1-3. (a) Anong mga pagbabago an tibaad magin masakit para sa sato na gibuhon pagkatapos na kita mabawtismuhan? (b) Kun mas masakit para sa sato na umuswag kisa sa linalauman ta, ano an tibaad maihapot niyato? (Hilingon an mga ritrato sa itaas.)

KAN manudan ni Kevin ^[1] an katotoohan, gustong-gusto niyang magkaigwa nin haraning relasyon ki Jehova. Pero, dakul na taon na siyang nagsusugal, nagsisigarilyo, nagbuburat, asin nagdodroga. Tanganing makamtan an pag-uyon nin Diyos, dapat niyang ipundo an mga gibong ini na bakong suno sa Kasuratan. Nagibo niya ini paagi sa pagsarig ki Jehova asin sa nakakapabagong puwersa kan Saiyang nasusurat na Tataramon.—Heb. 4:12.

² Pagkatapos na siya mabawtismuhan, nagpundo na daw si Kevin sa paggibo nin mga pagbabago sa saiyang buhay? Dai, huling kaipuhan pa man giraray niyang pauswagon asin dalisayon an saiyang Kristiyanong mga kuwalidad. (Efe. 4:31, 32) Halimbawa, nabigla siya na dipisil palan para sa saiya na kontrulon an pagigin niyang arangguton. Sinabi ni Kevin, “An totoo, mas madali pang ipundo an dati kong mga bisyo kisa sa  kontrulon an init kan payo ko!” Pero nagibo ni Kevin an kinakaipuhan na mga pagbabagong ini paagi sa udok sa buot na pagpamibi asin maingat na pag-adal sa Bibliya.

³ Arog ni Kevin, dakul sa sato an kinaipuhan na gumibo nin dakulang mga pagbabago bago nagpabawtismo tanganing maiuyon an satong buhay sa panginot na mga kahagadan kan Bibliya. Pagkatapos kan satong bawtismo, nahiling niyato na kaipuhan ta pang padagos na gumibo nin mga pagbabago—saradit na pagbabago—tanganing mas maarog ta an Diyos asin si Cristo. (Efe. 5:1, 2; 1 Ped. 2:21) Halimbawa, tibaad narisa niyato na mareklamo kitang marhay, natatakot kita sa tawo, may tendensiya kitang magpalakop nin nakakaraot na tsismis, o iba pang mga kaluyahan. Mas masakit daw para sa sato na gumibo nin saradit na pagbabago kisa sa linalauman ta? Kun iyo, tibaad maihapot mo: ‘Nagibo ko na an dakulang mga pagbabago, taano ta masakiton para sa sako an saradit na pagbabagong ini? Ano an puwede kong gibuhon tanganing padagos na mabago kan Bibliya an sakong buhay?’

4. Taano ta dai niyato nagigibong mapaugma si Jehova sa gabos na panahon?

⁴ Kita na mga namidbid asin namumutan si Jehova, bilog na pusong nagmamawot na gibuhon an mga nakakapaugma sa saiya. Pero, gurano man kakusog kan pagmawot na iyan, dai niyato nagigibong mapaugma an Diyos sa gabos na panahon huli sa satong pagkabakong perpekto. An sitwasyon niyato arog kan ki apostol Pablo, na nagsurat: “Yaon sa sako an pagmawot na gibuhon an marahay pero mayo an kakayahan na isagibo iyan.”—Roma 7:18, NW; Sant. 3:2.

5. Anong mga pagbabago an ginibo na niyato bago kita nagpabawtismo, pero anong mga kaluyahan an tibaad padagos pa niyatong pinaglalabanan?

⁵ Hinali na niyato an makasalan na mga gibo na magigin dahilan na dai na kita kuwalipikadong magin miyembro kan Kristiyanong kongregasyon. (1 Cor. 6:9, 10) Pero, bako pa kitang perpekto. (Col. 3:9, 10) Kaya, bakong realistiko na lauman na pagkatapos kan bawtismo—o dawa pakalihis nin dakul na taon sa katotoohan—nungka na kitang masasala, madidisganar, o magkakaigwa nin salang mga motibo asin tendensiya. May mga tendensiya na tibaad magdanay sa sato sa laog nin dakul na taon.

