Bareta kan mga Parabalangibog kan Kahadean

Pinahid nin Dios an Saiyang mga Luha

AN MGA tawong iinooyon an saindang buhay sa mga ley asin prinsipyo ni Jehova binebendisyonan nin dakula. Minsan ngani bakong pirmeng pasil an paggibo kan kinakaipuhan na mga pagliliwat, an tabang asin pamparigon sa boot pasil na makua. (Salmo 84:11) Ipinaheheling ini kan minasunod na eksperyensia hale sa Timog-sirangan na Asia.

Mantang nagbabakasyon, an sarong Saksi na taga Pransia nakipag-olay sa kagsadiri nin sarong tindahan na an ngaran Kim * manongod sa katuyohan ni Jehova para sa daga. Winalatan man nia si Kim nin kopya kan librong Puwede Kamong Mabuhay Sagkod Lamang sa Paraiso Digdi sa Daga. Binabasabasa an libro, naagihan ni Kim an mga tataramon na, “papahidon nia an gabos na luha sa saindang mga mata.” (Kapahayagan 21:4) “An bersikulong ini talagang nagpahiro sa sako,” an nagigirumdoman ni Kim. “Huling naheheling ako na nagngingisi asin nakikiestoryahan sa bilog na aldaw sa tindahan, siisay an makaaaram na pagkapuli ko sa banggi, naghihibi ako sagkod na makatorog?” Ihinahayag an dahelan kan saiyang kamondoan, sinabi nia: “Nakikisaro ako sa sarong lalaki sa laog nin 18 taon na asin bako nanggad akong maogma huli ta habo nia akong pakasalan. Gusto ko na kaidtong taposon an pamumuhay na ini, alagad huling haloy nang nakikisaro sa saiya, mayo ako nin kosog nin boot.”

Sa halipot na panahon pakalihis kaiyan, si Kim nag-ako nin pag-adal sa Biblia sa saro kan mga Saksi ni Jehova na an ngaran Linh. “Gustong-gusto ko nang iaplikar an katokdoan kan Biblia,” sabi ni Kim. “Halimbawa, pinondo ko na an pagsamba sa mga apoon ko, minsan ngani nagbunga ini nin pagtumang kan sakong pamilya. Dugang pa, prinobaran kong ilegalisar an samong pagsasaro, alagad habo kan kasaroan ko. Durante kan masakit na panahon na ini, an Saksing taga Pransia padagos akong pinadarahan nin mga publikasyon sa Biblia, asin pinaririgon na marhay ni Linh an boot ko. An pasensia asin mamomoton na pagsuportar kan mga tugang na babaeng ini nakatabang sa sako na magmaigot sagkod na naheling ko an tunay na pagkatawo kan kasaroan ko. Nadiskobre ko na igwa na sia nin 5 ‘agom’ asin 25 aki! Nagtao ini sa sako kan kosog nin boot na bayaan sia.

“An paghale sa sarong dakulang komportableng harong pasiring sa sarong sadit na apartment bakong pasil. Orog pa dian, an dati kong kasaroan pinirit ako na makisaro liwat sa saiya, na naghuma pa ngani na raraoton an sakong lalauogon paagi sa asido kun magsayuma ako. Sa tabang ni Jehova, nagibo ko an tama.” Si Kim nagpadagos sa pag-oswag asin sa katapustapusi nabautismohan kan Abril 1998. Saro pa, an duwa sa saiyang mga tugang na babae asin an saiyang tinedyer na aking lalaki nagpoon nang makipag-adal sa Biblia sa mga Saksi ni Jehova.

“Kaidto iniisip ko na an sakong buhay danay nang mayo nin paglaom,” sabi ni Kim. “Minsan siring, ngonyan maogma na ako, asin dai na ako naghihibi sa banggi. Pinahid na ni Jehova an mga luha sa sakong mga mata.”

[Nota sa Ibaba]