1, 2. Mateo 24:14 qellqat liytʼasajja, ¿kuna jisktʼanakas utjaspa?

JICHHÜRUNAKANJJA, Diosan arunakap yatiyir sartan ukhajj waljaniw istʼapjjestu, yaqhepasti janiw kunsa yatiñ munapkarakiti. Ukampis Jehová Diosan Testigonakapajj utat uta yatiyirit uñtʼatätanwa. Diosan arunakap janis yaqhepajj istʼañ munapkchejja, yatiyktan uk sumwa uñjapjje. Kunjamtï yatktanjja, “Diosan reinopat aka suma yatiyäwisti aka oraqpachanwa yatiyatäni” sasaw Jesusajj arsuwayäna (Mat. 24:14). ¿Kunatsa jiwasaw Jesusan arsutapjja phoqasktan sasin sissna? Ukham sasinjja, ¿jachʼa jachʼat tukusktanjja?

² Walja religionanakaw ‘Diosan suma yatiyäwinakap nanakaw yatiyapjjta’ sasin sapjje. Ukampis jupanakajja, kunjamsa Jesusar uñtʼawayapjje uka toqetakwa parlañ yatipjje. Iglesianakapana, televisionana ukhamarak Internetanakwa Bibliat parlapjje. Yaqhepasti, ‘hospitalanakan doctorata, enfermerata, jan ukajj  profesorat irnaqasaw jaqenakar yanaptʼapjjta’ sasaw sapjje. ‘Ukham lurasasti, Diosan arunakapsa yatiyapkirista ukhamawa’ sasaw sapjjaraki. Ukampis ukham lurasajja, ¿cheqpachapunit Jesusan arunakap phoqasajj jaqenakar yanaptʼasipkpacha?

3. Mateo 28:19, 20 qellqatarjamajja, ¿kuna pusi luräwinaksa Jesusan arkirinakapajj lurapjjañapa?

³ ¿Arkirinakapan ukaru jaqenakajj sarapjjaspa ukti Jesusajj munpachäna? Janiwa. Jiwatat jaktkäna uka qhepatjja, Jesusajj akham sasaw walja arkirinakapar säna: “Taqe akapachankir jaqenakar yatiyir sarapjjam, nayar arkir tukuyapjjam; bautisapjjam [...]. Yatichapjjarakim taqe kuntejj nayajj jumanakar yatichapksma ukanaka phoqhaña” sasa (Mat. 28:19, 20). Jesusan uka arunakaparjamajja, pusi luräwinakwa lurañasa. Uka pusit kimsajj akanakawa: Jaqenakaru Jesusan arkiripar tukuyaña, bautisaña, yatichaña. Ukampis ¿kunsa nayraqatajj lurañasa? Jesusajj sänwa: “Sarapjjam” sasa. Uka toqetjja, Bibliat yatjjattʼat mä jaqejj akham siwa: “‘Sarapjjam’ siski uka arurjamaw taqe cristianonakajj phoqapjjañapa. Ukatakisti inas mä calle khurkataru, jan ukajj lamar qota khurkataru sarapjjañapajj wakischini” sasa (Mat. 10:7; Luc. 10:3).

4. ¿Kunas oraqpachan yatiyasiñapatakejj munasi?

⁴ ¿‘Arkirinakajajja sapa maynis sapakiw chʼamachasipjjani’ sañti Jesusajj munaskäna? Jan ukajj ¿sum wakichtʼasisinwa tamjamajj oraqpachan yatiyapjjani sañcha munpachäna? Mä sapa jaqejja, janiw ‘taqe akapachankir jaqenakarojj’ yatiykaspati, jan ukasti tamjam wali sum wakichtʼasisinakwa oraqpachan yatiyasispa. Ukatwa Jesusajj arkirinakapar ajllkäna ukhajj akham säna: “Jaqe katuri tukuyapjjäma” sasa (Mateo 4:18-22 liytʼañataki). Ukham sasinjja, Jesusajj janiw anzuelor manqʼa uchasa, chawlla katuñatak qontʼaski uka chawlla katurit parlkänti. Jan ukasti, kunjamtï mä qänampi (redempi) chawlla katuñatakejj waljanin yanaptʼapajj munaski uka toqetwa parlaskäna (Luc. 5:1-11).

