LESIONY 17
¿Ximod nac Jesús?
Laʼga guisuidyno ni buny né ni goniʼ Jesús órni goyoʼbu ló Gudxlio, más sasuidyno cualidades ni gacné lóono guibigaxno láabu né guibigaxno Bixiosbu, Jehová. ¿Xí láani ngú toibtica cualidades ni más rioladx buñ? ¿Né xí labúu gonyno par labúu gacno xomod Jesús?
1. ¿Ximod nac Jesús xomod Bixios?
Jesús goyoʼbu lainy guibá por xidal íz, ro bibiʼbu Bixiosbu ni ronladxgoluʼbu, láaca bisuidybu de Bixiosbu. Por ngú ronybu pensary, rasacbu né ronybu xomod Bixiosbu (bíil Juan 5:19). Scú láani, Jesús raslooy cualidades xtuny Bixios, dada goniʼbu: «Ni ma bibiʼ naʼ láaca ma bibiʼ Bixiosa» (Juan 14:9). Por ngú, pal rimbutzaaylo Jesús, láaca simbutzaaylo Jehová. Por ejemplo, mod binladx Jesús buñ, raslooyni mod rasac Jehová por looy.
2. ¿Ximod bislooy Jesús que ronladxbu Bixiosbu?
Jesús goniʼ: «Par gan buñgudxlio que nadxiʼya Bixiosa, roni xomodpa buny mandary Bixiosa naʼ» (Juan 14:31). Órni Jesús goyoʼ ló Gudxlio, bisobbu Bixiosbu ná góc naganni par láabu, modreʼ bislooybu que nadxiʼbu Bixiosbu. Láaca Jesús nigolú bioladx naniʼ de Bixios né ñacnébu stipnés buñ ñac ximig Dios (Juan 14:23).
3. ¿Ximod ma bislooy Jesús que nadxiʼbu buñ?
La Biblia ná que Jesús «nigolú ronladxbu buñgudxlio» (Proverbios 8:31). Bislooybu galnadxiʼ reʼ órni buny animarbu né órni goyoʼbu galrrasaʼ por buñ. Galrradziguiaʼ ni bunybu diti nosi bislooyni xcalnadipbu, láaca bislooyni xcalrronladxbu (Marcos 1:40-42). Gócbu buñ nadaʼa né godabiobu guiránac buñ. Né mod goniʼbu bisialdóbu xcalnabany buñ né bidudyni esperanza buñ ni goniiny nacadiag láabu. Dada gosaguelbu nadudybu ló galrrioʼob né ñaitybu por guiránac buñ, per más ronladxbu guirá buñ ni rasob xcalrrasuidybu (bíil Juan 15:13, 14).
NANOY GUISUIDYNO LÁANI
Guisuidytzayno xipa mod góc Jesús, ganno ximod bislooybu xcalrronladxbu né ximod bidudybu ni gopbu.
4. Jesús nadxiʼbu Bixiosbu
Mod buny Jesús, rasuidyni lóono xipa mod gonladxno Dios. Colgoʼol Lucas 6:12 né láaca Juan 15:10 né 17:26. Órni ma bilox bíilto tigaaga texto reʼ, colgooy xtiitzni:
-
¿Ximod labúu guislooyno que nadxiʼno Jehová xomod buny Jesús láani?
Jesús bislooybu que gondxiʼbu Bixiosbu ni noʼ lainy guibá, né guirá ór goninébu Bixiosbu.
5. Jesús rioʼ galrrasaʼ por buñ ni diti nap ni caquiin
Jesús nigolú goyoʼbu galrrasaʼ por stipnés buñ que por láacabu, dada órni cadzagbu biquiimbu xtiempbu né xfuersbu par gocnébu buñ. Colgoʼol Marcos 6:30-44 né colgooy xtiitzni:
-
Mod ná texto reʼ, ¿ximod goyoʼ Jesús galrrasaʼ por stipnés buñ? (Colguibiʼ ni ná versículos 31, 34, 41 né 42).
-
¿Xigony gocné Jesús guirá buñcu? (Colguibiʼ ni ná versículo 34).
-
Jesús raslooy cualidades xtuny Bixios, guirá ndeʼ ¿xí labúu guisuidyni looy de Jehová?
-
¿Ximod labúu tzoʼno galrrasaʼ por stipnés, mod buny Jesús láani?
6. Jesús radudy ni nap
Ná Jesús diti gop xiroʼ cós, per bidudybu ni gopbu, ndeʼ rasuidy lóono gonyno scúca. Colgoʼol Hechos 20:35 né colgooy xtiitzni:
-
Mod goniʼ Jesús, ¿xí láani rony que guibaladxno?
Colguibiʼ VIDEO reʼ né colgooy xtiitzni:
-
¿Ximod labúu guidudyno ni napno ná diti napno xidal cós?
¿Nanlo ndeʼ la?
La Biblia ná que órni gonyno oración non guiquiinno laa Jesús (colgoʼol Juan 16:23, 24). Órni ronyno láani modreʼ, raslooyno que Jesús racné lóono par labúu gacno ximig Jehová.
TIPNÉS BUÑ NÁ: «Dios diti rioʼ galrrasaʼ órni buñ cadudy ló galrrioʼob».
-
Jesús raslooy xipa mod nac Jehová. Guirá ni buny Jesús, ¿ximod raslooyni que Jehová rioʼ galrrasaʼ por lóono?
¿XÍ BISUIDYLO?
Jesús nadxiʼ Jehová né láaca nadxiʼbu buñ. Jesús nac xomod Bixios, laʼga guimbulo más Jesús láaca simbutzaaylo Jehová.
Repas
-
¿Ximod raslooyno que nadxiʼno Jehová xomod buny Jesús láani?
-
¿Ximod raslooyno que nadxiʼno buñ xomod buny Jesús láani?
-
¿Xí láani más rioladxlo mod nac Jesús?
PAR GANLO MÁS
Bisuidy tipnés cualidades xtuny Jesús ni labúu guisuʼno.
«Guisuʼno mod buny Jesús» (Jesús: nac néz, galnigolú né galnabany, página 317)
Bisuidy xigony rasac guinino laa Jesús órni gonyno oración.
«¿Xigony guiquiinno laa Jesús órni guininéno Dios?» (Guiich ni caniʼ, 1 de febrero íz 2008)
¿Rasetlaa la Biblia xipa mod góc lóo Jesús la?
¿Xí rasuidyno mod godabioo Jesús buñgonaʼ?
«Dios rap respet né rasac buñgonaʼ par láabu» (Guiich ni caniʼ, 1 de septiembre íz 2012)
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
