‘Gibohon Mong Mapanggana an Saimong Dalan’—Paano?

“KAPANGGANAHAN”—sarong nakakaakit na tataramon! An nagkapira naghingoang aboton an halangkaw na posisyon sa trabaho asin nagin mapanggana nanggad sa pagkamit nin kayamanan asin kabantogan. An iba nangarap na magin mapanggana alagad biyong nasudya sana.

An kapangganahan nakadependeng marhay sa kun saen ka nakapokus. An duwa pang mahalagang bagay iyo an kun paano mo ginagamit an saimong panahon saka kosog asin kun baga mapamaagi ka.

Napatunayan nin dakol na Kristiano na an lubos na pakikikabtang sa ministeryo nakakakontento nanggad. An bilog na panahon na paglilingkod bilang sarong karera nakatabang sa mga hoben, pati na sa mga may edad na, na magin mapanggana. Pero, tibaad para sa nagkapira medyo nakakasawa an ministeryo, asin ineenot pa ninda an ibang mga pasohan. Taano ta puedeng mangyari ini? Ano an magigibo mo tanganing dai mawara an saimong pokus sa kun ano talaga an mahalaga? Asin paano mo ‘gigibohon na mapanggana an saimong dalan’?—Jos. 1:8.

Ekstrakurikular na mga Aktibidad Asin mga Kinahihiligan

An mga hoben na Kristiano kaipuhan na magin timbang pirme kun dapit sa paglilingkod sa tunay na Dios asin pakikikabtang sa ibang mga aktibidad. An mga naggigibo kaiyan magigin mapanggana sa buhay asin maninigong mamomoton na komendaran.

Pero, an nagkapirang hoben na Kristiano sibot-sibot sa ekstrakurikular na mga aktibidad asin mga kinahihiligan. An siring na mga aktibidad tibaad bako man sala. Minsan siring, maninigong hapoton kan hoben na mga Kristiano an saindang sadiri: ‘Gurano kadakol na panahon an nagagamit ko sa mga aktibidad na iyan? Kumusta man an kairiba? Anong kaisipan ninda an puedeng makaimpluwensia sa sako kun nakikikabtang sa mga aktibidad na iyan? Asin ano an tibaad magin pokus kan sakong buhay?’ Posibleng marhay na narerealisar mo na an saro puedeng mabangkag na marhay sa siring na mga aktibidad kaya dikit na sanang panahon o kosog an matatada para sa pagpadanay nin relasyon sa Dios. Kun siring, maheheling mo kun taano ta mahalaga an pagkaigwa nin mga prioridad.—Efe. 5:15-17.

Isip-isipa an nangyari ki Wiktor. * Sinabi nia: “Kan 12 anyos ako, nag-iba ako sa volleyball club. Pag-abot nin panahon, natawan ako nin dakol na premyo asin award. May oportunidad akong magin sikat.” Pag-abot nin panahon, ikinahadit ni Wiktor an epekto sa saiyang espirituwalidad kan pagmamaigot nia sa isport. Sarong aldaw, napatorog sia mantang hinihingoang basahon an Biblia. Narisa man nia na dai siang gayo naoogma sa ministeryo sa langtad. “Inubos kan isport na iyan an kosog ko, asin dai nahaloy narealisar ko na inuubos man kaiyan an sakong kaigotan sa espirituwal. Aram kong dai ko ginigibo an bilog kong makakaya.”

Halangkaw na Edukasyon?

An sarong Kristiano may sono sa Kasuratan na obligasyon na asikasohon an saiyang pamilya, asin kaiba dian an pagsustento sa sainda sa materyal. (1 Tim. 5:8) Pero, kaipuhan daw talaga dian na an saro makatapos sa kolehio?

Marahay na isip-isipon kun paano an pagkua nin halangkaw na edukasyon puedeng makaapektar sa relasyon nin saro ki Jehova. Iilustrar niato ini paagi sa sarong halimbawa sa Kasuratan.

