Gurano Kamo Karahay na Makipagkomunikar?

“SURAT nin Pagkamoot nin Sarong 60 Anyos.” Iyan an tema kan kompetisyon sa swipstik nin sarong bangko sa Hapon pirang taon na an nakaagi. Sinadol kaiyan an mga Hapon na labi nang 50 asin 60 anyos na ipahayag an “tunay na namamatean” ninda sa saindang agom. An sarong partisipante nagsurat sa saiyang agom na babae: “Tibaad magngisi ka, alagad pagbabasolan ko kun dai ko iyan sasabihon, kaya sasabihon ko ining namamatean ko sa makosog na boses: Salamat ta nagpakasal ka sa sako.”

Sa dakol na kultura, kaiba an nagkapira sa Oriente, dinedesganar an sueltong pagpahayag kan namamatean nin saro. Pero, labing 15,000 an uminayon sa kompetisyon na iyan na paggibo nin surat nin pagkamoot. Iyan nagin popular na marhay kaya ginibo an saro pang kompetisyon, asin nagpublikar nin mga libro base sa mga surat. Nagsusuherir ini na sa kairairaromi ninda, dakol an naghihimuyawot na ipahayag an saindang namamatean sa saindang pinakamamahal na agom. Pero, an iba nagsasayumang gibohon iyan. Taano? Posibleng marhay na huling iyan nangangaipo nin paghihingoa asin abilidad na ikapasabot ninda sa iba​—⁠arog kan agom⁠​—⁠​kun ano an namamatean ninda.

Si Hitoshi Kato, na nagsurat nin sarong libro manongod sa pagretiro, nagsabi na sa mga mas may edad nang mag-agom sa Hapon, dakol na kaso nin pagdidiborsio an pinoponan kan mga agom na babae huli sa hararom an pagkagamot na paghinanakit na natipon sa nag-aging mga taon. “Alagad,” an sabi nia, “resulta man iyan kan kawaran nin komunikasyon kan mag-agom kun napapaatubang sa mga krisis.”

Sa pagretiro nia, an sarong agom na lalaki tibaad masorpresa na sana kun itao sa saiya kan saiyang agom an notisya nin pagdiborsio. Sa laog nin dakol na taon an mag-agom tibaad dai nag-oolay kun ano an namamatean ninda sa lambang saro. An  mag-agom tibaad nagmaigot man na ipahayag an saindang namamatean alagad dai ninda nahimong papagdanayon na positibo an pag-oolay. Imbes na mas mapadayupot an relasyon, sinda paorootrong nagkakaigwa nin mga argumento.

Paano maaatubang kan mag-agom an saindang mga dai pagkaintindihan sa matoninong na paagi asin ikakapahayag an saindang mga saboot sa marahay na paagi? Tibaad interesado kamong maaraman na an pinakapraktikal na mga suhestion manonompongan, bakong sa bagong libro na isinurat nin sarong parahatol sa mag-agom, kundi sa sarong suanoy na libro na pinahalagahan sa laog nin dakol na siglo​—⁠an Biblia.