Mga Milagro—Totoo o Eroestorya?

TOLOS na narisa kan lalaki an istiker sa bamper kan minaaging kotse, “Nangyayari an mga Milagro​—Hapota na Sana an mga Anghel.” Maski ngani sarong tawo na relihioso, dai sia segurado kun ano an kahulogan kaini. An istiker daw nangangahulogan na an nagmamaneho naniniwala sa mga milagro? O iyan daw, sa katunayan, sarong pasubang paagi nin pagsabi nin kawaran nin paniniwala sa mga milagro sagkod sa mga anghel?

Tibaad magkainteres kamo sa komento kan Aleman na autor na si Manfred Barthel: “An milagro sarong termino na tolos na minapabanga sa mga parabasa sa duwang magkakontrang kampo.” Kombensido an mga naniniwala sa mga milagro na nangyayari an mga iyan asin tibaad nangyayari nin parate. * Halimbawa, ibinareta na sa Grecia durante kan nakaaging pirang taon, hiningako kan mga naniniwala na an mga milagro nangyayari nin mga sarong beses kada bulan. Ini an dahelan kaya an sarong obispo kan Iglesiang Ortodokso nin Grecia nagpatanid: “An mga naniniwala may tendensiang mansayon na garo tawo an Dios, si Maria, asin an mga santo. An mga naniniwala maninigo na dai man pakasobra.”

An paniniwala sa mga milagro bakong gayong lakop sa nagkapirang ibang nasyon. Oyon sa sarong surbey kan Allensbach na ipinublikar sa Alemania kan 2002, ibinibilang kan 71 porsiento kan mga siudadano kaiyan na an mga milagro eroestorya sana, bakong totoo. Minsan siring, kabilang sa kulang pa sa un-tersio na talagang naniniwala sa mga milagro an tolong babae na naghihingakong nag-ako nin sarong mensahe hale ki Birhen Maria. Nagkapirang bulan pakatapos na magpaheling daa si Maria sa sainda​—na may kaibang mga anghel asin sarong salampati​—an peryodikong Aleman na Westfalenpost nagbareta: “Sagkod ngonyan mga 50,000 na peregrino, mga tawong naghahanap nin pagpaomay, saka mga nag-uusyoso an biyong nagkainteres sa mga bisyon na naheling kan mga babae.” May 10,000 pang linalaoman na maburunyog sa baryong iyan tanganing maheling si Maria kun sia magpaheling liwat. An kaparehong mga pagpaheling kan Birhen Maria sinasabing nangyari sa Lourdes, Pransia, kan 1858, asin sa Fatima, Portugal, kan 1917.

Kumusta Man an mga Relihion na Bakong Kristiano?

An paniniwala sa mga milagro manonompongan sa haros gabos na relihion. An The Encyclopedia of Religion nagpapaliwanag na an mga kagpundar kan Budismo, Islam, asin Kristianismo igwa nin laen-laen na punto de vista sa mga milagro, alagad nagkokomento iyan: “An suminunod na kasaysayan kan mga relihion na ini malinaw na nagpapatunay na an mga milagro asin mga estorya dapit sa milagro mahalagang kabtang na kan relihiosong buhay nin tawo.” An reperensiang ini nagsasabi na “an Buda mismo kun beses naggigibo nin mga milagro.” Sa huri, kan an “Budismo ibinalyo sa Tsina, an mga misyonero kaiyan parateng napipiritan na magpaheling nin milagrosong mga kapangyarihan.”

