Nagkakalayong Impierno daw an Boot Sabihon ni Jesus?
Nagkakalayong Impierno daw an Boot Sabihon ni Jesus?
AN SINASAMBIT kan nagkapirang naniniwala sa doktrina na nagkakalayong impierno iyo an mga tataramon ni Jesus na nakasurat sa Marcos 9:48 (o bersikulo 44 asin 46). Sinambit nia an mga ulod na dai nagagadan asin an kalayo na dai napaparong. Kun may maghapot sa saindo manongod sa mga tataramon na iyan, ano an isisimbag nindo?
Depende sa ginagamit na bersion kan Biblia, tibaad basahon nia an bersikulo 44, 46, o 48 huli ta sa nagkapirang bersion magkakaagid an mga tataramon na ginamit sa mga bersikulong ini. * Mababasa niato sa New World Translation: “Kun an saimong mata iyo an minapasingkog sa saimo, hulwata iyan; marahay pa saimo na lumaog sa kahadean nin Dios na saro sana an mata kisa sa may duwang mata na iapon sa Gehenna, na duman an saindang mga ulod dai nagagadan asin an kalayo dai napaparong.”—Mar. 9:47, 48.
Sa paano man, hinihingako nin nagkapira na sinusuportaran kan mga tataramon ni Jesus an paniniwala na an kalag kan mga maraot nagdudusa sagkod lamang pagkagadan. Halimbawa, an sarong komento sa Kastilang Sagrada Biblia kan Unibersidad nin Navarre nagsasabi: “Ginamit kan satong Kagurangnan [an mga tataramon na ini] tanganing ipanongod sa pagpasakit sa impierno. Sa parate an ‘ulod na dai nagagadan’ ipinapaliwanag bilang an daing sagkod na pagbasol na nagpapasakit nin makuri sa mga nasa impierno; asin an ‘dai napaparong na kalayo,’ bilang an padusa sa sainda sa pisikal na paagi.”
Minsan siring, ikomparar sa huring bersikulo kan hula ni Isaias an mga tataramon ni Jesus. * Bako daw na malinaw na an naunabihan ni Jesus iyo an teksto sa Isaias kapitulo 66? Minalataw na an pinapanongdan kan propeta dian iyo an pagluwas “sa Jerusalem pasiring sa nasa palibot na Kababan nin Hinnom (Gehenna), na duman nag-aatang kaidto nin mga tawo (Jer 7:31) asin na pag-abot nin panahon nagin basurahan kan siudad.” (The Jerome Biblical Commentary) An simbolismo sa Isaias 66:24 malinaw na bakong manongod sa mga tawong pinapasakitan nin grabe; iyan nagtataram manongod sa mga bangkay. An pinapanongdan kaiyan na dai nagagadan iyo an mga ulod—bakong an buhay na mga tawo o imortal na mga kalag. Kun siring, ano an kahulogan kan mga tataramon ni Jesus?
Mangnohon an komento sa Marcos 9:48 sa librong Katoliko na El evangelio de Marcos. Análisis lingüístico y comentario exegético, Volume II: “[An] mga tataramon na ini kinua sa Isaias (66,24). Dian ipinapaheling kan propeta an duwang parateng nangyayari sa mga bangkay: nalalapa asin nasusulo . . . An mga tataramon na ‘mga ulod’ asin ‘kalayo’ na parehong ginamit sa teksto nagdodoon kan ideya na pagkalaglag. . . . An duwang mapanlaglag na puersang iyan ilinaladawan na permanente (‘dai napaparong, dai nagagadan’): mayo talaga nin paagi na madulagan iyan. Sa paglaladawan na ini, an mga nagdadanay sana iyo an ulod asin an kalayo—bakong an tawo—saka pinapara kan duwang iyan an ano man na napapaduman sa mga iyan. Kaya, ini bakong paglaladawan nin daing katapusan na pagpasakit, kundi nin lubos na pagkalaglag, na katumbas nin pangultimong kagadanan, huling an mga nakakaeksperyensia kaiyan dai na noarin man bubuhayon liwat. Kun siring, an [kalayo] sarong simbolo nin pagkapara.”
An siisay man na nakakaaram na an tunay na Dios mamomoton asin makatanosan maninigong makarealisar kun gurano karasonableng saboton sa paaging iyan an mga tataramon ni Jesus. Dai nia sinasabi kaidto na an mga maraot makakaeksperyensia nin daing katapusan na pasakit. Imbes, namemeligro sinda na lubos na laglagon, na dai na noarin man bubuhayon liwat.
[Mga Nota sa Ibaba]
^ par. 3 Dai kaiba sa pinakamasasarigan na mga manuskrito kan Biblia an bersikulo 44 asin 46. Inaadmitir nin mga nag-espesyalisar na an duwang bersikulong iyan posibleng marhay na idinagdag kan huri. Nagsurat si Propesor Archibald T. Robertson: “Dai kaiba sa kaguranggurangi asin pinakamarahay na mga manuskrito an duwang bersikulong ini. Iyan hale sa mga grupo nin mga manuskrito sa Solnopan asin Siria (Bizancio). Iyan pag-otro sana sa bersikulo 48. Huli kaini, [dai niamo iniba] an bersikulo 44 asin 46, na bakong masasarigan na mga bersikulo.”
^ par. 5 “Sinda maruluwas nanggad asin hehelingon an mga bangkay kan mga tawo na naglalapas sa sako; huli ta an mismong mga ulod sa ibabaw ninda dai magagadan asin an saindang kalayo mismo dai mapaparong, asin sinda magigin makababalde sa gabos na laman.”—Isa. 66:24.