1. Anong nakakaogmang oportunidad an makakamtan kan “dakulang kadaklan”?

NAIIMAHINAR mo daw an gabos na karahayan na magigibo nin makapangyarihan na gobyerno, na an namamahala makatanosan asin mapagmalasakit, sa mga sakop kaiyan sa laog nin sangribong taon? Marahayon na mga pangyayari an naghahalat sa dai mabilang na “dakulang kadaklan”—an makakaligtas sa “dakulang kahorasaan,” na biyong matapos sa presenteng maraot na sistema nin mga bagay.—Kap. 7:9, 14.

2. Ano an naeksperyensiahan nin mga tawo sa nakaaging 6,000 na taon?

² Durante kan nakaaging 6,000 na taon, grabeng kolog asin kasakitan an naeksperyensiahan nin mga tawo huling sinda an namamahala saka nagdedesisyon para sa saindang sadiri. Haloy nang sinabi kan Biblia: ‘An tawo nagsasakop sa tawo sa saiyang ikakaraot.’ (Par. 8:9) Kumusta ngonyan? Apuera sa mga giera asin rebelyon, yaon an dakulaon na mga problema na arog nin kadukhaan, helang, pagkaraot kan kapalibotan, pagbago kan klima, asin iba pa. Nagpapatanid an mga opisyal nin gobyerno na kun dai niato babagohon an ugale na mayo sanang pakiaram, kapahapahamak an magigin resulta.

3. Ano an maootob sa Sangribong Taon na Paghade?

³ Sa pamamahala kan Mesiyanikong Hade na si Jesu-Cristo asin kan 144,000 na kaiba niang tagapamahala, an Kahadean nin Dios magibo nin progresibong mga lakdang tanganing haleon an gabos na danyos na ginibo sa mga tawo saka sa istaran ninda, an planetang Daga. Sa Sangribong Taon na Paghade, maootob an nakakaogmang panuga ni Jehova Dios: ‘Ako naglalang nin bagong mga langit asin bagong daga, asin ta idtong naenot na dai na marurumdoman, saka dai na man masabong sa isip.’ (Isa. 65:17) Anong marahayon na mga pangyayari na dai pa nahihiling an naghahalat  sa sato? Sa tabang kan makahulang Tataramon nin Dios, iladawan niato sa isip an marahayon na mga bagay na ‘dai pa nahihiling.’—2 Cor. 4:18.

4. Ano an problema ngonyan nin dakol kun dapit sa istaran?

⁴ Siisay an habong magkaigwa nin sadiring harong, kun saen sia asin an pamilya nia makakamate na ligtas saka tiwasay? Minsan siring, sa kinaban ngonyan, seryosong problema an pagkaigwa nin marahay na istaran. An mga tawo nagsusurusoan sa matawong mga siudad. Dakol an nagtitios sa tinarapal-tapal sanang harong-harong sa mga iskuater. An pagkaigwa nin sadiring harong sagkod sa pangarap na sana para sa sainda.

5, 6. (a) Paano maootob an Isaias 65:21 asin Miqueas 4:4? (b) Paano niato makakamtan an bendisyon na iyan?

⁵ Sa pamamahala kan Kahadean, maootob an minamawot kan lambang residente na magkaigwa nin sadiring harong, huling ihinula iyan paagi ki Isaias: ‘Mapatindog sinda nin mga harong, asin maontok sinda dian; magibo sinda nin mga ubasan, asin kakakanon ninda an mga bunga kaiyan.’ (Isa. 65:21) Pero, bako sana an pagkaigwa nin sadiring harong an lalaoman ninda. Total, an nagkapira ngonyan may sadiring harong, an pira ngani nakaistar sa dakulaon na harong o mansion. Pero pirme sindang nahahadit na mawara iyan sa sainda huling tibaad magkaproblema sinda sa pinansial, o may maglaog na parahabon o mas grabe pa dian. Laen nanggad an magigin kamugtakan kan gabos na bagay sa pamamahala kan Kahadean! Si propeta Miqueas nagsurat: ‘An balang saro matukaw sa ibaba kan saiyang ubas asin sa ibaba kan saiyang higera, asin mayong mapatakot sa sainda.’—Miq. 4:4.