Pakatapos na sambiton an nagkapira kan siring na sinasabing mga milagro, an ensiklopedyang iyan nagkonklusyon: “Tibaad bakong andam an saro na tubodon an gabos na estoryang ini nin mga  milagro na isinaysay kan relihiosong mga biograpo, alagad daing duda na isinaysay iyan na may marahay na intension na pamurawayon an Buda, na iyong nagtao sa saiyang maigot na mga parasunod nin siring na milagrosong kapangyarihan.” An iyo man sanang autoridad nagsasabi dapit sa Islam: “An mayoriya kan Islamikong komunidad dai noarin man nagpondo sa paghalat nin mga milagro. Si Muhammad ilinaladawan sa mga tradisyon (hadīths) na naggibo nin mga milagro sa publiko sa dakol na pangyayari. . . . Dawa pagkagadan ninda, may paniniwala na an mga santo naggigibo nin mga milagro sa sadiri nindang mga lolobngan para sa mga maimbod, asin sinserong inaarang an saindang pakimaherak para sa iba.”

Kumusta Man an mga Milagro sa Kristianismo?

An dakol na nag-ako sa Kristianismo nababanga sa saindang mga opinyon. An nagkapira nagtutubod na totoo an mga isinaysay sa Biblia manongod sa mga milagro na ginibo ni Jesu-Cristo o kan mga lingkod nin Dios kan mga panahon bago kan mga Kristiano. Pero, dakol an minaoyon sa Protestanteng Repormador na si Martin Luther. An The Encyclopedia of Religion nagsasabi manongod saiya: “Si Luther sagkod si Calvin nagsurat na an panahon nin mga milagro tapos na asin maninigo na dai na pag-asahan na mangyayari pa an mga iyan.” An Iglesia Katolika padagos na naniniwala sa mga milagro “na dai pinagmamaigotan na ipaliwanag kun paano iyan nangyari,” an sabi kan reperensiang ini. Minsan siring, “naniniwala an intelektuwal na komunidad nin mga Protestante na an pag-otob sa Kristianismo sa pangenot depende sa moralidad asin na an Dios ni an espirituwal na kinaban dai nakikikomunikar sa o iniimpluwensiahan an totoong buhay nin tawo sa ano man na dakulang kabtang.”

An ibang naghihingakong Kristiano, kaiba an nagkapirang klerigo, nagdududa na totoo an mga milagro na nasambitan sa Biblia. Kuanon tang halimbawa an pangyayari manongod sa naglalaad na palongpong na isinaysay sa Biblia sa Exodo 3:1-5. Nagpapaliwanag an librong What the Bible Really  Says na dakol na teologong Aleman an dai naniniwala na ini literal na salaysay nin sarong milagro. Imbes, iniinterpretar ninda ini bilang “sarong simbolo kan panlaog na pakikipaglaban ni Moises sa mga tudok asin naglalaad na pagkaribok nin konsensia.” Idinugang pa kan libro: “An kalayo puede man na mansayon bilang mga burak na biglang buminukad sa liwanag kan saldang kan presensia nin Dios.”

Tibaad dai nakakakontento para sa saindo an siring na paliwanag. Kaya, ano an maninigo nindong paniwalaan? Realistiko daw na maniwala na an mga milagro nangyari kasuarin man? Asin kumusta man an mga milagro sa presenteng aldaw? Mantang dai niato puedeng hapoton an mga anghel, siisay an puedeng hapoton niato?

An Punto de Vista kan Biblia

Mayo nin siisay man na makakadehar na isinasaysay kan Biblia na kaidtong nakaaging mga aldaw an Dios kun beses nag-iinterbenir tanganing gumibo nin mga bagay na garo baga imposible kun sa tawo. Dapit saiya, mababasa niato: “Ilinuwas mo an saimong banwaan na Israel sa daga nin Egipto, paagi sa mga tanda asin sa mga milagro asin sa makosog na kamot asin sa unat na takyag patin sa dakulang kangirhatan.” (Jeremias 32:21) Imahinaron nindo, an pinakamakapangyarihan na nasyon kan kaaldawan na iyan ibinaba paagi sa sampulong damat na ipinadara nin Dios, kaiba an pagkagadan kan mga panganay kaiyan. Tunay nanggad na mga milagro iyan!​—Exodo, kapitulo 7 sagkod 14.

