1. Бистиҥ јаткан ӧйис незиле кайкамчылу?

БИС сӱреен кайкамчылу ӧйдӧ јададыс. Агару Бичиктиҥ судурыла болзо, Иегова бӱгӱнги кӱнде «кара-бајырт улусты... ончо уктардаҥ, ӱйелердеҥ, калыктардаҥ ла тилдердеҥ» јууп јат. Бу «кӱчтӱ албаты» сегис миллионноҥ кӧп ырысту улустаҥ турат. Олор Иеговага «тӱни-тӱжи бажырып јадылар» (Ачыл. 7:9, 15; Иса. 60:22). Олор Иегова Кудайды ла јуугын чыннаҥ сӱӱйдилер. Кижиликтиҥ тӱӱкизинде олордыҥ тоозы качан да мындый кӧп болбогон.

2. Иеговала јуук колбу јок улуста кандый сӱӱш болот? (Јӧрмӧлдиҥ бажындагы јурукты кӧрӱгер.)

² Је Агару Бичикте, бистиҥ ӧйдӧ Кудайла јуук колбу јок улуста чек башка сӱӱш болор деп, база айдылган. Элчи Павел калганчы кӱндерде: «Улус јаҥыс бойын сӱӱр, акчага ӱстӱгер... соот-јыргалды Кудайдаҥ артык сӱӱр» — деп бичиген (2 Тим. 3:1—4). Мындый сӱӱш христиан сӱӱштеҥ чек башка. Кем де јаҥыс бойыныҥ кӱӱнин  бӱдӱрип јӱрзе, ырысту болор деп сананат. Је бу јастыра санаа. Мындый санаадаҥ улам телекей там ла јаҥыс бойын сананар болуп барат. Оныҥ учун мындый улустыҥ ортозында јӱрерге коркышту кӱч болот.

3. Бу јӧрмӧлдӧ бис нени шӱӱп кӧрӧрис, нениҥ учун?

³ Мындый сӱӱштиҥ бӱдӱн телекейге таркап каларын ла христиандарга каршу јетирерин Павел билер болгон. Оныҥ учун ол андый сӱӱштӱ улуска јуукпазын деп кӱӱнзеткен (2 Тим. 3:5). Је мындый улустаҥ јаантайын кыйып јӱрер арга јок. Оныҥ учун бу телекейдиҥ кӱӱн-санаазыла јӱрбеске ле Иегованы, сӱӱштиҥ Кудайын, сӱӱндирерге, нени эдер керек? 2 Тимофейге 3:2—4-тӧги сӱӱшти ле Кудайга јараар сӱӱшти тӱҥдештирип кӧрӧӧктӧр. Бу бойысты шиҥдеп кӧрӧргӧ лӧ чын ырысты экелип турган сӱӱшти кӧргӱзерге, нени солыыр керек деп, оҥдоорго болужар.

4. Бойын ӧйи-кеминде сӱӱринде јаман неме јок деп, нениҥ учун айдарга јараар?

⁴ «Улус јаҥыс бойын сӱӱр». Бу сӧстӧрлӧ Павел бойын чек сӱӱбезин деп айтпаган. Бойын кичееринде ле бойын јарадарында јаман неме јок, карын бойын ӧйи-кеминде сӱӱри тузалу болот. Не дезе анайып бисти Иегова јайаган. Иисус: «Бойыҥды сӱӱгеҥдий, јуугыҥды сӱӱп јӱр» — деп јакарган (Марк 12:31). Бис бойысты сӱӱбей турган болзоос, јуугысты да сӱӱп болбозыс. Агару Бичикте мынайып айдылганы база бар: «Бойлорыныҥ эди-канын чылап, ӧбӧгӧндӧри де ӱйлерин сӱӱр учурлу. Ӱйин сӱӱгени, бойын бойы сӱӱгени ол. Кем де качан да бойыныҥ эди-канын јаман кӧрбӧгӧн. Карын, оны азырайт, кичеейт» (Еф. 5:28, 29). Айдарда, бойын сӱӱр керек, је мындый сӱӱш ӧйи-кеминеҥ ашпас учурлу.