6, 7. (a) Taano ta puwede kitang magin katuod ni Jehova dawa bako kitang perpekto? (b) Taano ta dai kita dapat mag-alangan na maghagad nin tawad ki Jehova?

⁶ An minana niyatong pagkabakong perpekto dai dapat makaulang sa sato na magin katuod ni Jehova o padagos na makapaglingkod sa saiya. Pag-isipan ini: Kan irani kita ni Jehova para magin katuod niya, aram niya na may mga panahon na masasala kita. (Juan 6:44) Huling aram ni Jehova an satong karakteristiko asin an laog kan satong puso, siguradong aram niya kun anong salang pagmawot an nakakapasakit sa sato. Asin aram niya na kun minsan magkakasala kita. Pero, dai ini nakaulang para dai kita akuon ni Jehova na magin mga katuod niya.

⁷ Huli sa pagkamuot ni Jehova sa sato, tinawan niya kita nin sarong mahalagang marhay na regalo—an atang na pantubos kan saiyang namumutan na Aki. (Juan 3:16) Kun may pagsulsol niyatong hahagadon ki Jehova an kapatawadan kan satong mga kasalan basado sa daing kaagid an halaga na probisyon na ini, makakapagtiwala kita na magdadanay kitang katuod Niya. (Roma 7:24, 25; 1 Juan 2:1, 2) Dapat daw kitang mag-alangan na aprobetsaran an mga pakinabang kan pantubos huling pagmati ta maati o makasalan kita? Siyempre dai! Garo iyan pagsayumang maggamit nin tubig para hanawan an satong maating kamot. Iyo, itinao an pantubos para sa nagsusulsol na mga nagkasala. Kaya, salamat nanggad sa pantubos ta huli kaiyan puwede kitang magin katuod ni Jehova dawa bako kitang perpekto.—Basahon an 1 Timoteo 1:15.

8. Taano ta dai niyato dapat baliwalaon an satong mga kaluyahan?

⁸ Siyempre, dai niyato dapat basta baliwalaon na sana an satong mga kaluyahan. Tanganing magin  katuod kita ni Jehova, dapat kitang padagos na maghinguwang mas maarog siya saka si Cristo asin magin an klase nin tawo na inaako Niya. (Sal. 15:1-5) Dapat man niyatong pagmaigutan na kontrulon an satong salang mga pagmawot, o halion pa ngani iyan kun posible. Baga man bago pa sana kitang mabawtismuhan o haloy na sa katotoohan, dapat “padagos [kitang] . . . gumibo nin kinakaipuhan na mga pagbabago.”—2 Cor. 13:11, NW.

9. Taano ta masasabi niyato na puwede kitang padagos na magsulot nin bagong personalidad?

⁹ Kaipuhan an padagos na paghihinguwa tanganing ‘magibo an kinakaipuhan na mga pagbabago’ asin maipahiling an “bagong personalidad.” Ipinagirumdom ni Pablo sa mga kapagtubod: “Tinukduan kamo na halion an luma nindong personalidad na kauyon kan dati nindong paggawi asin na urog pang ginigibong maraot paagi kan mapandayang mga kamawutan kaiyan. Asin dapat na padagos nindong baguhon an paagi kan saindong pag-iisip, asin isulot an bagong personalidad na linalang sigun sa kabutan nin Diyos, kauyon kan tunay na katanusan asin kaimbudan.” (Efe. 4:22-24, NW) An mga tataramon na “padagos nindong baguhon” nagpapahiling na an pagsulot nin bagong personalidad sarong nagpapadagos na proseso. Nakakapakusog ini sa buot huling sinisigurado kaini sa sato na gurano man kita kahaloy nang naglilingkod ki Jehova, puwede pa niyatong mas mapauswag asin madalisay an satong Kristiyanong mga kuwalidad na minakompuwesto sa bagong personalidad. Iyo, kayang padagos na baguhon kan Bibliya an satong buhay.

10. Ano an dapat tang gibuhon para padagos kitang makagibo nin pagbabago sa tabang kan Bibliya, asin ano an mga puwedeng maihapot niyato?

