An Dios madalion na dolokon. Kun paanong an sarong mamomoton na ama naoogma na an mga aki nia dai nag-aalangan na makipag-olay sa saiya, gusto ni Jehova Dios na kita mamibi sa saiya. Kadungan kaiyan, arog nin siisay man na madonong na ama, may marahay na mga dahelan an Dios na dai simbagon an nagkapirang hinahagad niato. Misteryoso daw an mga dahelan nia, o may ihinahayag daw sia sa Biblia manongod dian?

Si apostol Juan nagpaliwanag: “Iyo ini an satong mapapanarigan mapadapit sa saiya, na, minsan ano an satong hagadon segun sa saiyang kabotan, dinadangog nia kita.” (1 Juan 5:14) An mga hinahagad niato dapat na kaoyon kan kabotan nin Dios. An nagkapira namimibi dapit sa mga bagay na malinaw na bakong kabotan nin Dios​—halimbawa, na manggana sa loteriya o na manggana sa pustahan. An iba bakong tama an motibo kun namimibi. Nagpatanid si disipulo Santiago tumang sa siring na pag-abuso sa pamibi, na nagsasabi: “Kamo naghahagad nanggad, alagad ta dai kamo nag-aako, huli ta naghahagad kamo para sa salang katuyohan, tanganing magamit nindo iyan sa saindong mga horot para sa kasingawan sa laman.”​—Santiago 4:3.

Halimbawa, imahinara na parehong namimibi na manggana an magkalaban na lado sa sarong kawat na putbol. Dai niato puedeng laoman na sisimbagon nin Dios an siring na magkakontrang pamibi. Arog man kaiyan an masasabi manongod sa modernong panahon na guerra kun an magkalaban na lado parehong namimibi na manggana.

Daing kamanungdanan an pamibi kan mga naglalapastangan sa ley nin Dios. May beses na kinaipuhan ni Jehova na sabihon sa mapagsaginsagin na mga nagsasamba sa saiya: “Dawa pa namimibi kamo nin dakol, dai ako naghihinanyog; pano nin pagpabolos nin dugo an saindong mga kamot.” (Isaias 1:15) An Biblia nagsasabi: “An irinarayo an saiyang talinga tanganing dai makadangog kan ley​—minsan an saiyang pamibi bagay na makauuyam nin makuri.”​—Talinhaga 28:9.

Sa ibong na lado, pirmeng hihinanyogon ni Jehova an sinserong mga pamibi kan mga nagsasamba sa saiya na ginigibo an saindang pinakamakakaya na paglingkodan sia segun sa saiyang kabotan. Pero, nangangahulogan daw iyan na itatao nia an gabos nindang hinahagad? Dai. Estudyare an nagkapirang sono sa Kasuratan na halimbawa.

Si Moises dayupot na marhay sa Dios; pero, kaipuhan man nia na maghagad ‘segun sa kabotan nin Dios.’ Sarongat sa katuyohan na sinabi nin Dios, nakimaherak si Moises na logod togotan siang makalaog sa daga nin Canaan: “Togoti tabi akong makabalyo asin maheling an marahay na daga na nasa ibong kan Jordan.” Alagad kan nakaagi, huli sa saiyang kasalan, sinabihan si Moises na dai sia makakalaog sa dagang iyan. Kaya ngonyan, imbes na itao ki Moises an hinahagad nia, si Jehova nagsabi sa saiya: “Tama na! Dai ka na noarin man makipag-olay sa sako manongod sa bagay na ini.”​—Deuteronomio 3:25, 26; 32:51.

Namibi si apostol Pablo na logod makaginhawa sia sa inaapod nia na saiyang “tunok sa laman.” (2 Corinto 12:7) An “tunok” na ini puedeng nanonongod sa dai nararahay na helang sa mata o sa padagos na pangriribok nin mga nagtutumang asin “bakong tunay na mga tugang.” (2 Corinto 11:26; Galacia 4:14, 15) Si Pablo nagsurat: “Ako tolong beses na nakimaherak sa Kagurangnan na iyan mahale sa sako.” Minsan siring, aram nin Dios na kun padagos na maghuhulit si Pablo sa ibong kan nakakakonsumir na “tunok sa laman” na ini, malinaw na ikakapaheling kaiyan an kapangyarihan nin Dios asin an lubos na pagtitiwala ni Pablo sa Saiya. Kaya imbes na itao ki Pablo an hinahagad nia, sinabihan sia nin Dios: “An sakuyang puersa sinasangkap sa kaluyahan.”​—2 Corinto 12:8, 9.

Iyo, mas aram nin Dios kisa sa sato kun baga para sa pinakaikakarahay niato kun itatao nia an partikular na mga hinahagad ta. Si Jehova nagsisimbag pirme para sa satong ikakarahay, kaoyon kan saiyang mamomoton na mga katuyohan na nakasurat sa Biblia.