⁶ Mantang nasa isip an marahayon na paglaom na iyan, ano an maninigo tang gibohon? Siempre, gabos kita nangangaipo nin marahay na istaran. Minsan siring, imbes na hingoahon ngonyan na magkaigwa kan pinapangarap na harong na iyan—tibaad paagi sa pag-utang pa ngani nin dakol—bako daw na madonong na magkonsentrar kita sa panuga ni Jehova? Girumdomon an sinabi ni Jesus manongod sa saiyang sadiri: ‘An mga amid may mga erokan, asin an mga gamgam nin langit may mga salagan; alagad an Aki nin tawo dai nin mahihigdaan.’ (Luc. 9:58) May kakayahan asin kapangyarihan si Jesus na magtogdok o magkaigwa kan pinakamarahay na harong na posibleng makamtan nin siisay man. Taano ta dai nia ginibo iyan? Malinaw nanggad, gusto ni Jesus na likayan an ano man na disturbo asin pagkakasibotan na makakaolang sa saiya na enoton an Kahadean. Maaarog ta daw an halimbawa nia asin mapagdadanay na simple an satong mata—na dai nababangkag asin dai nahahadit sa materyal na mga bagay?—Mat. 6:33, 34.

7. Anong relasyon sa pag-oltanan nin mga tawo asin hayop an ipinagboot ni Jehova sa kapoonpooni?

⁷ An pinakahuring linalang ni Jehova iyo an tawo, na pinakanangongorog sa mga ginibo nia sa daga. Sinabi ni Jehova sa saiyang Ekspertong Trabahador, na saiyang panganay na Aki, an espesipikong katuyohan nia: ‘Gibohon niato an tawo siring sa satong ladawan, siring sa satong kasugad; asin sinda magsakop sa mga sira sa dagat, asin sa mga gamgam sa kalangitan, asin sa mga hayop, asin sa bilog na kinaban, patin sa gabos na mga hayop na nagkakanap sa ibabaw nin daga.’ (Gen. 1:26) Sa siring, si Adan asin Eva, patin sa huri an gabos na tawo, pinagbotan na sakopon an linalang na mga hayop.

8. Anong kakayahan nin mga hayop an naoobserbaran ngonyan sa ugale ninda?

⁸ Talaga daw na posible para sa mga tawo na sakopon an gabos na hayop asin magkaigwa nin matoninong na relasyon sa mga ini? Padabang marhay nin dakol na tawo an ataman nindang mga hayop, arog nin mga ayam asin ikos. Pero,  kumusta man an layas na mga hayop? An sarong report nagsabi: “Segun sa nadiskobre kan mga sientistang namuhay harani sa mga hayop tanganing pag-adalan an mga ini, an gabos na mamal may emosyon.” Totoo, nakakahiling kita nin mga hayop na natatakot o nagigin maisog kun sinda nasa peligro, pero may kakayahan daw sindang magpahiling nin kapadangatan? An report nagsabi pa: “Sa pagpadakula sa mga ogbon ninda ihinahayag kan mga mamal an pinakamarahay nindang kualidad—an pambihirang kakayahan ninda na magpahiling nin kapadangatan.”

9. Mapadapit sa mga hayop, anong mga pagbabago an puede niatong asahan?

⁹ Kaya dai kita dapat magngalas kun mabasa niato sa Biblia na magkakaigwa nin katoninongan sa pag-oltanan nin mga tawo asin hayop. (Basahon an Isaias 11:6-9; 65:25.) Taano ta dai? Girumdomon na kan magluwas si Noe asin an pamilya nia sa arka pagkatapos kan Baha, si Jehova nagsabi sa sainda: “An gabos na hayop . . . mabubuhay na igwa nin pagkatakot saindo.” Para iyan sa proteksion nin mga hayop. (Gen. 9:2, 3, BPV *) Dai daw ni Jehova kayang inaan an takot na iyan, tanganing maotob an ipinagboot nia sa kapoonpooni? (Os. 2:18) Nakakagayagaya nanggad an panahon na iyan para sa gabos na makakaligtas tanganing mabuhay digdi sa daga!

10. Taano ta natural sana sa tawo an paghibi?

¹⁰ Kan mahiling ni Salomon “an gabos na inhustisya na ginigibo sa kinaban,” sia nag-agrangay: “Nagtatangis an mga inaapi asin mayo nin minaranga sainda.” (Par. 4:1, BPV) Kapareho kaiyan, o mas maraot pa ngani, an situwasyon ngonyan. Siisay sa sato an dai pa naghibi huli sa ano man na dahilan? Totoo, kun beses tibaad luha iyan nin kagayagayahan. Pero, sa parate nagluluha kita huli sa labi-labing kamondoan.