5. ¿Kuna pusi jisktʼanakarus qhanañchañasa, ukat kunatsa?

⁵ Jichhürunakanjja, ¿khitinakas Jesusan arunakaparjamajj Diosan arunakap yatiyasipki? Uk yatiñatakejja, aka pusi jisktʼanakaruw qhanañchañasa:

• ¿Kuna toqetsa yatiyañasa?

• ¿Kunatsa Diosan arunakap yatiyañasa?

• ¿Kunjamsa yatiyañasa?

• ¿Kawkikamasa ukat kunapachkamas yatiyañasa?

Uka jisktʼanakar qhanañchañajja, jichhürunakan khitinakasa jaqenakar yanaptʼañatakejj chʼamachasisipki uk yatiñatakiw yanaptʼistani. Ukatsti, Diosan arunakap yatiyaskakiñatakis yanaptʼarakistaniwa (1 Tim. 4:16).

6. ¿Kunatsa Jehová Diosan Testigonakapakiw Diosan Reinopat yatiyapjje sasin sissna?

⁶ (Lucas 4:43 liytʼañataki). Jesusajja, “Diosan reinopat” suma yatiyäwinakjja yatiyapunirïnwa, arkirinakapajj uka pachparak lurapjjaspa ukwa jupajj muni. Jichhürunakanjja, ¿khitinakas uka yatiyäwinakjja “taqe markanakan” yatiyasipki? Cheqansa, Jehová Diosan Testigonakapakiw uk lurasipki. Diosan arunakap jan istʼañ munirinakasa, ‘Testigonakakiw Diosan arunakap yatiyapjje’ sasaw sapjje. Amuytʼañataki, walja markanakan misionerot irnaqtʼiri mä sacerdotejja, akham sasaw mä jilatar satayna: “Testigonakarojj sapa markanwa ‘¿kuna toqetsa yatiyapjjta?’ sasin jisktʼirïta. Jupanakasti, jan sum amuytʼasisajj ‘Diosan Reinopatwa yatiyapjjta’ sasin sapjjetäna” sasa. Ukampis uka Testigonakajj janiw jan amuytʼasirïpkänti, jan ukasti cheqpach cristianonakjamajj mä  amtanikïpjjatapwa uñachtʼayasipkäna (1 Cor. 1:10). Jupanakasti, kuna toqettï Yatiyañataki sat revistajj yatiyaski uka toqetarakwa yatiyasipki. Uka revistasti, Yatiyañataki. Jehová Diosan Apnaqäwipat Yatiyaski satawa. Yatiyañataki revistajja, sapa kuti mistki ukhajj niya 59 millón revistanakaw 254 arunakan imprimisi. Oraqpachanjja, uka revistakiw taqe revistanakat sipansa jilpachajj lakirasi.

7. Cristianöpjjtwa sirinakan pʼeqtʼirinakapajj janiw Diosan Reinopat yatiyapkiti sasin ¿kunatsa sistanjja?

⁷ Cristianöpjjtwa sirinakan pʼeqtʼirinakapajj janiw Diosan Reinopat yatiyapkiti. Ukampis uka toqet parlapjje ukhajja, Diosan Reinopajj sapa cristianon chuymapankiwa sasakiw sapjje (Luc. 17:21). Jaqenakarojja, ‘Jesucriston apnaqat alajjpachankir Reinokiw taqe jan waltʼäwinak askichjjani’ sasin janiw yatichapkiti (Apo. 19:11-21). Antisas Navidadana, jan ukajj Semana Santanakwa Jesusat parlapjje. Ukham lurasajja, aka Oraqjjar apnaqkani ukhajj kunsa Jesusajj lurani uk janis yatipkaspa ukhamawa. Kuna toqetsa yatiyapjjañapa ukjja janiw yatipkiti, ukhamïpanwa kunatsa yatiyapjjañapa uk jan amuyapkarakiti.