Pakalihis nin dakol na siglo, an apat na kagsurat kan Ebanghelyo isinaysay an mga 35 milagro na ginibo ni Jesus. Sa katunayan, isinusuherir kan saindang mga tataramon na naggibo sia nin mas dakol pa nganing gibo na lihis sa natural kisa kan mga isinaysay ninda. An mga isinaysay daw na ini totoo o eroestorya? *​—Mateo 9:35; Lucas 9:11.

Kun totoo an hinihingako kan Biblia​—na Tataramon nin Dios nin katotoohan​—kun siring igwa kamo nin malinaw na dahelan na maniwala sa mga milagro na isinasabi kaiyan. An Biblia malinaw sa pagsaysay na an mga milagro nangyari kan nakaaging mga panahon​—milagrosong mga pagpaomay, mga pagkabuhay liwat, asin mga kapareho kaiyan​—pero malinaw man na ipinapaliwanag kaiyan na dai na nangyayari an siring na mga milagro. (Helingon an kahon na “Kun Taano ta May mga Milagro na Dai Na Nangyayari,” sa pahina 4.) Kaya nangangahulogan daw ini na dawa an mga nagtutubod na totoo an Biblia naniniwala na daing basehan an mga milagro sa presenteng aldaw? Pasimbagon niato an masunod na artikulo.

[Mga Nota sa Ibaba]

[Kahon sa pahina 4]

KUN TAANO TA MAY MGA MILAGRO NA DAI NA NANGYAYARI

Nasasambitan sa Biblia an manlaenlaen na klase nin milagro. (Exodo 7:19-21; 1 Hade 17:1-7; 18:22-38; 2 Hade 5:1-14; Mateo 8:24-27; Lucas 17:11-19; Juan 2:1-11; 9:1-7) An dakol sa mga milagrong ini nagpangyaring mamidbid si Jesus bilang an Mesiyas, asin nagpatunay iyan na yaon sa saiya an pagsuportar nin Dios. An enot na mga parasunod ni Jesus nagpaheling nin milagrosong mga balaog, siring kan pagtaram nin laen-laen na tataramon asin pakamansay sa ipinasabong na mga tataramon. (Gibo 2:5-12; 1 Corinto 12:28-31) An siring na milagrosong mga balaog napakinabangan kan Kristianong kongregasyon kan nagpopoon pa sana iyan. Taano man?

Bueno, pipira sana an mga kopya kan Kasuratan. Sa parate, an mga mayaman sana an igwa nin ano man na klase nin balumbon o libro. Sa paganong mga nasyon, dai aram an manongod sa Biblia o sa Autor kaiyan, si Jehova. An Kristianong katokdoan kaipuhan na ipaabot paagi sa berbal na komunikasyon. An milagrosong mga balaog kapakipakinabang sa pagpaheling na ginagamit nin Dios an Kristianong kongregasyon.

Alagad ipinaliwanag ni Pablo na an mga balaog na ini mawawara na oras na dai na iyan kaipuhan. “Baga man igwang mga balaog nin paghula, iyan hahaleon; baga man igwang mga tataramon, iyan maontok; baga man igwang kaaraman, iyan hahaleon. Huli ta kita igwa nin kadikit na kaaraman asin kita naghuhula nin kadikit; alagad kun an sangkap dumatong na, idtong kadikit hahaleon.”​—1 Corinto 13:8-10.

Ngonyan, an mga tawo may mga Biblia, saka mga konkordansia asin ensiklopedya. Labing anom na milyon na sinanay na Kristiano an nagtatabang sa iba na makua an kaaraman manongod sa Dios basado sa Biblia. Huli kaini, dai na kaipuhan an mga milagro tanganing patotoohan na si Jesu-Cristo an ninombrahan nin Dios na Paraligtas o tanganing magtao nin prueba na sinusuportaran ni Jehova an saiyang mga lingkod.