11. Anong pagkasaysay sa Biblia an partikularmenteng nakapahiro sa saimong puso?

¹¹ Girumdomon an dakol na nakakapukaw sa boot asin nakakapahibing eksena na nababasa niato sa Biblia. Kan si Sara magadan sa edad na 127, ‘uminabot si Abraham ta magmomondo ki Sara, asin magtatangis saiya.’ (Gen. 23:1, 2) Kan magpaaram si Noemi sa duwa niang nabalong manugang na babae, ‘naghiribi sinda na nagkukururahaw,’ dangan ‘iinitaas liwat ninda an saindang tingog, asin naghiribi’ pa nin orog. (Rut 1:9, 14) Kan si Hadeng Ezequias magkaigwa nin grabeng helang asin garo baga dai na talaga sia mahaloy, namibi sia sa Dios saka ‘nagtangis nin makuri,’ na malinaw na nakapahiro sa boot ni Jehova. (2 Ha. 20:1-5) Asin siisay an dai mapapahiro an boot sa pagkasaysay dapit sa pagnegar ni apostol Pedro ki Jesus? Kan madangog ni Pedro an pagturaok kan manok, ‘sia nagluwas asin nagtangis nin mapaiton.’—Mat. 26:75.

12. Paano magtatao nin tunay na kaginhawahan sa katawohan an pamamahala kan Kahadean?

¹² Huli sa makaturotristeng mga pangyayari—sadit man o dakula—na minaabot sa sato, nangangaipo nanggad an katawohan nin pagranga asin pakaginhawa. Iyan an itatao kan Sangribong Taon na Paghade sa mga sakop kaiyan: ‘Papahidon [nin Dios] an gabos na luha sa saindang mga mata; asin an kagadanan madadai na; dai na sagkod magkakaigwa nin pagmondo, ni pagtangis, ni kolog.’ (Kap. 21:4) Nakakaogma nanggad na mawawara na an pagmondo, pagtangis, asin kolog; pero an orog pang nakakaogma nanggad iyo na ipinanuga man nin Dios an paghale sa ultimong kaiwal nin katawohan—an kagadanan. Paano iyan mangyayari?

13. Ano an epekto kan kagadanan sa mga tawo poon kan magkasala si Adan?

¹³ Kan magkasala si Adan, an kagadanan nagpoon kaidtong mamahala bilang hade sa katawohan. Iyan nagin dai nadadaog na kaiwal, dai madudulagan na sagkodan nin makasalan na  mga tawo, asin dahilan nin labi-labing kamondoan asin kapungawan. (Roma 5:12, 14) Sa katunayan, “huli sa takot sa kagadanan,” minilyon an ‘oripon kaiyan sa bilog nindang pagkabuhay.’—Heb. 2:15.

14. Ano an mangyayari kun an kagadanan paraon na?

¹⁴ Itinotokdo kan Biblia an panahon na ‘paparaon an huring kaiwal, na iyo an kagadanan.’ (1 Cor. 15:26) May duwang grupo na puedeng makinabang dian. Para sa “dakulang kadaklan,” na nabubuhay ngonyan, sinda posibleng makaligtas pasiring sa ipinanugang bagong kinaban na may paglaom na mabuhay nin daing katapusan. Para sa binilyon na nagadan na, posible an pagkabuhay liwat. Naiimahinar mo daw an kagayagayahan asin kaogmahan kun sinda sinasabat na kan dakulang kadaklan? Kun sisiyasaton niato an pagkasaysay sa Biblia dapit sa nagkapirang binuhay liwat, magkakaigwa kita nin ideya sa magigin reaksion dian nin mga tawo.—Basahon an Marcos 5:38-42; Lucas 7:11-17.

15. Ano an posibleng marhay na magin reaksion mo kun mahiling mong binuhay na liwat an sarong namomotan mo?

¹⁵ Isip-isipa an mga tataramon na ‘sinda nagngaralas nin makuri [“labi-labi kadakulang kaogmahan,” NW]’ asin ‘sinda nagpamuraway sa Dios.’ Kun yaon ka kan panahon na idto, tibaad arog man kaiyan an namatean mo. Iyo, makakamate kita nin dakulaon na kagayagayahan asin kaogmahan kun mahiling na niatong binuhay na liwat an satong nagadan nang mga namomotan. Sinabi ni Jesus: ‘An oras madatong na an gabos na nasa lolobngan makakadangog kan saiyang tingog, asin maruluwas.’ (Juan 5:28, 29) Mayo pa sa satong nakahiling nin arog kaiyan; seguradong saro iyan sa pinakamarahay na ‘mga bagay na dai pa nahihiling.’

16. (a) Taano ta dapat na entusiastiko niatong ipakipag-olay an mga bendisyon na dai pa nahihiling? (b) Ano an sinabi ni Pablo tanganing parigonon an boot kan mga Kristiano sa Corinto?

