Puede Kamong Mabuhay Sagkod Lamang

AN DAKULANG mayoriya kan nagtutubod sa mga relihion kan kinaban pinakamamahal an esperansa na magkaigwa nin sarong klase nin buhay na daing sagkod. An mga detalye tibaad magkakalaen sa lambang relihion, alagad an paglaom sa pundamental parareho—an mabuhay nin maogma sa pinakamarahay na mga kamugtakan na mayo nin huma nin kagadanan. Bako daw na iyan man an mawot nindo? Paano ipapaliwanag kun taano ta lakop an siring na mga paniniwala? Asin maootob pa daw an esperansang mabuhay nin daing sagkod?

Ipinapaheling kan Kasuratan na ibinugtak kan Kaglalang sa kaisipan nin tawo an kamawotan para sa buhay na daing katapusan poon sa mismong kapinonan, poon sa panahon na linalang nia an enot na tawong mag-agom. “An panahon na daing talaan ibinugtak nia sa saindang puso,” an sabi kan Biblia.—Eclesiastes 3:11.

Minsan siring, tanganing maotob an kamawotan na iyan na mabuhay sagkod lamang, kaipuhan na akoon kan enot na tawong mag-agom an autoridad nin Dios na magdesisyon sa kun ano an tama asin kun ano an sala. Kun ginibo ninda iyan, si Jehova nagdesisyon kutana na sinda maninigo sa buhay “sagkod sa panahon na daing talaan” sa istaran na inandam nia para sa sainda, an hardin nin Eden.—Genesis 2:8; 3:22.

Nawara an Buhay na Daing Katapusan

Ipinapaheling kan rekord sa Biblia na itinanom nin Dios sa hardin “an kahoy nin pakamidbid kan marahay asin maraot,” na an bunga kaiyan ipinagbawal nia ki Adan asin Eva na kakanon, ta kun kakanon ninda, sinda mag-aako nin padusang kagadanan. (Genesis 2:9, 17) An dai pagkakan ni Adan asin Eva kan bungang iyan magpapaheling sa Dios na minimidbid ninda an saiyang autoridad. Sa ibong na lado, an pagkakan kan bunga magpaparisa kan saindang paghabo sa autoridad nin Dios. Dai kinuyog ni Adan asin Eva an mga instruksion ni Jehova asin sinda kuminampi ki Satanas, sarong espiritung linalang na nagrebelde tumang sa autoridad nin Dios. Bilang resulta, tamang dinesisyonan nin Dios na si Adan asin Eva bakong angay na mabuhay sagkod lamang.—Genesis 3:1-6.

An iinalok nin Dios iyo an buhay o kagadanan, pag-eksister o dai pag-eksister. An resulta nin kasumbikalan kagadanan asin biyong katapusan kan saindang pag-eksister. Bakong posible para ki Adan asin Eva o sa siisay man sa saindang mga aki na padagos na mabuhay paagi sa sarong partikular na inomon na bolong na may mahika o sa sarong inmortal na kalag. *

An gabos na aki ni Adan nagdusa huli kan saiyang pagrebelde. Ipinaliwanag ni apostol Pablo an manongod sa mga resulta kaiyan. Sia nagsurat: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12.

Nabawi an Buhay na Daing Katapusan

Iinilustrar ni apostol Pablo an kamugtakan kan mga aki ni Adan  paagi sa pag-agid kaiyan sa sarong oripon kaidtong enot na siglo. Huli sa minanang kasalan, dai madudulagan kan mga aki ni Adan asin Eva na mamundag na “mga oripon nin kasalan,” na nakatalagang magadan. (Roma 5:12; 6:16, 17) Sa ibang pagtaram, dai iyan madudulagan kun dai si Jehova naggibo nin legal na remedyo tanganing bakalon an katalingkasan kan siring na mga oripon. Ipinaliwanag ni Pablo: “Kun paanong paagi sa sarong paglapas [ni Adan] an bunga sa gabos na tawo iyo an silot, siring man paagi sa sarong gibo nin pagtataong katanosan an bunga sa gabos na tawo iyo an pagpapahayag sa sainda na matanos para sa buhay.” An “gibo nin pagtataong katanosan” na iyan nagresulta sa pagsakripisyo ni Jesus kan saiyang sadiring sangkap na buhay bilang tawo na magin “katimbang na pantubos para sa gabos.” Minidbid ni Jehova an legal na puersa kan pantubos na makapatalingkas sa katawohan gikan sa “paghokom” na “silot.”—Roma 5:16, 18, 19; 1 Timoteo 2:5, 6.