8. ¿Kuna amtampis Diosan arunakap jan yatiyañasäki?

⁸ ¿Kunatsa yatiyañasa? Diosan arunakapjja, janiw qollqe apthapiñ laykusa ni wali suma utanak utachañ laykus yatiyañasäkiti. Jesusajj akham sasaw arkirinakapar säna: “Taqe akanaksti inakiw lurapjjäta, ukanak lurañataki chʼam inaki katoqapjjatam layku” sasa (Mat. 10:8). Diosan arunakapajj janiw qollqe ganañ amtampi yatiyasiñapäkiti (2 Cor. 2:17). Yatiyirinakajj janiw yatiyatapat qollqe pagatäñ suyapjjañapäkiti (Hechos 20:33-35 liytʼañataki). Uka toqetjja Jesusajj wali qhansa ewjjtʼawaykchïnjja, jila parte religionanakajj qollqe apthapiñataki, jan ukajj iglesiapan qollqe toqet jan aynachtʼañatakiw jukʼamp llakisipjje. Iglesia pʼeqtʼirinakarusa trabajirinakarusa pagapjjañaparakiwa, uka pʼeqtʼirinakat waljanisti wal qamiriptapjjaraki (Apo. 17:4, 5).

9. Diosan arunakapa yatiyasajja, ¿kuna amtampi yatiyapjjatapsa Jehová Diosan Testigonakapajj uñachtʼayapjje?

⁹ Qollqe apthapiñjja, ¿kunjamsa Jehová Diosan Testigonakapajj uñjapjje? Diosan arunakapjja, chuymatpacha yanaptʼir munirinakan yanaptʼapampiw yatiyapjje (2 Cor. 9:7). Tantachasiñ Utanakapansa, jachʼa tantachäwinakapansa janiw qollqejj apthapiskiti. Pasïr maranjja, Jehová Diosan Testigonakapajj 1.930 millón horanakwa yatiyawayapjje, ukatsti sapa phajjsejj 9 millón jila jaqenakaruw Bibliat yatichawayapjjaraki. Taqe ukanakjja, jan kun mayisakiw lurapjje, ukatsti jaqenakarojj qollqepampiw yatichir sarapjje. Kuntï Jehová Diosan Testigonakapajj lurapki uka toqetjja, mä yatjjattʼat jaqejj akham siwa: “Jupanakajja, Diosan arunakap yatiyañataki ukhamarak yatichañatakiw taqe kunat sipansa chʼamachasipjje [...]. Pʼeqtʼirinakapajj janiw qollqe layku pʼeqtʼapkiti, ukhamatwa gastonakapajj jan añchäkiti” sasa. Ukhamasti ¿kunatsa Diosan arunakap yatiytanjja? Jehová Diosaru ukhamaraki jaqenakar munasitas laykuw jan kun mayisaki yatiytanjja. Ukhamatwa Salmo 110:3 ^[1] (liytʼañataki) qellqatan jikjjataski uka profecía phoqtanjja.

10. Jesusasa arkirinakapasa, ¿kunjamsa yatiyapjjäna?

¹⁰ Jesusasa arkirinakapasa, ¿kunjamsa Diosan arunakap yatiyapjjäna? Janiw kawkhantï walja jaqenakajj utjki uka cheqanak yatiyapkänti, jan ukasti taqe cheqanwa yatiyapjjäna.  Utat utsa aski jaqenakarojj thaqhapjjarakïnwa (Mat. 10:11; Luc. 8:1; Hech. 5:42; 20:20). Ukhamatwa taqenir yatiyañ munapjjatap uñachtʼayapjjäna.

11, 12. Yaqha religionanakat sipansa, ¿kunjamsa Jehová Diosan Testigonakapajj yatiyañatak chʼamachasipjje?