Si Baruc iyo an sekretaryo ni propeta Jeremias.  May panahon na, imbes na magpokus sa mga pribilehio nia sa paglilingkod ki Jehova, nagin ambisyoso si Baruc. Narisa ini ni Jehova asin pinatanidan Nia sia paagi ki Jeremias: “Nagpaparahanap ka nin darakulang bagay para sa saimong sadiri. Dai ka na magparahanap.”—Jer. 45:5.

Ano an “darakulang bagay” na pigpaparahanap ni Baruc? Tibaad natetentaran siang magin bantog sa Judiong sistema nin mga bagay. O an darakulang bagay na iyan puedeng materyal na kayamanan. Arin man dian, nawara an saiyang pokus sa mga bagay na mas mahalaga, an espirituwal na mga bagay. (Fil. 1:10) Pero, malinaw na si Baruc naghinanyog sa patanid ni Jehova paagi ki Jeremias asin sa siring nakamtan an saiyang kalag bilang samsam.—Jer. 43:6.

Ano an manonodan niato digdi? Ipinaparisa kan konseho ki Baruc na may sarong bagay na sala. Naghahanap sia nin darakulang bagay para sa saiyang sadiri. Kun masusuportaran mo na man an saimong sadiri, kaipuhan mo pa daw talaga na gamiton an saimong panahon, kuarta, asin kosog sa dugang pang edukasyon tangani sanang maabot an mga kamawotan mo o kan saimong mga magurang o ibang paryente?

Isip-isipa si Grzegorz, na sarong computer programmer. Nakombensir sia kan saiyang mga katrabaho na magkua nin kurso, na nangangaipo nin konsentradong pag-adal, para sa dugang pang espesyal na pagsasanay. Dai nahaloy mayo na siang panahon sa espirituwal na mga gibohon. Nagirumdoman nia: “Pirme akong dai mapamugtak. Nakokonsensia ako huling dai ko naaabot an sakong espirituwal na mga pasohan.”

Sibot-Sibot sa Trabaho

Dinadagka kan Tataramon nin Dios an tunay na mga Kristiano na magin mahigos asin responsableng mga empleyado asin among. Si apostol Pablo nagsurat: “Ano man an ginigibo nindo, gibohon iyan nin bilog na kalag na para ki Jehova, asin bakong para sa mga tawo.” (Col. 3:22, 23) Pero, dawa ngani kaomaw-omaw an pagigin mahigos, may kaipuhan pa—an marahay na relasyon sa satong Kaglalang. (Ecl. 12:13) Kun nagin sibot-sibot an sarong Kristiano sa sekular niang trabaho, madali sanang ikakapagilid an espirituwal na mga gibohon.

Kun an sarong Kristiano sibot-sibot sa sekular na trabaho, puedeng maubos an kosog na kaipuhan tanganing mapagdanay an saiyang espirituwal na pagkatimbang asin maasikaso an saiyang pamilya. Naobserbaran ni Hadeng Salomon na an “duwang hakbot nin pagpapagal” parateng kasabay an “paglapag sa doros.” Kun an sarong Kristiano sibot-sibot sa sekular na karera, puede siang magkaigwa nin nagpapadagos asin grabeng tension. Puede pa ngani siang magin oripon nin karera sagkod sa punto na haros mayo na siang kosog. Kun arog kaiyan, talaga daw na sia ‘makakapaggayagaya asin makakaheling nin karahayan sa gabos niang kahigosan’? (Ecl. 3:12, 13; 4:6) Mas mahalaga pa dian, magkakaigwa pa daw sia kan kaipuhan na pisikal asin emosyonal na  kosog tanganing otobon an mga paninimbagan nia sa pamilya asin makikabtang sa espirituwal na mga aktibidad?

Si Janusz, na nakaistar sa Sirangan na Europa, nagin sibot na marhay sa saiyang negosyo nin paghardin. Nagirumdoman nia: “An mga tawo sa kinaban hanga sako huling mapamaagi ako asin natatapos ko an kada ipinapagibo sako. Alagad naapektaran an sakong espirituwalidad, asin dai na ako nakikikabtang sa ministeryo sa langtad. Dai nahaloy, dai na ako nag-aatender sa mga pagtiripon. Nagin mapalangkaw ako kaya binaliwala ko an konseho kan kamagurangan asin luway-luway akong nagrayo sa kongregasyon.”