Iyan an dahelan kun taano ta an liabe sa buhay na daing katapusan dai noarin man manonompongan kan mga sientista sa kodigo henetiko nin tawo. Yaon sa iba an liabe. Oyon sa Biblia, an pinakadahelan kan kagadanan nin katawohan sarong moral asin legal na isyu, bakong biolohiko. An paagi para sa pagbabalik kan buhay na daing katapusan—an pantubos na atang ni Jesus—legal man. An pantubos sarong kapahayagan man nin katanosan asin mamomoton na kabootan nin Dios. Kun siring, siisay an makikinabang sa pantubos asin maako nin buhay na daing katapusan?

An Balaog na Inmortalidad

Si Jehova Dios ‘poon sa panahon na daing talaan sagkod sa panahon na daing talaan.’ Sia inmortal. (Salmo 90:2) An enot na persona na tinawan ni Jehova nin balaog na inmortalidad iyo si Jesu-Cristo. Si apostol Pablo nagpaliwanag: “Si Cristo, ngonyan na binuhay na sia liwat hale sa mga gadan, dai na magagadan; an kagadanan dai na makakadaog sa saiya.” (Roma 6:9) Tunay nanggad, ipinapaheling an pagkakalaen kan binuhay liwat na si Jesus sa daganon na mga namamahala, ilinadawan sia ni Pablo bilang an solamenteng saro sa sainda na may inmortalidad. Si Jesus magdadanay na ‘buhay sagkod lamang.’ An saiyang buhay “dai malalaglag.”—Hebreo 7:15-17, 23-25; 1 Timoteo 6:15, 16.

Si Jesus bakong an solamenteng maako kan siring na balaog. An linahidan nin espiritung mga Kristiano na pinili tanganing mamahala bilang mga hade sa langitnon na kamurawayan nag-aako nin klase nin pagkabuhay liwat na kapareho kan inako ni Jesus. (Roma 6:5) Ipinapaheling ni apostol  Juan na an pribilehiong ini itinao sa 144,000 na indibiduwal. (Kapahayagan 14:1) Sinda nag-aako man nin inmortalidad. Mapadapit sa saindang pagkabuhay liwat, si Pablo nagsabi: “An laman asin dugo dai makakapagmana kan kahadean nin Dios . . . An trumpeta matanog, asin an mga gadan bubuhayon na dai na malalapa, asin kita maliliwat. Huli ta ining malalapaon kaipuhan na magsulot nin kadaihan nin kalapaan, asin ining mortal kaipuhan na magsulot nin inmortalidad.” An kagadanan mayo na nin kapangyarihan sa mga nag-aako kan siring na pagkabuhay liwat.—1 Corinto 15:50-53; Kapahayagan 20:6.

Pambihira nanggad an kapahayagan na ini gikan sa Dios. Minsan ngani sinda espiritu, dawa an mga anghel dai linalang na inmortal. Ipinapaheling ini kan katunayan na gagadanon an espiritung mga linalang na nag-iba sa pagrebelde ni Satanas. (Mateo 25:41) Sa ibong na lado, an kairibang namamahala ni Jesus nag-aako nin balaog na inmortalidad, na prueba kan dai matatanyog na kompiansa ni Jehova sa saindang kaimbodan.

Nangangahulogan daw ini na 144,000 na indibiduwal sana, sarong medyo sadit na kabilangan kun ikokomparar sa binilyon na tawo na nabuhay kasuarin man, an mabubuhay sagkod lamang? Dai. Helingon niato kun taano.

Buhay na Daing Katapusan sa Sarong Paraisong Daga

Ipinepresentar kan libro sa Biblia na Kapahayagan an magayon na ladawan nin dai mabilang na kadaklan nin tawo na tinawan nin buhay na daing katapusan sa sarong paraisong daga. Kaiba ninda an mga nagadan alagad binuhay liwat asin ibinalik sa dating salud asin kabagsikan nin pagkahoben. (Kapahayagan 7:9; 20:12, 13; 21:3, 4) Sinda ginigiyahan pasiring sa “salog kan tubig nin buhay, na malinaw siring sa kristal, na nagbobolos hale sa trono nin Dios.” Nasa mga pangpang kaiyan an “mga kahoy nin buhay . . . , asin an mga dahon kan mga kahoy para sa pagpaomay sa mga nasyon.” Si Jehova Dios igwang maugayon na pangagda: “An siisay man na napapaha dumolok; an siisay man na boot, kumua kan tubig nin buhay na daing bayad.”—Kapahayagan 22:1, 2, 17.

An mga kahoy asin tubig na ini bakong milagrosong pampalawig nin buhay o burabod nin pagkahoben, siring kan hinanap kan mga alkimista asin eksplorador dakol na siglo na an nakaagi. Imbes, nagrerepresentar iyan sa mga probisyon nin Dios paagi ki Jesu-Cristo para sa pagbabalik kan katawohan sa sangkap na kamugtakan na nag-eksister sa kapoonpooni.