5. Јаҥыс бойын сӱӱген кижи кандый болот деп айдар эдеер?

⁵ Павел 2 Тимофейге 3:2-де бойын ӧйинеҥ ӧткӱре сӱӱри, ӧскӧртӧ айтса јастыра сӱӱри керегинде бичиген. Андый кижи јӱк ле бойы керегинде сананат. (Римдегилерге 12:3 кычырыгар.) Ого бойына ла јакшы болзо, ӧскӧ улус керек те јок. Кандый бир кереги келишпей калза, бойын бурулаардыҥ ордына, улусты бурулайт. Агару Бичик шиҥделген бир научный иште мынайып бичилет: «Јаҥыс бойын сӱӱп турган кижи ёжикке тӱҥдештирилет. Ол болчоктоло берзе, бойына јылу ла јымжак болот, је тышты јанында курч ийнелери чыгып калат». Андый улус чыннаҥ ырысту болбой јат.

6. Кудайды сӱӱгенистеҥ кандый туза аладыс?

⁶ Павел калганчы кӱндерде болотон улустыҥ јаман кылык-јаҥдарын тоолоп турарда, јаҥыс бойын сӱӱрин нениҥ учун эҥ озо бичиген? Библиялык шиҥжӱчилердиҥ кезиги, Павел айткан јаман кылык-јаҥдар јаҥыс бойын сӱӱгенинеҥ башталат, деп айдыжат. Је Кудайды сӱӱген улустыҥ кылык-јаҥы чек башка болот. Агару  Бичикле болзо, Кудайга јарап турган сӱӱш сӱӱнчиле, амырла, узакка чыдажышла, быйанзышла, буурзашла, бӱдӱмјиле, јобожышла, тудунышла колбулу (Гал. 5:22, 23). «Кудайы Иегова болгон албаты ырысту!» — деп, сарнаачы бичиген (Сар. 144:15). Иегова — ырысту Кудай, оныҥ ишчилери де ырысту. Анайда ок бойына ла јакшы болзын деп сананып, јаҥыс бойын сӱӱген улуска кӧрӧ, Иегованыҥ ишчилери улуска јакшыны эдип турганынаҥ сӱӱнчи алат (Ап. ижи 20:35).

7. Кудайды канайып сӱӱп турганысты билип аларга, кандый сурактар болужар?

⁷ Бис бойысты Кудайдаҥ артык сӱӱп баштабаганыс па деп, канайып билип алар? Филиппыдагыларга 2:3, 4-тӧ айдылган сӧстӧрди шӱӱп кӧрӱгер: «Сӧс блаажарга кӱӱнзеп эмезе бийиркеп, нени де этпегер, карын, бойыгар керегинде јобош сананып, ӧскӧ улусты бойыгардаҥ бийик деп бодогор. Кажыгар ла бойындыйын эмес, је кажыгар ла ӧскӧ дӧ улустыйын сананзын». Бойыгардаҥ мынайып сураарга јараар: «Мен бу јӧпти бӱдӱредим бе? Мен Кудайдыҥ табын чыннаҥ ла бӱдӱрерге албаданадым ба? Јуундагы ака-эјелерге ле јарлап турган улузымга болужар арга бедирейдим бе?» Мынайып эдерге јаантайын јеҥил болбой јат. Оныҥ учун бойыстыҥ кӱӱнисти кезикте экинчи јерге јылдырарга келижет. Је мынайда этсебис, Јер-телекейдиҥ Бийин сӱӱндирерис. Мынаҥ артык сӱӱнчи кайдаҥ келет эмеш!

8. Кезик христиандар Кудайды сӱӱп турганынаҥ улам нени эткен?

