TEMA SA COVER | TAANO TA SI JESUS NAGSAKIT ASIN NAGADAN?
Nangyari Daw Talaga Iyan?
Kan tigsuli (spring) nin 33 C.E., ipinagadan si Jesus na Nazareno. Daing basehan siyang inakusaran nin sedisyon, binugbog na gayo, asin ipinako sa harigi. Makulugon an pagkagadan niya. Pero binuhay siya liwat nin Diyos, asin pakalihis nin 40 aldaw, suminakat sa langit.
An pambihirang pagkasaysay na ini mababasa sa apat na Ebanghelyo kan Kristiyanong Griegong Kasuratan, na mas midbid sa apod na Bagong Tipan. Nangyari daw talaga iyan? Mahalaga asin kaipuhan na masimbag an hapot na ini. Ta kun dai iyan nangyari, magigin sayang sana an pagtubod kan mga Kristiyano asin magigin pangarap na sana an buhay na daing sagkod sa Paraiso. (1 Corinto 15:14) Pero, kun talagang nangyari iyan, may magayon na paglaom na naghahalat sa katawuhan, pati na sa saimo. Kaya an hapot, totoo daw o imbento sana an mga nakasurat sa Ebanghelyo?
BASE SA MGA KATUNAYAN
Bakong arog kan mga alamat na imbento sana, maririsa na tama sagkod sa pinakasadit na detalye an mga nakasurat sa Ebanghelyo. Halimbawa, dakul na lugar an nasambitan diyan na dawa ngunyan puwede ta pang madumanan. May nasambit man diyan na mga tawong nabuhay kaidto, na pinatunayan kan sekular na mga historyador na talagang nag-eksister.—Lucas 3:1, 2, 23.
Nasambit man si Jesus kan sekular na mga parasurat kaidtong inot asin ikaduwang siglo. * An detalye sa Ebanghelyo dapit sa paggadan sa saiya pareho kan pagpadusa kaidto kan mga Romano sa mga nasentensiyahan nin kagadanan. Dugang pa, totoo asin prangka an pagkasaysay kan mga pangyayari—na iniistorya pati an mga nagin kaluyahan kan mga disipulo ni Jesus. (Mateo 26:56; Lucas 22:24-26; Juan 18:10, 11) Pinapatunayan nanggad kan gabos na ini na an mga kagsurat kan Ebanghelyo onesto asin maimbod sa isinurat ninda manungod ki Jesus.
TOTOO MAN DAW AN PAGKABUHAY LIWAT NI JESUS?
Iyo, dakul an naniniwala na talagang nabuhay asin nagadan si Jesus, pero may mga nagkukuwestiyon kun talagang nabuhay siya liwat. Maski ngani an saiyang mga apostol dai tulos nagtubod sa bareta na nabuhay siya liwat. (Lucas 24:11) Pero nahali an gabos nindang pagduda, kan mahiling ninda asin kan iba pang mga disipulo an binuhay liwat na si Jesus sa iba-ibang pagkakataon. Sa katunayan, may pagkakataon na labing 500 an nakahiling sa saiya.—1 Corinto 15:6.
Dawa puwede sindang arestaron asin ipagadan, daing takot na ibinareta kan mga disipulo ni Jesus sa gabos an dapit sa pagkabuhay niya liwat—pati na sa mga nagpagadan mismo saiya. (Guibo 4:1-3, 10, 19, 20; 5:27-32) Dakul na disipulo idto! Magigin arog daw kaiyan kakusog an buot ninda kun dai man talaga sinda sigurado na nabuhay liwat si Jesus? Sa katunayan, an pagkabuhay liwat ni Jesus an dahilan kaya dakula an nagin impluwensiya kan Kristiyanismo sa kinaban kaidto asin ngunyan.
Iyo, talagang masasarigan asin lehitimo an rekord kan Ebanghelyo dapit sa pagkagadan asin pagkabuhay liwat ni Jesus. Kun maingat mong babasahon iyan, makukumbinsir ka na talagang nangyari an mga iyan. Mas makusog pa an saimong pagtubod kun masasabutan mo kun taano ta nangyari iyan. Ipapaliwanag iyan sa masunod na artikulo.
^ par. 7 Si Tacito, na namundag kan mga 55 C.E., nagsurat: “Si Christus, kun sain kinua an apod na [mga Kristiyano], nagsapo kan grabeng pagpadusa kaidtong panahon ni Hading Tiberio sa kamot kan saro sa mga prokurador na si Poncio Pilato.” Sinambit man si Jesus ni Suetonio (kan inot na siglo); kan Judiong historyador na si Josephus (kan inot na siglo); asin ni Pliny the Younger na gobernador kan Bitinia (sa kapinunan kan ikaduwang siglo).