¹¹ ¿Kunsa cristianöpjjtwa sirinakajj lurasipki? Jupanakajja, iglesian pʼeqtʼirinakajj pago katoqapki ukanakaruw yatiyapjjañapatak jaytapjje. Ukampis uka pʼeqtʼirinakajj Diosan arunakap yatiyañat sipansa, iglesiapar saririnakajj jan jitheqtapjjañapataki yanaptʼañatakiw jukʼamp chʼamachasipjje. Awisas yatiyapjjañapatak jaqenakar chʼamañchapjjarakiwa. Amuytʼañataki, 2001 mara qalltanjja, Juan Pablo II papajj akham sasaw iglesiankirinakar mä carta qellqäna: ‘Jesusan arunakap yatiyañjja, apóstol Pabljamarakiw uñjapjjañama, jupasti akham sänwa: “Janitejj Diosan arunakap parlkirist ukajja kunakïkaspa nayatakejja”’ sasa. Ukatsti saskakïnwa: ‘Janiw mä qawqha yatjjattʼatanakakejj yatiyapjjañapäkiti, jan ukasti Diosan Markapankirinakajj taqeniw yatiyapjjañapa’ sasa. Mä qawqhanikiw uka arunakarjam lurapjjäna.

¹² Maysa toqetjja, ¿kunsa Jehová Diosan Testigonakapajj lurasipki? ‘Jesucristojj 1914 marat aksaruw apnaqjje’ sasin jupanakakiw yatiyapjje. Jupanakatakejja, Diosan arunakap yatiyañaw taqe kunat sipansa nayranki. Uksti, Jesusan arunakaparjamaw lurapjje (Mar. 13:10). Yatjjattʼat mä warmejj akham sasaw qellqäna: “Jehová Diosan Testigonakapajja, taqe kunat sipansa yatiyañatakiw chʼamachasipjje” sasa. Ukatsti, mä jilatan arunakaparjamajj akham sänwa: “Manqʼat tʼaqhesitanakaru, saparstʼatanakaru, usuntatanakaru jikjjatasajj yanaptʼapjjewa [...]. Ukampis jupanakajja, akapachan tukusiñapata ukhamarak qhespiyasiñajj kunja wakiskirisa uka toqet parlapjjapuniwa” sasa (Pillars of Faith—American Congregations and Their Partners). Jehová Diosan Testigonakapajja, kunjamtï Jesusasa arkirinakapas yatiyapjjerïkäna ukhamarakiw jichhürunakan yatiyasipki.

13. ¿Kawkikamas Diosan arunakapajj yatiyasiñapa?

¹³ Aka qhepa urunakanjja Diosan arunakapajj kawkikamas yatiyasiñapäna uka toqetjja, Jesusajj akham sänwa: “Aka oraqpachanwa yatiyatäni” sasa (Mat. 24:14). Jesusan arkirinakapajj oraqpachanwa utjañapäna (Mat. 28:19, 20). Ukatakejja, Diosan arunakapajj oraqpachanwa yatiyasiñapäna.

14, 15. Jehová Diosan Testigonakapaw Jesusan arunakap phoqhasipki sasinjja, ¿kunatsa sissna? (8 janankir fotonaka uñjjattʼam).

¹⁴ Jesusan arunakaparjamajja, kawkikamas Jehová Diosan Testigonakapajj yatiyasipki uka toqet amuytʼañäni. Estados Unidos markanjja, niya mä millón pä patak waranqa Testigonakaw utji. Ukampis taqpach religionanakansti 600 waranqa pʼeqtʼirinakakiw uka markan utji. Católica Romana Iglesiansti, 400 waranqa peqtʼirinakakiw oraqpachan utji. Jehová Diosan Testigonakapasti, 8 millón ukhaniw  240 markanakan yatiyasipki. Ukham lurasaw Jehová Diosarojj gloria churapjje, jachʼañchapjjaraki (Sal. 34:1; 51:15).