 ⁸ Кезик христиандар Иегованы сӱӱп турганынаҥ улам јарлаар ишке кӧп туружарга, карьера эдеринеҥ мойногон. Темдектезе, США-да јадып турган Эрика, эмчи болуп иштейт. Ондо ижи јанынаҥ бийик једимдерге једетен арга болгон, је ол пионер болорго шӱӱп алган. Ӧбӧӧниле кожо ол кӧп ороондордо јарлаган. Бойыныҥ јӱрӱмин сананып, мындый сӧстӧр айдат: «Бис ӧскӧ тилдӱ улуска болужадыс, кӧп најыларлу болуп калганыс ла бисте ас эмес јилбилӱ учуралдар болгон. Мынайып јӱрӱмис калас ӧтпӧй јат. Мен эмди де эмчи болуп иштейдим, је кӧп саба ӧйимди ле кӱчимди улусты кӧгӱс јанынаҥ эмдеерге ле јуунга болужарга бередим. Мынаҥ улам мен чыннаҥ ла ырысту».

9. Акчаны сӱӱген улус нениҥ учун ырысту эмес?

⁹ Элчи Павел улус «акчага ӱстӱгер» деп бичиген. Бир канча јыл кайра Ирландиядагы бир пионер эр кижиле куучындашкан. Ол кижи акчакабынаҥ бир канча акчазын чыгарып: «Мениҥ кудайым бу!» — деп айткан. Бӱгӱнги кӱнде кӧп саба улус мынайып ачыгынча айтпай да турган болзо, акчаны ла садып алатан немени сӱӱп јат. Је Агару Бичикте: «Мӧҥӱнди сӱӱп турганы мӧҥӱнге тойбос, акча-јӧӧжӧни сӱӱп турганы кирелтеге тойбос» — деп айдылат (Јарл. 5:10). Андый улуска акчазы јаантайын ла јетпей јат. Олор јӧӧжӧзин там кӧптӧдип, «кӧп кыйын-шырага» тӱшкилейт (1 Тим. 6:9, 10).

10. Јокту ла бай болоры керегинде Агур нени бичиген?

¹⁰ Је бис чек акча јокко јӱрӱп болбозыс. Не дезе, ол бир кезек кору берет (Јарл. 7:12). Је эҥ керектӱзиле јӱрген кижи чыннаҥ ырысту болор бо? Эйе, болор! (Јарлыкчы 5:12 кычырыгар *.) Иакейдиҥ уулы, Агур, Кудайдаҥ мынайып сураган: «Јокту да болбойын, бай да болбойын, је керектӱ курсакты јип турайын». Агурдыҥ јокту јӱрерге кӱӱнзебегенин бис оҥдоп јадыс. Оноҥ ӧскӧ ол уурданып, бойыныҥ Кудайын уйатка тӱжӱрер эди деп, оноҥ ары бичигенинде јартаган. Је кандый шылтактаҥ улам ол бай болорго кӱӱнзебеген? Ол: «Тойынып алып, сенеҥ јана базып: „Иегова ол кем андый?“ — деп айтпайын» деген (Укаа 30:8, 9). Слер де Кудайга эмес, је бойыныҥ байлыгына иженип турган улуска туштаган болорыгар.

11. Иисус акча јанынаҥ кандый јӧп берген?

¹¹ Акчаны сӱӱп турган улус Кудайды сӱӱндирип болбос. Иисус айткан: «Кем де эки бийге јаҥыс уунда јалчы болуп албас: эмезе бирӱзин јаман кӧрӧр, экинчизине дезе карузыыр; эмезе бирӱзине кичеенер, экинчизин дезе керектебес. Кудайга ла акча-јӧӧжӧгӧ теҥ јалчы болуп албазыгар». Анайда ок база айткан: «Бойыгарга јерде јӧӧжӧ јӧӧбӧгӧр, оны кӱйе ле тат јиир, уурчылар казып, уурдап апарар. Карын, бойыгарга теҥериде  јӧӧжӧ јӧӧгӧр, оны кӱйе ле тат јибес, уурчылар казып, уурдап апарбас» (Матф. 6:19, 20, 24).

