Naghahapot an mga Parabasa . . .
Taano ta Ipinapaatang Kaidto nin Dios ki Abraham an Aki Niang si Isaac?
▪ Arog kan mababasa sa libro sa Biblia na Genesis, ipinapadolot ni Jehova Dios ki Abraham an aki niang si Isaac bilang atang. (Genesis 22:2) May mga nagbabasa nin Biblia na nadedepisilan saboton an salaysay na iyan. “Kan enot kong madangog an estoryang ini kan ako aki pa, anggoton ako,” an sabi ni Carol na sarong propesor. “Anong klaseng Dios an mapagibo nin arog kaiyan?” Dawa ngani natural sanang makamate nin siring, makakatabang kun tatandaan niato an duwang minasunod na punto.
Enot, isip-isipa kun ano an dai ginibo ni Jehova. Dai nia tinogotan si Abraham na idagos an pag-atang, dawa ngani andam na ining gibohon iyan, asin dai na iyan noarin man ipinagibo nin Dios sa kiisay man. Gusto ni Jehova na gabos na nagsasamba sa saiya, kaiba na an mga aki, padagos na mabuhay nin halawig asin may pagkakontento.
Ikaduwa, ipinaparisa kan Biblia na may espesyal na dahelan si Jehova kun taano ta si Isaac ipinapaatang nia ki Abraham. Aram nin Dios na pakalihis nin dakol na siglo, itotogot Nia na an Saiya mismong Aki, * si Jesus, magadan para sa sato. (Mateo 20:28) Gusto ni Jehova na masabotan niato kun gurano kadakulang sakripisyo ini para sa saiya. Paagi sa ipinapagibo nia ki Abraham, ipinaheling nia sa kahangahangang paagi kun anong klaseng sakripisyo an gigibohon nia pag-abot nin panahon. Paano man?
Isip-isipa an sinabi ni Jehova ki Abraham: “Darhon mo gñonian an saimong aki, an bogtong mong si Isaac, na namomotan mo, asin . . . idolot mo siya.” (Genesis 22:2) Mangnoha na inapod ni Jehova si Isaac na an aki na “namomotan mo.” Aram nia kun gurano kahalaga ki Abraham si Isaac. Aram man nin Dios kun ano an namamatean Nia sa saiyang Aki na si Jesus. Namomotan na marhay ni Jehova si Jesus kaya duwang beses siang nagtaram hale sa langit, na direktang inapod si Jesus na “sakuyang namomotan na Aki.”—Marcos 1:11; 9:7.
Sa orihinal na Hebreo, an kahagadan na iyan ni Jehova ki Abraham may kaibang tataramon na “tabi.” Segun sa sarong nag-espesyalisar sa Biblia, an paggamit nin Dios sa tataramon na ini nagpaparisa na “nasasabotan kan KAGURANGNAN kun gurano kadakulang sakripisyo an kalabot sa hinahagad nia.” Arog kan maiimahinar niato, seguradong nakapamondong gayo iyan ki Abraham; sa kaagid na paagi, haros dai niato maimahinar kun gurano kakolog para ki Jehova an pagmasdan an namomotan niang Aki na nagsasakit sagkod na magadan. Daing duda na iyan an pinakamakolog na namatean ni Jehova kasuarin man o mamamatean noarin man.
Tunay nanggad, minsan ngani tibaad mabalde kita kun iisipon an ipinapagibo ni Jehova ki Abraham, madonong na girumdomon na dai itinogot ni Jehova na idagos kan maimbod na patriarkang iyan an pag-atang. Dai nia itinogot na maeksperyensiahan ni Abraham an pinakamakolog na puedeng agihan nin sarong magurang; ilinigtas nia si Isaac sa kagadanan. Pero, “an saiyang sadiring Aki dai nia ilinikay, kundi itinao dahel sato gabos.” (Roma 8:32) Taano ta tinogotan ni Jehova an sadiri nia na mag-agi nin siring kagrabeng kolog? Ginibo nia iyan tanganing “kita mabuhay.” (1 Juan 4:9) Nagpapagirumdom nanggad iyan kan pagkamoot nin Dios sa sato! Bako daw na napapahiro kita na ipaheling man an pagkamoot niato sa saiya? *
[Mga Nota sa Ibaba]
^ par. 5 Dai itinotokdo kan Biblia na si Jesus aktuwal na aki nin Dios sa sarong babae. Imbes, linalang ni Jehova an espiritung personang iyan na kan huri isinugo digdi sa daga tanganing ipangaki kan birhen na si Maria. Kaya, bilang an Kaglalang ki Jesus, angay sanang apodon an Dios na saiyang Ama.
^ par. 8 Tanganing orog pang makanood manongod sa kun taano ta kaipuhan magadan si Jesus asin kun paano niato ikakapaheling an pag-apresyar dian, helingon an kapitulo 5 kan librong Ano Man Nanggad an Itinotokdo kan Biblia?