¹⁶ Iyo, mamuraway na puturo an naghahalat sa mga  nagdadanay na maimbod ki Jehova sa delikadong mga panahon na ini! Minsan ngani dai pa niato nahihiling an marahayon na mga bendisyon, kaipuhan tang papagdanayon iyan na malinaw sa satong isip tanganing makakonsentrar kita sa kun ano an tunay na mahalaga asin dai madisturbo kan mga pang-aakit kan presenteng sistema nin mga bagay na temporaryo sana. (Luc. 21:34; 1 Tim. 6:17-19) Sa pampamilyang pag-adal saka pagsamba, asin sa pakikipag-olay sa mga kapagtubod, tinotokdoan sa Biblia patin interesado, entusiastiko niatong sabihon an manongod sa marahayon na paglaom niato. Makakatabang ini na mapagdanay na malinaw sa satong isip asin puso an paglaom niato. Arog nanggad kaiyan an ginibo ni apostol Pablo kan parigonon nia an boot kan mga kapwa Kristiano. Garo nia sinda iiniba pasiring sa katapusan kan Sangribong Taon na Paghade ni Cristo. Imahinara an lubos na kahulogan kan mga tataramon ni Pablo sa 1 Corinto 15:24, 25, 28.—Basahon.

17, 18. (a) Sa anong paagi na si Jehova “gabos sa gabos” sa kapinonan kan kasaysayan nin tawo? (b) Ano an gigibohon ni Jesus tanganing ibalik an pagkasararo asin katoninongan?

¹⁷ Sa pagladawan kan dakulang kulminasyon, mayo na nin maorog pa sa mga tataramon na ‘tanganing an Dios magin gabos sa gabos.’ Ano an boot sabihon kaiyan? Isip-isipon an panahon kaidto sa Eden kan an perpektong mga tawo, si Adan asin Eva, kabtang pa kan matoninong asin nagkakasararong unibersal na pamilya ni Jehova. Si Jehova, an Unibersal na Soberano, direktang namamahala sa gabos niang linalang, anghel man o tawo. Puede sindang makipag-olay sa saiya nin personal, sumamba sa saiya, asin bendisyonan nia. Sia ‘gabos sa gabos’ kaidto.

¹⁸ Naraot an matoninong na relasyon na iyan kan an mga tawo, huli sa impluwensia ni Satanas, magrebelde sa soberaniya ni Jehova. Minsan siring, poon kan 1914, may ginigibong progresibong mga lakdang an Mesiyanikong Kahadean tanganing ibalik an pagkasararo asin katoninongan na iyan. (Efe. 1:9, 10) Durante kan Sangribong Taon na Paghade, magkakatotoo an marahayon na mga bagay na “dai nahihiling” sa presente. Dangan maabot “an katapusan,” an boot sabihon, an katapusan kan Milenyal na Paghade ni Cristo. Pagkatapos, ano an mangyayari? Minsan ngani tinawan ‘kan gabos na kapangyarihan sa langit asin sa daga,’ si Jesus bakong ambisyoso. Mayo siang intension na agawon an posisyon ni Jehova. Mapakumbaba niang ‘itatao an kahadean sa Dios na Ama.’ Gagamiton nia an saiyang daing kaagid na posisyon asin autoridad para “sa kamurawayan nin Dios.”—Mat. 28:18; Fil. 2:9-11.

19, 20. (a) Paano ikakapahiling kan gabos na sakop kan Kahadean kun baga minimidbid ninda an soberaniya ni Jehova? (b) Anong marahayon na paglaom an naghahalat sa sato?

¹⁹ Sa panahon na iyan, an daganon na mga sakop kan Kahadean magigin perpekto. Aarogon ninda an halimbawa ni Jesus asin may kapakumbabaan saka gikan sa boot na mimidbidon an soberaniya ni Jehova. Ikakapahiling ninda ini paagi sa pakapanggana sa ultimong pagbalo. (Kap. 20:7-10) Pagkatapos kaiyan, an gabos na rebelde—tawo man o anghel—hahaleon sagkod lamang. Magayagaya asin maogmahon nanggad na panahon iyan! Maogmang oomawon kan bilog na unibersal na pamilya si Jehova, na magigin “gabos sa gabos.”—Basahon an Salmo 99:1-3.

²⁰ An marahayon daw na mga bagay na madali nang itao kan Kahadean nagmomotibar sa saimo na ipokus an saimong atension asin mga paghihingoa sa paggibo kan kabotan nin Dios? Makakaya mo daw na dai madisturbo kan falsong paglaom asin kaginhawahan na iinaalok kan kinaban ni Satanas? Papakosogon mo daw an saimong determinasyon na suportaran asin surogon an soberaniya ni Jehova? Patunayan logod kan saimong mga gibo na iyan an mawot mong gibohon sagkod lamang. Sa siring, maeeksperyensiahan mo an katoninongan asin kaginhawahan sa laog nin sangribong taon—asin lampas pa!