24 УРОК
Ангелдер олор кемдер, олор нени эдет?
Иегова бисти оныҥ теҥеридеги билезиле таныжып алзын деп кӱӱнзеп јат. Оныҥ билезине ангелдер кирет. Олор «Кудайдыҥ уулдары» деп адалат (Иов 38:7). Агару Бичикте ангелдер керегинде не айдылат? Ангелдер улуска болужат па эмезе каршузын јетирет пе? Ончо ангелдер Кудайдыҥ билезине кирет пе?
1. Ангелдер олор кемдер?
Иегова ангелдерди Јерди јайаардаҥ озо јайаган. Олор Кудай ла чылап теҥериде јӱрет, оныҥ учун улус олорды кӧрбӧй јат (Еврейлерге 1:14). Миллиондор тоолу ангелдер бар. Је олордыҥ кажызы ла башка (Ачылта 5:11). Олор «Иеговага багынып, оныҥ сӧзин бӱдӱрип турган» (Сарын 103:20). Јебрен ӧйдӧ Иегова ангелдерди бойыныҥ ишчилерине јаан учурлу јетирӱ јетирерге ол эмезе болужарга ла корулаарга ийип туратан. Бӱгӱнги кӱнде ангелдер христиандарга Кудайды билип аларга турган улусты таап аларга болужат.
2. Сатана ла кӧрмӧстӧр олор кемдер?
Кезик ангелдер Иеговага чындык артпаган. Тӱймеен кӧдӱрген баштапкы ангел Сатана ла Дьявол деп адалат. Ол бастыра јер-телекейди тӧгӱндеп јат (Ачылта 12:9). Бу ангел, улус ого бажырзын деп кӱӱнзей береле, баштапкы эр ле ӱй кижини бойыныҥ јанына тартып алган. Мынайып, олор Кудайга удура тӱймеен кӧдӱрген. Кийнинде оныҥ тӱймеенине ӧскӧ дӧ ангелдер кожулган. Кудайга удура турган ангелдер кӧрмӧстӧр деп адалат. Оныҥ учун Иегова олорды теҥеридеҥ јердӧӧн сӱрӱп ийген. Удабас олор јоголтылар. (Ачылта 12:9, 12 кычырыгар.)
3. Сатана ла кӧрмӧстӧр бисти канайып тӧгӱндейт?
Сатана улусты спиритизм (демонизм) ажыра тӧгӱндеп јат. Спиритизм — кӧрмӧстӧрлӧ колбу тудары. Кезик улус болуш сурап, астрологторго ло экстрасенстерге баштанат. Кезиги гороскоптор кычырат, оору-јоболынаҥ айрыларга, камдарга ла неме билер улуска баштанат. А кезиги дезе божоп калган улусла куучындажатан арга бар деп бӱдет. Бу ончо неме кӧрмӧстӧрдиҥ тузагы болуп јат. Оныҥ учун Иегова бистерге айдат: «Кӧрмӧстӧрлӧ колбу тудуп турган улуска баштанбагар, неме билер улусла јӧптӧшпӧгӧр» (Левит 19:31). Мынайып, Иегова бисти Сатананаҥ ла кӧрмӧстӧрдӧҥ корулап аларга кӱӱнзеп јат. Нениҥ учун дезе олор Кудайдыҥ ӧштӱлери ле биске каршузын јетирерге албаданат.
ТЕРЕҤЖИДЕ КӦРӰГЕР
Ангелдер улуска канайып болужат, спиритизм кандый каршу јетирет ле Сатананаҥ ла кӧрмӧстӧрдӧҥ коруланарга нени эдер керек деп билип алыгар.
4. Ангелдер улуска Иегова керегинде билип аларга болужат
Кудайдыҥ ангелдери сӱӱнчилӱ јарды улуска бойлоры куучындабай јат. Олор Кудайдыҥ ишчилерине Иегова керегинде билерге кӱӱнзеп турган улусты таап аларга болужат. Ачылта 14:6, 7 кычырып, сурактарды шӱӱжип ийигер:
-
Јарлаарга нениҥ учун ангелдердиҥ болужы керек болот?