¹⁰ Dapat kitang maghinguwang marhay kun gusto niyatong padagos na mabago kan Bibliya. Pero taano ta kaipuhan niyato na maghinguwang marhay? Kun binebendisyunan ni Jehova an mga paghihinguwa ta, bakong dapat na mas pasil na sana para sa sato na umuswag sa espirituwal? Taano ta dai na sana halion ni Jehova an satong salang mga tendensiya para magin mas madali para sa sato na maipahiling an Kristiyanong mga kuwalidad?

11-13. Taano ta linalauman ni Jehova na maghihinguwa kitang daugon an mga kaluyahan niyato?

¹¹ Kun iisipon niyato an uniberso, dai nanggad kita maduda na makapangyarihan na marhay si Jehova. Halimbawa, kada segundo, binabago kan saldang an limang milyon na tonelada nin materya kaiyan para magin enerhiya. Dawa dikit sana kaiyan an nakakalagbas sa atmospera kan satong daga, supisyente na iyan para magtao nin tamang init asin liwanag na masustenir sa buhay sa daga. (Sal. 74:16; Isa. 40:26) Nauugma man si Jehova na magtao nin puwersa sa saiyang mga lingkod kun kinakaipuhan. (Isa. 40:29) Iyo, puwede pa ngani kitang tawan nin Diyos nin kusog para madaog an gabos tang kaluyahan asin dai na magkaigwa nin salang mga pagmawot. Pero, taano ta dai niya ginigibo iyan?

¹² Tinawan kita ni Jehova nin daing kapantay na regalong libertad na magdesisyon. Kun pipilion niyato asin hihinguwahon na gibuhon an kabutan nin Diyos, maipapahiling ta an satong hararom na pagkamuot ki Jehova saka an satong pagmawot na mapaugma siya. Maipapahiling man niyato na sinusuportaran ta an saiyang soberaniya. Kinuwestiyon ni Satanas an diretso ni Jehova bilang Soberano, kaya papahalagahan na marhay kan satong mabuot saka mapag-apresyar na Ama sa langit an satong gikan sa buot asin maigot na mga paghihinguwa para suportaran an Saiyang soberaniya. (Job 2:3-5; Tal. 27:11) Pero, kun ginibo ni Jehova na magin pasil sana para sa sato na daugon an salang mga pagmawot para mapaugma siya, magigin daing halaga an ano man na paghihingako niyato na nagin maimbod kita asin sinuportaran ta an saiyang soberaniya.

¹³ Kaya, sinasabi sa sato ni Jehova na gibuhon ta an ‘gabos na kahigusan’ o udok na paghihinguwa para maarog an mga kuwalidad niya. (Basahon an 2 Pedro 1:5-7; Col. 3:12) Linalauman niya na maghihinguwa kita na kontrulon an satong mga iniisip  asin namamatian. (Roma 8:5; 12:9) Kun tunay kitang naghihinguwa na gibuhon ini asin pag nahihiling niyato na padagos na binabago kan Bibliya an satong buhay, magigin mas maugma nanggad kita.

14, 15. Ano an puwede niyatong gibuhon para magkaigwa kan mga kuwalidad na nakakapaugma ki Jehova? (Hilingon an kahon na “ Binago kan Bibliya Asin Pagpamibi an Saindang Buhay.”)

¹⁴ Ano an puwede niyatong gibuhon para maarog an mga kuwalidad ni Jehova asin mapaugma siya? Imbes na magkaigwa nin sadiring pamantayan sa kun ano an kaipuhan niyatong baguhon sa sadiri, kaipuhan tang magpagiya sa Diyos asin padagos na maghinguwang marhay. An Roma 12:2 nagsasabi: “Dai na kamo magpamolde sa sistemang ini nin mga bagay, kundi liwaton an saindong pagkatawo paagi sa pagbago kan saindong isip, tanganing mapatunayan nindo sa saindong sadiri an kabutan nin Diyos na marahay asin akseptable saka perpekto.” (NW) Paagi kan saiyang Tataramon asin banal na espiritu, tinatabangan kita ni Jehova na masabutan an saiyang kabutan, maisagibo iyan, asin mabago an satong buhay sagkod na kaipuhan tanganing maabot an saiyang mga kahagadan. Kaiba dapat sa satong mga paghihinguwa an mga aktibidad na arog kan pagbasa kan Bibliya aroaldaw, paghurop-hurop kaiyan, asin pagpamibi para sa banal na espiritu. (Luc. 11:13; Gal. 5:22, 23) Mantang nagpapagiya kita sa banal na espiritu nin Diyos asin iinuuyon an satong kaisipan sa kaisipan ni Jehova na nasa saiyang Tataramon, mas maaarog niyato siya sa paagi niyato nin pag-isip, pagtaram, asin paghiro. Pero, kaipuhan pa man giraray niyatong padagos na mag-ingat tanganing dai kita madaog kan satong mga kaluyahan.—Tal. 4:23.

