹro. 55  Iran na rhulẹ la ikinkin nii hia, iran na gha ya ebẹdi* dada emwa ni khuọnmwi gha die eke ne iran họn wẹẹ ọ ye. 56  Ẹghẹ ke ẹghẹ ne Jesu ya la igue, ra ẹvbo ra ehe nọ rhirhi gha khin, emwa ghi viọ emwa ni khuọnmwi gha die adesẹ ẹki, iran ghi gha rinmwiaẹn, ne iran wa ya obọ kaan ehọ ukpọn nọ yọ ke odukhunmwu. Egbe keghi rran emwa hia ni ya obọ kaan rẹn.

Avbe Futnot

Ọni ọre, owa ugamwẹ ọghe Ivbi e Ju.
Vbe Grik, “iran na suẹn gha rrua owẹ rhunmwuda ẹre.”
Vbe Grik, “avbe orhiọn ni ma huan.”
Vbe Grik, “ekọpa.”
Ra “ẹwu ọvbehe.”
Ra “ebubẹ.”
Ra “ne iran gba tota ga eteburu.”
Ra “emwa ni tota ga eteburu.”
Ra “ọ na fiangbe ẹre.”
Ọni ọre, odẹ ẹgogo eha vbe asọn, ya sẹ ẹghẹ ne ovẹn ya yan rre vbe odẹ ẹgogo ehan vbe owiẹ.
Ra “te ọ khian ghi te gberra iran.”
Ra “Wa gha mwẹ udinmwẹ.”
Ọni ọre, ebẹdi nekherhe na ya mu ọmwa nọ khuọnmwi.