Mga Hapot Hale sa mga Parabasa

Paano nangyari na nadutaan ni Samson an mga bangkay kan mga ginadan nia asin nagdanay pa man giraray siang Nazareo?

Sa suanoy na Israel, an sarong indibiduwal puedeng boluntaryong maggibo nin promesa asin magin Nazareo sa laog nin sarong depinidong lawig nin panahon. * An saro sa mga restriksion sa saro na naggigibo kan promesang ini nagsasabi: “Sa gabos na aldaw kan saiyang pagdadanay na siblag para ki Jehova dai sia marani sa siisay man na gadan na kalag. Dawa huli sa saiyang ama o saiyang ina o saiyang tugang na lalaki o saiyang tugang na babae dai sia mapadigta kun sinda magadan.” Paano kun may saro na “biglang nagadan sa kataed nia”? An siring na dai tinutuyong pagkaduta sa bangkay magpaparamog sa saiyang pagigin Nazareo. Huli kaini, sinabi: “An naenot na mga aldaw dai ibibilang.” Kaipuhan na gibohon nia an seremonya nin pagdalisay asin ponan giraray an peryodo nin pagigin Nazareo.​—Bilang 6:6-12.

Pero, si Samson sarong Nazareo sa laen na sentido. Bago mamundag si Samson, sinabihan kan anghel ni Jehova an saiyang ina: “Uya! ika magbabados, asin ika mangangaki nanggad nin sarong aking lalaki, asin mayong labaha na maagi sa saiyang payo, huli ta an aki magigin Nazareo nin Dios pagluwas sa tulak; asin sia an mangengenot sa pagliligtas sa Israel sa kamot kan mga Filisteo.” (Hokom 13:5) Si Samson dai naggibo nin promesa nin pagigin Nazareo. Sia Nazareo paagi sa pagnombra nin Dios, asin sia magigin Nazareo sagkod na sia nabubuhay. An restriksion na dai magduta sa bangkay bakong aplikado sa kamugtakan nia. Kun aplikado iyan asin dai nia tinutuyong makaduta sa sarong bangkay, paano sia makakapoon giraray nin sarong bilog na buhay na pagigin Nazareo na nagpoon kan sia mamundag? Kun siring, malinaw na an mga kahagadan sa mga Nazareo sa bilog na buhay laen sa nagkapirang paagi kisa sa boluntaryong mga Nazareo.

Isipon nindo an mga togon ni Jehova sa tolong bilog na buhay na Nazareo​—si Samson, si Samuel, asin si Juan na Bautisador​—na nasambitan sa Biblia. Siring sa nasabi na, kahagadan ki Samson na dai pagbologan an buhok nia sa payo. Mapadapit sa ipapangidam nia pa sanang aki​—si Samuel— naggibo si Ana nin promesa: “Itatao ko sia ki Jehova sa gabos na aldaw kan saiyang buhay, asin mayo nin labaha na maagi sa saiyang payo.” (1 Samuel 1:11) Sa kamugtakan ni Juan na Bautisador, an anghel ni Jehova nagsabi: “Dai sia noarin man dapat na uminom nin arak asin nin makosog na inomon.” (Lucas 1:15) Dugang pa, si ‘Juan naggugubing nin  balukag nin kamelyo asin hagkos na anit sa saiyang habayan; an kakanon man nia mga doron asin tangguli.’ (Mateo 3:4) Mayo sa tolong indibiduwal na ini an pinagbotan na dai magrani sa gadan na kalag.

Minsan ngani sarong Nazareo, kabilang si Samson sa mga hokom na pinatindog ni Jehova tanganing iligtas an mga Israelita sa kamot kan mga nananamsam sa sainda. (Hokom 2:16) Asin sa pag-otob sa asignasyon na ini, nakaduta sia sa mga bangkay. Sa sarong pangyayari, ginadan ni Samson an 30 Filisteo asin hinubaan nia an mga ini nin mga gubing. Pagkatapos, inatake nia an mga kaiwal, “na itinatambak an mga tabay sa mga paa sa sarong dakulang pangadan.” Nagkua man sia nin sarong basa-basa pang salang nin asno asin paagi kaiyan ginadan an sangribong lalaki. (Hokom 14:19; 15:​8, 15) Ginibo gabos ini ni Samson na may pag-oyon asin pagsuportar ni Jehova. Inaapod sia kan Kasuratan na tawong may arogan na pagtubod.​—Hebreo 11:32; 12:1.

An mga tataramon daw na binaak ni Samson an sarong leon “siring sa pagbaak nin saro sa ogbon na lalaking kanding” nagsusuherir na usong kaugalean na kan kaaldawan nia an pagbaak nin ogbon na mga kanding?

Mayo nin ebidensia na kan panahon kan mga Hokom sa Israel, uso sa mga tawo an pagbaak nin ogbon na mga kanding. An Hokom 14:6 nagsasabi: “An espiritu ni Jehova naghiro [ki Samson], kaya iyan [an may bunday na ogbon na leon] binaak nia, siring sa pagbaak nin saro sa ogbon na lalaking kanding, asin mayo sia nin ano man na kapot sa saiyang kamot.” An komentong ini posibleng marhay na sarong ilustrasyon.

An pananaram na “iyan binaak nia” puedeng igwa nin duwang kahulogan. Magsalang binaak ni Samson an salang kan leon o minsan paano binaak nia an leon sa mga kalamias kaiyan. Kun an boot sabihon iyo an naenot, kun siring an paggibo kan arog kaiyan sa ogbon na kanding natural sana na kayang gibohon nin tawo. Kun siring kaini, an pagkakaagid nag-iilustrar na para ki Samson an pagdaog sa sarong leon paagi sa kamot arog sana kapasil kan pagdaog sa sarong ogbon na lalaking kanding. Minsan siring, paano kun ginadan ni Samson an leon paagi sa pagbaak sa mga kalamias kaiyan? Kun siring, an komento puedeng saboton bilang pagbabaing sana. An punto kan pagbabaing na ini iyo na an espiritu ni Jehova nagtao ki Samson nin kosog tanganing magibo an sarong gibohon na nagkakaipo nin pambihirang pisikal na kosog. Arin man dian, an pagkokomparar na ilinadawan sa Hokom 14:6 nag-iilustrar na paagi sa tabang ni Jehova, an sarong makosog na leon kayang-kaya ni Samson kun paanong an ogbon na lalaking kanding kayang-kaya kan ordinaryong tawo.

[Nota sa Ibaba]