-
Ангелдер слерди Агару Бичикти билерге кӱӱнзеп турган кижиге ууландырып ийер аргалу деп билгенеердеҥ слерде кандый сезимдер болот? Јартап беригер.
5. Спиритизмле урушпагар
Сатана ла кӧрмӧстӧр — Иегованыҥ да, бистиҥ де ӧштӱлерис. Лука 9:38—42 кычырып, суракты шӱӱжип ийигер:
-
Кӧрмӧстӧр улуска нени эдер аргалу?
Кӧрмӧстӧрлӧ колбу тудар кӱӱнис јок. Јаҥды такыганы 18:10—12 кычырып, сурактарды шӱӱжип ийигер:
-
Кӧрмӧстӧр биске каршу јетирерге ле бисле колбу тударга кандый эп-аргалар тузаланат? Слердиҥ јерде кандый чӱм-јаҥдар бар?
-
Иегова бисти спитиризмле бир де урушпазын деп токтодып турганы ойгор бо? Јартап беригер.
ВИДЕОНЫ кӧрӱп, сурактарды шӱӱжип ийигер:
-
Канайып сананадаар, Палесаныҥ кызычагыныҥ колына кийдирип берген амуледи олорго каршузын јетирер аргалу болгон бо? Јартап беригер.
-
Кӧрмӧстӧрдӧҥ коруланарга, Палесага нени эдер керек болгон?
Чындык христиандар кӧрмӧстӧрлӧ бир де колбу тутпай јат. Апостолдордыҥ ижи 19:19 ла 1 Коринфтегилерге 10:21 кычырып, суракты шӱӱжип ийигер:
-
Спиритизмле колбулу ончо немени нениҥ учун јоголтор керек?
6. Сатананы ла кӧрмӧстӧрди јеҥип алыгар
Кӧрмӧстӧрди Сатана башкарат, а Кудайга чындык ангелдерди — архангел Михаил (Иисус Христостыҥ база бир ады). Михаилдиҥ ийде-кӱчи канча кире? Ачылта 12:7—9 кычырып, сурактарды шӱӱжип ийигер:
-
Кем кӱчтӱ: Михаил ле оныҥ ангелдери бе эмезе Сатана ла оныҥ кӧрмӧстӧри бе?
-
Христостыҥ ӱренчиктерине Сатананаҥ ла оныҥ кӧрмӧстӧринеҥ нениҥ учун коркыбас керек?
Слер Сатананы ла оныҥ кӧрмӧстӧрин јеҥип алар аргалу. Иаков 4:7 кычырып, суракты шӱӱжип ийигер:
-
Сатананаҥ ла оныҥ кӧрмӧстӧринеҥ канайып коруланар керек?
КЕЗИК УЛУС АЙДАТ: «Кӧрмӧстӧрлӧ колбулу кинолор кӧрӧринде ле ойындар ойноорында јаман неме јок. Мен анайып амырап јадым».
-
Мындый кӧрӱм-санаа неге экелердеҥ айабас?
ТӦС ШӰӰЛТЕЗИ
Кудайга чындык ангелдер биске болужат. Сатана ла оныҥ кӧрмӧстӧри — Иегованыҥ ӧштӱлери. Олор спиритизм ажыра улусты тӧгӱндейт.
Нени билип алдыгар?
-
Ангелдер улуска Иегованы билип аларга канайып болужат?
-
Сатана ла кӧрмӧстӧр олор кемдер?
-
Спиритизмле бир де урушпаска бек сананып алганаар ба? Јартап беригер.
ШИҤДЕЙТЕН МАТЕРИАЛ
Иисус Христос — архангел Михаил деп керелер кӧрӱгер.
Дьявол чын ла бар ба деп билип алыгар.
Кӧрмӧстӧрдӧҥ јайымдалган ӱй кижиниҥ учуралын кычырып алыгар.
«Мен јӱрӱмниҥ учурын таап алгам» («Каруулчы шибее», 1993 јыл, јаан изӱ ай 1)
Спиритизм ажыра Сатана улусты канайып тӧгӱндеп турганын билип алыгар.
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