¹⁵ Jehová Diosan Testigonakapajja, janïr akapacha tukuskipanwa taqe jaqenakar yatiyañ muntanjja. Ukatakejja, Bibliat apstʼat qellqatanakajj walja arunakaruw jaqokipasiski, imprimisiraki. Oraqpachanjja janiw khitis ukham lurkiti. Libronakasa, revistanakasa, tratadonakasa waranq waranqaw jaqenakarojj inaki churasi. Jachʼa tantachäwitaki ukhamarak Jesusan jiwäwip amtañataki invitacionanakajj ukhamarakiw waraq waranqa lakirasiwayi. Bibliat apstʼat qellqatanakasa, 700 arunakaruw jaqokipasiwayi. Traducción del Nuevo Mundo de las Santas Escrituras Bibliajja 200 millón jilaw 130 arunakan lurasiwayaraki. Bibliat apstʼat qellqatanakasti pasïr marajj 4.500 millón ukhaw lurasiwayi. Ukatjja Internetansa jw.org cheqajj 750 jila arunakanwa utji. Akapachankir religionanakatjja, janipuniw kawkïris ukham lurkiti.

16. ¿Kunjamatsa Jehová Diosan Testigonakapajj qollan ajayunïpjjatap yattanjja?

¹⁶ ¿Kunapachkamas Diosan arunakapajj yatiyasiñapa? Jesusan arunakaparjamajja, Diosan arunakapajj aka qhepa urunakan yatiyasiskakiñapänwa, ‘ukatsti akapachan tukusiñapaw jutañapäna’. Akapachankir religionanakatjja, ¿kawkïr religionas ukham yatiyaski? Yatiykasin jikjjattan uka jaqenakat yaqhepajj akham sapjjewa: “Jumanakaw yatiyapjjtajja, nanakasti qollan ajayunïpjjtwa” sasa. Ukampis ¿kunatsa jan qarjtasajj sapüru yatiyaskaktanjja? ¿Janit qollan ajayojj yanaptʼkpachïstu? (Hech. 1:8; 1 Ped. 4:14). Awisajja, yaqhep religionanakajj Jehová Diosan Testigonakapjamarakiw Diosan arunakap yatiyañ yantʼapjje, ukampis aynachtʼapjjewa. Yaqhepajja, mä qawqha tiempo yatiyasinjja janiw mayampis yatiyjjapjjeti. Yaqhepasti utat utas yatiyapjjarakiwa, ukampis janiw Diosan Reinopat yatiyapkiti. Ukhamasti janiw kuna toqettï Jesusajj yatiyañ qalltawayki uka toqet yatiyapkiti.

17, 18. 1) Jehová Diosan Testigonakapakiw Diosan Reinopat yatiyasipki sasin ¿kunatsa sistanjja? 2) ¿Khitin yanaptʼapampikis yatiytanjja?

¹⁷ Ukhamasti, ¿khitinakas Diosan Reinopat jichhürunakan yatiyasipki? Jehová Diosan Testigonakapakiw yatiyasipki. ¿Kunatsa ukham sistanjja? Maya, kunatï yatiyasiñapäki uka toqetwa yatiytanjja, mä arunjja Diosan Reinopatwa yatiytanjja. Paya, jaqenakar thaqer sarasaw kunjamtï yatiyasiñapäki ukham yatiytanjja. Kimsa, janiw qollqe ganañ amtampi yatiyktanti, jan ukasti munasiñatwa yatiytanjja. Pusi, oraqpachanwa yatiytanjja, ukhamatwa taqe markanakana ukhamarak kunayman parlani jaqenakaru yatiytanjja. Ukatsti, akapachan tukusiñapkamaw jan qarjtas yatiyaskakiñäni.

¹⁸ Aka qhepa urunakanjja, kunanaktï Jehová Diosan servirinakapajj lurasktan ukajj wali muspharkañawa. ¿Khitin yanaptʼapampikis oraqpachan yatiyasktanjja? Filipos markan jakasiri cristianonakar mä carta qellqkasajja, apóstol Pablojj sänwa: “Diosaw suma amtäwinak churapjjtam, jupa pachparakiw yanapasipktamjja uka lurañanak phoqhañanjja jupan munañaparjama” sasa (Fili. 2:13). Ukhamasti, Jehová Dios awkisajj suma yatiyäwinak yatiyaskakiñatakejj chʼamap churaskakistpan (2 Tim. 4:5).