Magigibo Mong Magin Mapanggana sa Buhay

Natokar niato an tolong bagay na tibaad pagkasibotan na marhay nin sarong Kristiano, na huli kaiyan isinasakripisyo nia an saiyang  espirituwalidad. Sibot ka daw sa arin man dian? Kun iyo, an minasunod na mga hapot, teksto, asin komento puedeng makatabang sa saimo na maaraman kun baga pasiring ka talaga sa kapangganahan.

Ekstrakurikular na mga aktibidad asin mga kinahihiligan: Gurano ka kasibot sa siring na mga aktibidad? Inuubos daw kan mga ini an panahon na dati mong ginagamit sa espirituwal na mga gibohon? Dai ka daw gayong naoogma sa pakikiiba sa mga kapagtubod? Kun arog kaiyan, taano ta dai arogon si Hadeng David, na nakimaherak ki Jehova: “Ipaaram mo sa sako an dalan na maninigo kong lakawan”?—Sal. 143:8.

Si Wiktor, na nasambitan sa enotan, tinabangan nin sarong nagbibiaheng paraataman. Sinabihan sia kan paraataman: “Ganadong-ganado kang iestorya an karera mo sa volleyball.” “Napaisip ako dahel dian,” an sabi ni Wiktor. “Napag-isip-isip ko na nasobrahan na ako. Dai nahaloy, dai na ako nakikiiba sa kinabanon na mga katood sa club asin naghanap ako nin mga katood sa kongregasyon.” Ngonyan, si Wiktor maigot na naglilingkod ki Jehova sa kongregasyon ninda. Irinekomendar nia: “Hapoton nindo an saindong mga katood, mga magurang, o an kamagurangan kun naoobserbaran ninda kun baga irinarani o irinarayo kamo ki Jehova kan mga aktibidad nindo sa eskuelahan.”

Taano ta dai ipaheling sa saindong kamagurangan na gusto mong aboton an iba pang mga pribilehio sa paglilingkod sa Dios? Puede mo daw ibanan o tabangan an mga may edad na, tibaad sa saindang pamamakal o mga gibohon sa harong? Ano man an saimong edad, tibaad puede kang makikabtang sa bilog na panahon na ministeryo, na ihinihiras sa iba an basehan kan saimong kagayagayahan.

Halangkaw na edukasyon: Nagpatanid si Jesus tumang sa ‘paghanap kan sadiri mong kamurawayan.’ (Juan 7:18) Ano man an saimong desisyon sa kun anong sekular na edukasyon an aaboton, ‘sinierto mo daw an orog na mahalagang mga bagay’?—Fil. 1:9, 10.

An computer programmer na si Grzegorz may ginibong mga pagbabago sa buhay nia. Sinabi nia: “Sineryoso ko an sadol kan kamagurangan kaya pinasimple ko an sakong buhay. Napag-isip-isip ko na dai ko na kaipuhan pang kumua nin sekular na edukasyon. Uuboson sana kaiyan an sakong panahon asin kosog.” Nagin mas sibot si Grzegorz sa mga aktibidad sa kongregasyon. Pag-abot nin panahon, naggradwar sia sa inaapod ngonyan na Bible School for Single Brothers. Iyo, ‘binakal nia an panahon’ tanganing orog na matokdoan nin Dios.—Efe. 5:16.

Sekular na trabaho: Sibot-sibot ka na daw sa saimong trabaho kaya ipinapagilid mo na an espirituwal na intereses? Nagtatao ka daw nin igong panahon tanganing makikomunikar sa saimong pamilya? Asin sa kongregasyon, pinapaoswag mo daw an kalidad kan saimong mga kabtang? Nakikipag-olay ka daw sa iba tanganing makapakosog? “Matakot ka sa tunay na Dios asin otobon mo an saiyang mga togon,” asin mag-aako ka nin abundang bendisyon ni Jehova saka ‘makakaheling ka nin karahayan huli sa saimong kahigosan.’—Ecl. 2:24; 12:13.