Dai nagliwat an katuyohan nin Dios na magtao nin buhay na daing sagkod digdi sa daga sa makinuyog na katawohan. An katuyohan na iyan maootob, huling maimbod si Jehova. An Salmo 37:29 nagsabi: “An mga matanos mismo makakasadiri kan daga, asin sinda mag-eerok dian sagkod lamang.” An panugang ini nagpapahiro sa sato, kaiba an mga gikan sa katawohan na tinawan nin langitnon na inmortalidad, na ipahayag: “Dakula asin makangangalas an saimong mga gibo, Jehova Dios, an Makakamhan sa Gabos. Matanos asin tunay an saimong mga dalan, Hade sa panahon na daing sagkod. Siisay nanggad an dai matatakot sa saimo, Jehova, asin magpapamuraway kan saimong ngaran, huli ta ika sana an maimbod?”—Kapahayagan 15:3, 4.

Minamawot daw nindo an mahalagang marhay na balaog na buhay na daing sagkod? Kun iyo, dapat nindong patunayan na kamo maimbod asin makinuyog sa “Hade sa panahon na daing sagkod.” Kaipuhan na manodan nindo an manongod ki Jehova asin sa saro na paagi sa saiya nagin posible an siring na buhay, si Jesu-Cristo. An gabos na andam na akoon an mga pamantayan nin Dios manongod sa tama asin sala tatawan nin balaog na “buhay na daing katapusan.”—Juan 17:3.

[Nota sa Ibaba]

[Kahon/Ritrato sa pahina 5]

Sarong Nagdadanay na Kamawotan

Ilinaladawan kan Epiko ni Gilgames, na sarong estorya sa Mesopotamia na pinaghohonang isinurat kan ikaduwang milenyo B.C.E., an paghanap kan sarong eroe sa daing sagkod na pagkahoben. An suanoy na mga Egipcio ginibong momiya an mga gadan, na may ideya na magagamit giraray kan mga kalag, na pinaniwalaan na inmortal, an saindang hawak. Bilang resulta, an nagkapirang lolobngan kan mga Egipcio pano nin gabos na bagay na tibaad kakaipuhanon kan gadan sa inaapod daa na buhay pagkagadan.

Sa mga alkimistang Intsik, an paniniwala sa pisikal na inmortalidad minalataw na kaidto pang kisuerra ikawalong siglo B.C.E., asin an posibilidad na makamtan ini paagi sa inomon na bolong na may mahika minalataw na kaidto pang ikaapat na siglo B.C.E. An mga Europeo asin Arabeng alkimista kan Edad Media naghanap asin nagprobar na mag-imbento nin sadiri nindang pampalawig nin buhay. An nagkapira sa saindang mga meskla igwa nin mga halo na arseniko, asoge, asin asupre. Dai ta aram kun pira an hinilo an saindang sadiri huli sa pag-inom kan mga mesklang ini!

Lakop man kaidto an mga leyenda manongod sa inaapod daa na Burabod nin Pagkahoben—sarong burabod na sinasabing nagbabalik kan dating kabagsikan kan mga nag-inom duman.

 [Kahon/​Mga Ritrato sa pahina 7]

Buhay na Daing Katapusan—Nakakalangkag?

An nagkapira nakikidiskutir na an buhay na daing katapusan magigin nakakalangkag, na iyan pagsayang sana nin panahon na daing sagkod na may kaibang daing saysay na mga aling-alingan na inoorootro nin daing katapusan. Tibaad an panahon na daing sagkod na saindang iniimahinar iyo an daing katapusan na pagpalawig kan presenteng mga paagi nin pamumuhay asin kamugtakan na para sa dakol na tawo garo nakakalangkag asin daing saysay. Minsan siring, sa Paraiso na ibabalik nin Dios, sia nanunuga sa tawo nin “labi-labi nanggad na kaogmahan sa nagsosopay na katoninongan.” (Salmo 37:11) An siring na buhay magtatao sa katawohan nin oportunidad na magkaigwa nin kaaraman manongod sa mga linalang ni Jehova asin idusay an panahon sa pagpaoswag nin ano man o gabos na kawiliwiling abilidad, pag-adal, asin okupasyon na puede sana niatong magin pangarap ngonyan.

Si Dr. Aubrey de Grey, sarong henetisista sa Unibersidad nin Cambridge na imbuelto sa pagsisiyasat manongod sa pagpalawig nin buhay, nagsabi: “An mga tawo na may marahay na edukasyon asin may panahon na gamiton iyan nungkang nalalangkag ngonyan asin dai ninda iniisip na mauubosan sinda nin bagong mga bagay na gusto nindang gibohon.” Dawa siring, an sabi kan ipinasabong na Tataramon nin Dios, “an katawohan dai noarin man [makakarorop] sa ginibo kan tunay na Dios poon sa kapinonan sagkod sa katapusan.”—Eclesiastes 3:11.