KON KAY ANO NGA GINHIMO INI NGA PUBLIKASYON

Gin-aaghat ni Jehova nga Dios an iya katawohan nga ‘padayon nga mamiling’ hin pagsabot ngan husto nga pagturotimbang, nga sugad hin namimiling hira hin “nakatago nga mga bahandi.” (Prob. 2:1-5) Karuyag sidngon hini nga kinahanglan maniguro kita pagbiling hin baton ha aton mga pakiana parte ha Biblia ngan hin sagdon parte ha aton personal nga kinabuhi. An Bulig ha Pag-research ginhimo basi buligan ka ha imo pamiling.

Diri nakalista hini nga index an tanan nga topiko nga ginhihisgotan ha aton mga publikasyon. Pero ha tagsa nga topiko nga nakalista, may mga reperensya parte ha bag-o ngan importante nga mga impormasyon nga makikita ha aton inimprinta nga mga publikasyon, mga artikulo ha jw.org, ngan mga video.

KON PAONAN-O MAGTITIKANG PAMILING

An mga reperensya hini nga publikasyon gin-organisar ha duha nga paagi. Una, puydi ka mamiling hin impormasyon uyon ha topiko. An mga main heading nakalista uyon ha pagkasunod-sunod han alpabeto. Ha tagsa nga heading, may mga subheading ngan sub-subheading nga makakabulig ha imo pag-research. Halimbawa, ilarom han DAVID (Hadi) › MGA LEKSYON › KABARAKA, may mga leksyon parte ha kabaraka nga mahibabaroan mo ha kinabuhi ni David.

Ikaduha, may mabibilngan ka nga impormasyon parte ha espisipiko nga mga bersikulo ha Biblia ilarom han mga heading nga gin-organisar uyon ha teksto. An mga bersikulo la nga iginsaysay ha aton mga publikasyon an nakalista.

Para ha dugang nga impormasyon, kitaa ha jw.org an video nga Tutorial ha Paggamit han “Bulig ha Pag-research.”

Hinumdumi nga magkikinahanglan hin panahon ngan pangalimbasog an pamiling hin nakatago nga mga bahandi. Salit magin pasensyoso kon ginbibiling mo an espisipiko nga baton o sagdon nga karuyag mo mahibaroan. Kon mas gin-gagamit mo ini nga Bulig ha Pag-research, magigin mas masayon ngan mas nakaka-enjoy an pagpamiling han impormasyon nga imo kinahanglan. Bibendisyonan ni Jehova an imo mga pangalimbasog ngan bubuligan ka niya nga magkaada kinaadman ngan pagsabot.—Prob. 2:6; 4:5.