Si Janusz, na nasambitan sa enotan, dai nagkamit nin dakulang kapangganahan sa saiyang negosyo nin paghardin; imbes, nalugi sia. Huling mayong ginaganar asin lubog sa utang, nagdolok sia ki Jehova. Pinakarhay ni Janusz an saiyang buhay asin naglilingkod na sia ngonyan bilang regular payunir asin magurang sa kongregasyon. Sinabi nia: “Kun kontento ako sa simpleng buhay mantang nakapokus sa espirituwal, trangkilo an sakong isip asin kalmado an sakong puso.”—Fil. 4:6, 7.

Magtao nin panahon tanganing onestong ebalwaron an saimong mga motibo asin prioridad. An paglilingkod ki Jehova sarong dalan pasiring sa bilog na buhay na kapangganahan. Isentro mo dian an saimong buhay.

Tibaad kaipuhan mong gumibo nin mga pagliliwat, na hinahale pa ngani an dai kinakaipuhan na mga bagay tanganing mapatunayan mo sa saimong sadiri “kun ano an marahay asin inaako patin perpektong kabotan nin Dios.” (Roma 12:2) Alagad puede mong ‘gibohon na mapanggana an saimong dalan’ paagi sa bilog na kalag na paglilingkod sa saiya.

[Nota sa Ibaba]

[Kahon/Ritrato sa pahina 31]

Paano Mo Magigibong Mapanggana an Saimong Dalan?

Huli sa kadakolan nin mga bagay na naghahagad kan saimong atension, paano mo malilikayan na mawara an saimong pokus sa kun ano talaga an mahalaga? Magtao nin panahon tanganing siyasaton an saimong mga motibo asin prioridad paagi sa paghorophorop sa minasunod na mga hapot:

EKSTRAKURIKULAR NA MGA AKTIBIDAD ASIN MGA KINAHIHILIGAN

▪ Anong mga kaisipan an puedeng makaimpluwensia sa saimo kun nakikikabtang ka sa mga aktibidad na iyan?

▪ Gurano kadakol na panahon an hinahagad kaini?

▪ Puede daw na ini an magin pokus kan saimong buhay?

▪ Inuubos daw kaini an panahon na dati mong ginagamit sa espirituwal na mga gibohon?

▪ Sairisay an kairiba mo?

▪ Mas gusto mo daw sindang kairiba kisa sa mga kapagtubod?

HALANGKAW NA EDUKASYON

▪ Kun masusuportaran mo na man an saimong sadiri, kaipuhan mo pa daw talaga na gamiton an saimong panahon, kuarta, asin kosog sa dugang pang edukasyon?

▪ Tanganing masuportaran an saimong sadiri, kaipuhan daw talagang makatapos ka sa kolehio?

▪ Ano an magigin epekto sa pag-atender mo sa mga pagtiripon?

▪ ‘Sinierto mo daw an orog na mahalagang mga bagay’?

▪ Kaipuhan mo daw na pakosogon an saimong kompiansa sa kakayahan ni Jehova na magtao kan mga pangangaipo mo?

TRABAHO

▪ ‘Nakakapaggayagaya ka daw asin nakakaheling nin karahayan sa gabos mong kahigosan’ huli sa trabaho mo?

▪ Igwa ka pa daw kan kaipuhan na pisikal asin emosyonal na kosog tanganing otobon an mga paninimbagan mo sa pamilya asin makikabtang sa espirituwal na mga aktibidad?

▪ Nagtatao ka daw nin igong panahon tanganing makikomunikar sa saimong pamilya?

▪ Sibot-sibot ka na daw sa saimong trabaho kaya ipinapagilid mo na an espirituwal na mga bagay?

▪ Naaapektaran daw kaiyan an kalidad kan saimong mga kabtang sa kongregasyon?

[Ritrato sa pahina 30]

Pinatanidan ni Jehova si Baruc dapit sa ambisyon