¹⁵ Apuwera sa aroaldaw na pagbasa sa Bibliya, kaipuhan man niyatong pag-adalan an Tataramon nin Diyos sa tabang kan satong mga publikasyon sa katuyuhan na maarog an marahayon na mga kuwalidad ni Jehova. Nagin praktikal man sa iba an pagkolekta asin pagrepaso paminsan-minsan nin mga teksto saka artikulo sa Torrengbantayan o Awake!, na makakatabang na marhay na mapauswag an Kristiyanong mga kuwalidad o mapangganahan an mga kaluyahan.

16. Taano ta dai kita dapat pangluyahan nin buot kun garo baga maluway an satong pag-uswag sa espirituwal?

¹⁶ Kun garo baga maluway an pag-uswag mo sa espirituwal, tandaan na nangangaipo iyan nin panahon. An pagpauswag sa espirituwal na mga kuwalidad sarong nagpapadagos na proseso. Mantang hinihinguwa tang padagos na mabago kan Bibliya an satong buhay, dapat kitang magin mapasensiya. Sa primero, tibaad kaipuhanon niyatong puwersahon an satong sadiri na gibuhon an sinasabi kan Bibliya. Pero pag-abot nin panahon, mantang luway-luway niyatong naitatanos an satong kaisipan asin paggawi sa paaging gusto kan Diyos na Jehova, magigin mas madali asin natural na sana para sa sato na gibuhon iyan.—Sal. 37:31; Tal. 23:12; Gal. 5:16, 17.

17. Kun maimbod kita ki Jehova, anong marahayon na puturo an puwede niyatong lauman?

¹⁷ Pag-abot nin panahon, magkakapribilehiyo an maimbod na mga parasamba ni Jehova na magin perpekto asin maglingkod sa saiya sagkod lamang. Sa panahon na iyan, magigin mas madali na para sa sato na maipahiling an mga kuwalidad nin Diyos asin makakapaugma nanggad iyan sa sato. Sa ngunyan, nagpapasalamat kita sa pantubos ta huli kaiyan tinutugutan kitang sumamba sa satong mamumuton na Diyos. Dawa bako kitang perpekto, mapapaugma niyato siya kun padagos tang hihinguwahon na magpabago sa puwersa kan saiyang Tataramon.

18, 19. Paano niyato masisigurado na kaya kan Bibliya na padagos na baguhon an satong buhay?

¹⁸ Si Kevin, na nasambitan sa inutan, ginibo an gabos niyang makakaya para makontrol an pagigin arangguton. Hinurop-hurop niya saka inaplikar an mga prinsipyo sa Bibliya, asin inako niya an tabang saka konseho kan saiyang mga kapagtubod. Pakalihis nin pirang taon, dakula an nagin pagbabago ni Kevin. Pag-abot nin panahon, nanombrahan siyang magin ministeryal na lingkod, asin sa ngunyan, 20 taon na siyang naglilingkod bilang elder sa kongregasyon. Pero, aram niyang kaipuhan niyang padagos na maghinguwang dai magbalik sa dati niyang paggawi.

¹⁹ Ipinapahiling kan eksperyensiya ni Kevin na tinatabangan kan Bibliya an mga lingkod nin Diyos na padagos na makagibo nin positibong mga pagbabago sa saindang buhay. Kaya, padagos niyatong tugutan an Tataramon nin Diyos na baguhon kita asin tabangan kitang magkaigwa nin mas haraning relasyon ki Jehova. (Sal. 25:14) Mantang nahihiling tang binebendisyunan ni Jehova an satong mga paghihinguwa, makakasigurado nanggad kita na kaya kan Bibliya na padagos na baguhon an satong buhay.—Sal. 34:8.