12. Јӱрӱмди јеҥилтип алза, Иеговага иштейтен кӧп аргалар ачылып турганыныҥ учуралын куучындап беригер.

¹² Јӱрӱмин јеҥилткен улустыҥ кӧбизи бойын ырысту болуп калганын сескен ле Иеговага кӧптӧдӧ иштеп баштаган. Темдектезе, США-да јадып турган Джек јаан туралу ла бизнестӱ болгон. Је ол ӱйиле кожо пионер болуп иштеерге турганынаҥ улам, ончо немени артыргызып салган. Ол эске алат: «Јараш турабысты ла јеристи садып ийерге кӱч болгон. Је иштеги кӱчтердеҥ улам айылыма арыган-чылаган келетеним канча јылдар болуп калган. Је мениҥ пионер болуп турган ӱйим јаантайын сӱӱнчилӱ болгон. Ол айдатан: „Мениҥ иш береечимнеҥ јакшы иш береечи јок!“ Эмди мен де пионер болодым, анайып бис Иеговага кожо иштейдис».

13. Акчага кандый кӧрӱмдӱ болгонысты билерге, биске не болужар?

¹³ Акчага кандый кӧрӱмдӱ болгоныгарды билерге, мындый сурактарга каруу берип кӧрӱгер: «Агару Бичик акча керегинде нени айдып турганына бӱдедим бе ле бӱдӱп турганым керектеримнеҥ кӧрӱнет пе? Кӧп акча иштеп алары јӱрӱмимде баштапкы јерде турат па? Мен акча-јӧӧжӧни Иегова ла улусла најылашканымнаҥ тыҥ баалайдым ба? Иегова мени јеткилдеер деп чыннаҥ бӱдедим бе?» Иегова ого бӱдӱп турган улусты бир де артыргыспас деп, бис алаҥзыбас аргалу (Матф. 6:33).

14. Соот-јыргалдарга кандый кӧрӱмдӱ болор керек?

¹⁴ Элчи Павелдиҥ сӧстӧриле болзо, улус калганчы кӱндерде «соот-јыргалды... сӱӱр». Канайып бойыска ла акчага чын кӧрӱмдӱ болгонында јаман неме јок, анайып ла соот-јыргалдарга ӧйлӱ-кемдӱ болгонында јаман неме јок. Иегова бисти кандый ла соот-јыргалдардаҥ мойноп, ончо неменеҥ кыйып турзын деп айтпай јат. Агару Бичик чындык улусты: «Барып, калашты сӱӱнип ји, кызыл аракыны сӱӱнчилӱ јӱректӱ ич» — деп кычырат (Јарл. 9:7).

15. Улус «соот-јыргалды... сӱӱр» дегени нени темдектейт?

¹⁵ 2 Тимофейге 3:4-тӧ соот-јыргалдарга тыҥ тартылганы Кудайды сӱӱринеҥ аскыртып јат деп айдылат. Бу ӱлгер улус «соот-јыргалды Кудайдаҥ артык сӱӱр» деп кӧргӱзет. Је «артык» дегени улус Кудайды бир эмеш те болзо сӱӱр деп темдектебей јат. Бу ӱлгер аайынча бир шиҥжӱчи мынайып айткан: «Бу ӱлгерде улус Кудайды бир эмеш те болзо сӱӱр деп айдылбай јат. Олор оны чек сӱӱбес деп айдылат». Соот-јыргалдарга тыҥ тартылып турган улуска бу сӧстӧргӧ јаан ајару эдер керек. Агару Бичик мындый улусты «сайрап јӱрери... туй базып койот» деп айдат (Лука 8:14).

16, 17. Иисус соот-јыргалдарга кандый кӧрӱмдӱ болгон?

