2 Tesalonica 2:1-17
2 Pero mga kabugtoan, mahitungod han presensya* han aton Ginoo nga hi Jesu-Kristo ngan han pagtiroka ha aton ngadto ha iya, ginhahangyo namon kamo
2 nga diri dayon malisang o mataranta tungod hin giniyahan nga kapahayagan o hin mensahe nga iginsumat ha iyo o hin surat nga tikang kuno ha amon, nga nasiring nga an adlaw ni Jehova iini na.
3 Ayaw kamo pagpasimang* ha bisan hin-o ha anoman nga paagi, kay ito nga adlaw diri maabot kon diri anay mahitabo an pag-apostasya* ha Dios ngan maibuhayhag an tawo nga matinalapason, an anak han kabungkagan.
4 Parakontra hiya ngan ginpapahitaas an iya kalugaringon labaw ha tagsa nga gintatawag nga “dios” o butang nga ginsisingba, salit nalingkod hiya ha templo han Dios, ngan iginpapahayag* an iya kalugaringon sugad nga dios.
5 Diri ba kamo nahinunumdom nga han kaupod pa ako niyo ginsinumatan ko na kamo hini?
6 Salit maaram na kamo yana kon hin-o an nakakapugong, basi ha itinanda nga panahon na hiya maibuhayhag.
7 Ha pagkamatuod, an misteryo hini nga pagkamatinalapason aktibo na, pero misteryo ini tubtob la ha panahon nga mawara na hiya nga nakakapugong hini.
8 Katapos, ibubuhayhag an tawo nga matinalapason, nga bubungkagon han Ginoo nga hi Jesus pinaagi han gahum nga nagawas ha iya baba* ngan wawad-on gud ha panahon han pagpahayag han iya presensya.
9 Pero an presensya han tawo nga matinalapason impluwensyado ni Satanas, upod an ngatanan nga gamhanan nga buhat ngan buwa nga mga tigaman ngan urusahon nga mga butang,
10 ngan upod an ngatanan nga pagkadiri-matadong basi limbongan an mga mabubungkag, sugad nga sirot kay waray nira karawata ngan higugmaa an kamatuoran basi matalwas unta hira.
11 Salit gintugotan han Dios nga malimbongan hira han sayop basi tumoo hira ha buwa,
12 basi hukman hira ngatanan kay waray hira tumoo ha kamatuoran kondi nalipay lugod ha pagkadiri-matadong.
13 Kondi pirme kami obligado nga magpasalamat ha Dios tungod ha iyo, mga kabugtoan nga hinigugma ni Jehova, kay ginpili kamo han Dios ha tinikangan basi matalwas pinaagi han pagbaraan ha iyo han iya espiritu ngan pinaagi han iyo pagtoo ha kamatuoran.
14 Gintawag kamo niya basi matalwas pinaagi han maopay nga sumat nga amon iginsasangyaw, basi makarawat niyo an himaya han aton Ginoo nga hi Jesu-Kristo.
15 Salit mga kabugtoan, tindog kamo hin marig-on ngan padayon nga sunda an mga tradisyon nga igintutdo ha iyo, pinaagi man ito hin mensahe nga iginsumat ha iyo o hin surat tikang ha amon.
16 Dugang pa, hinaot an aton Ginoo nga hi Jesu-Kristo mismo ngan an Dios nga aton Amay, nga nahigugma ha aton ngan padayon nga nagliliaw ngan naghahatag hin maopay nga paglaom pinaagi han diri-matupngan nga pagkabuotan,
17 magliaw han iyo kasingkasing ngan magparig-on ha iyo ha tagsa nga maopay nga buhat ngan pulong.
Mga footnote
^ Kitaa an Apendise 5.
^ O “pagpasulay.”
^ O “pagrebelde ha pagsingba ha totoo nga Dios.”
^ O “iginpapakita ha publiko.”
^ Ha literal, “espiritu han iya baba.”
