Andam daw Kamo na Idepensa an Saindong Pagtubod?

NAPAATUBANG na daw kamo sa sarong situwasyon na kinaipuhan nindong idepensa an saindong pagtubod? Isip-isipa an nangyari ki Susana, 16 anyos na tugang sa Paraguay. Sa saiyang klase sa haiskul dapit sa kun ano an tama asin salang ugale (ethics class), may nagkomento na dai inaako kan Mga Saksi ni Jehova an “Daan na Tipan,” si Jesu-Cristo, o si Maria. May nagsabi man na an mga Saksi panatiko asin pipilion pa nindang magadan kisa magpabolong sa doktor. Kun kamo an nakadangog nin siring kaiyan, ano an magigin reaksion nindo?

Si Susana namibi ki Jehova asin nag-itaas sia nin kamot. Madali nang matapos an klase, kaya nakiolay sia sa saiyang maestra na togotan siang magtao nin presentasyon manongod sa saiyang mga tinutubod bilang saro sa Mga Saksi ni Jehova. Daing pag-alangan na nag-oyon an maestra. Kan suminunod na duwang semana, nag-andam si Susana para sa saiyang presentasyon, na ginagamit an brosyur na may titulong Jehovah’s Witnesses​—Who Are They? What Do They Believe?

Nag-abot an aldaw para sa presentasyon. Ipinaliwanag ni Susana an ginikanan kan ngaran na Mga Saksi ni Jehova. Ipinaliwanag man nia an satong paglaom para sa ngapit asin kun taano ta dai kita nagpapaineksion nin dugo. Dangan inimbitaran nia na maghapot an klase. An kadaklan sa mga estudyante nag-itaas nin kamot. Naghanga an maestra sa basado sa Kasuratan na simbag kan daragita sa mga ihinapot kan klase.

Nagkomento an sarong estudyante, “Nakaduman na ako sa Kingdom Hall nin sarong beses, asin mayo ni sarong imahen duman.” Gustong maaraman kan maestra kun taano. Binasa ni Susana an Salmo 115:4-8 asin Exodo 20:4. Huling nagngalas an maestra, sia nagsabi, “Taano ta pano-pano nin imahen an samong mga simbahan kun kinokondenar palan iyan kan Biblia?”

An hapot-simbagan naglawig nin 40 minutos. Kan hapoton ni Susana an klase kun gusto nindang maheling an video na No Blood​—Medicine Meets the Challenge, an gabos nagsimbag nin iyo. Kaya nag-iskedyul an maestra nin saro pang sesyon sa sunod na aldaw. Pakatapos kan video, ipinaliwanag ni Susana an alternatibong mga pagbolong na inaako kan nagkapira sa Mga Saksi ni Jehova. Mapadapit dian, nagkomento an maestra: “Dai ko aram na dakolon palan nin alternatibong pagbolong; dai ko man aram an mga pakinabang nin pagbolong na dai naggagamit nin dugo. An mga pagbolong na ini—para sana daw iyan sa Mga Saksi ni Jehova?” Kan maaraman nia na bako, nagsabi an maestra, “Sa sunod na may magdalaw sako na mga Saksi ni Jehova, makikipag-olay ako sa sainda.”

An 20 minutos na presentasyon na orihinal na inandam ni Susana naglawig nin tolong oras. Pakalihis nin sarong semana, an ibang mga estudyante  nagtao nin presentasyon dapit sa saindang mga paniniwala bilang mga miembro nin iglesia. Sa pagtatapos, dakol an naghapot, alagad dai ikinadepensa kan mga estudyanteng nagpresentar an saindang pagtubod. Hinapot sinda kan maestra, “Taano ta dai nindo ikinakadepensa an saindong pagtubod arog kan ginibo kan saindong kaklase na saro sa Mga Saksi ni Jehova?”

An simbag iyo ini: “Talaga pong nag-aadal sinda sa Biblia. Kami po dai.”

Kinaolay kan maestra si Susana asin sinabi nia, “Talagang nag-aadal nanggad kamo sa Biblia asin naghihingoa kamong gibohon an sinasabi kaiyan. Maninigo kamong tawan nin komendasyon.”

Puede kutanang nagdanay na sanang silensio si Susana. Pero, paagi sa pagtaram bilang depensa, sinunod nia an marahayon na halimbawa nin sarong dai nginaranan na daragitang Israelita na dinarang bihag kan mga Sirio. An daragitang iyan yaon kaidto sa harong kan Siriong heneral na si Naaman, na may makangingiring helang sa kublit. Nagtaram an daragitang Israelita, na sinasabi sa saiyang among na babae: “Kun an kagurangnan ko sana kutana makaatubang sa propeta na yaon sa Samaria! Sa siring papaomayan nia sia sa saiyang daot.” Dai nanggad kaya kan daragita na dai magpatotoo manongod sa tunay na Dios. Huli kaini, an kagsadiri sa saiya, si Naaman, nagin parasamba ki Jehova.​—2 Ha. 5:3, 17.

Siring man, dai kaya ni Susana na dai magpatotoo manongod ki Jehova asin sa banwaan kaini. Paagi sa inisyatiba na idepensa an saiyang pagtubod kan kuestionon an mga tinutubod nia, sinunod ni Susana an pagboot na nasa Kasuratan: “Pakangbanalon nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Ped. 3:15) Andam daw kamo na idepensa an saindong pagtubod asin magkaigwa nin inisyatiba kun may maglataw na oportunidad?

[Ritrato sa pahina 17]

An duwang ini makakatabang sa saindo na idepensa an saindong pagtubod