¹⁶ Соот-јыргалдарга кандый кӧрӱмдӱ болорында Иисус эҥ јакшы тем кӧргӱскен. Ол эки јыргалда болгон  (Лука 5:29; Иоанн 2:1—10). Бир катап Иисус тойго кычырылган, ондо кызыл аракы божой берерде, Иисус кайкал эдип, сууны кызыл аракы эткен. Экинчи учуралда оны улус «јиирин јиди, ичерин ичти» деп айдышкан. Је олорды ӧйи-кемин билбес улус деп, Иисус чике айткан (Лука 7:33—36).

¹⁷ Иисус баштапкы јерге соот-јыргалдарды эмес, је Иегованы тургускан. Анайда ок ол бойын кысканбай улуска болушкан. Улусты ӧлӱмнеҥ аргадаарга, ӧлӱмниҥ тӧҥӧжине кыйналып божоорго белен болгон. Оныҥ изиле барарга турган улуска ол: «Мен учун улуска јаман айттырып, сӱрдӱрип, јабарладып бурулатсагар, кежиктӱ болгоныгар ол. Сӱӱнигер, јыргагар: теҥеридеги кайралыгар улу! Анайып ок слердеҥ озо јӱрген јарлыкчылар да истеткен эди» — деп айткан (Матф. 5:11, 12).

18. Соот-јыргалдарды чын кӧрӱмле кӧрӧдис пе деп билип аларга, кандый сурактар болужар?

¹⁸ Соот-јыргалдарга кандый кӧрӱмдӱ болгонысты билип аларга, нени эдер керек? Бойыгардаҥ сурагар: «Мен баштапкы јерге нени тургузадым: јуунныҥ туштажуларын ла јарлаар ишти бе эмезе соот-јыргалдарды ба? Мен Кудайга иштеерге болуп нени-нени јылыйтарга белен бе? Соот-јыргалды талдап тура, Иегованыҥ кӧрӱмин ајаруга аладым ба?» Бис Кудайды чыннаҥ сӱӱп турган болзоос, јаҥыс ла ого јарабай турган немелердеҥ эмес, је оны ачындырып та ийгедий немелердеҥ кыйып јӱрерис. (Матфей 22:37, 38 кычырыгар.)

19. Кандый улус качан да чыннаҥ ырысту болбос?

¹⁹ Сатананыҥ телекейи 6000 кире јылдыҥ туркунына кыйын-шырада јӱрет. Бис бу телекейдиҥ калганчы кӱндеринде јададыс. Јер јӱк ле акча-манатты, соот-јыргалды ла јаҥыс бойын сӱӱп турган улусла толуп калган. Бисти эбире акча-јӧӧжӧгӧ ачынатып калган ла бойлорыныҥ кӱӱнин баштапкы јерге тургузып турган улус јадат. Олор качан да чыннаҥ ырысту болбос. Сарнаачы бичиген: «Иаковтыҥ Кудайынаҥ болуш алып, Иегова Кудайга иженген кижи ырысту болот» (Сар. 146:5).

20. Кудайды сӱӱп турганыгардаҥ улам слер нениҥ учун ырысту болодыгар деп куучындап беригер.

²⁰ Иегованыҥ ишчилериниҥ Кудайга сӱӱжи јылдаҥ јылга там тыҥыйт. Мындый улустыҥ тоозы кажы ла јыл кӧптӧп јат. Бу Кудайдыҥ Каандыгыныҥ башкарып турганын ла удабас санааска да келбей турган алкыштардыҥ бӱдерин керелейт. Бис Кудайдыҥ табын бӱдӱрип турзаас, Иегованы сӱӱндирип јадыс. Мынаҥ улам чыннаҥ ырысту болодыс. Андый ырыс ӱргӱлјиге улалар! Келер јӧрмӧлдӧ јаҥыс бойын сӱӱри кандый кылык-јаҥдарга экелип турганын ла андый кылык-јаҥдарды ла Иегованыҥ ишчилериниҥ кылык-јаҥдарын тӱҥдештирип кӧрӧрибис.