2 Tesalonica 1:1-12
1 Tikang kan Pablo ngan kanda Silvano ngan Timoteo, para ha kongregasyon han mga taga-Tesalonica nga kahiusa han Dios nga aton Amay ngan han Ginoo nga hi Jesu-Kristo:
2 Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan ha Ginoo nga hi Jesu-Kristo.
3 Mga kabugtoan, tungod ha iyo pirme kami obligado nga magpasalamat ha Dios. Angay namon ini buhaton kay nagtutubo hin labaw pa an iyo pagtoo ngan nagtitikahilarom an iyo gugma ha usa kag usa.
4 Salit gindadayaw namon kamo ha mga kongregasyon han Dios tungod han iyo pagpailob ngan pagtoo bisan pa han ngatanan nga pagtimaraot ngan kasakitan nga iyo gin-aantos.
5 Pamatuod ito han matadong nga paghukom han Dios, nga tungod hito nagin takos kamo ha Ginhadian han Dios, nga amo an hinungdan nga nag-aantos gud kamo.
6 Ini nga paghukom han Dios matadong kay nabulos hiya hin kasakitan ha mga nagpapasakit ha iyo.
7 Kondi kamo nga nag-aantos hin kasakitan, tatalwason kamo han Dios kaupod namon kon an Ginoo nga hi Jesus igpahayag na tikang ha langit upod an iya gamhanan nga mga anghel tikang ha langit
8 ha naglalaga nga kalayo, samtang nabulos hiya ha mga diri nakilala ha Dios ngan ha mga diri nasugot ha maopay nga sumat mahitungod han aton Ginoo nga hi Jesus.
9 Mag-aantos hira han hudisyal nga sirot nga waray kataposan nga kabungkagan tikang ha atubangan han Ginoo ngan diri na makakakita han iya mahimayaon nga gahum.
10 Mahitatabo ini kon kumanhi na hiya basi hiya paghimayaon upod an iya mga baraan, ngan hito nga adlaw mahipapausa ngan magdadayaw ha iya an ngatanan nga nagpakita hin pagtoo, kay tinoo gud kamo han amon iginsangyaw ha iyo.
11 Tungod hito pirme namon kamo igin-aampo, nga hinaot tagdon kamo han aton Dios sugad nga takos han iya pagtawag ngan bug-os nga buhaton niya an ngatanan nga maopay nga iya nalilipayan pinaagi han iya gahum ngan himoon nga malampuson an iyo mga buhat tungod han pagtoo,
12 basi an ngaran han aton Ginoo nga hi Jesus paghimayaon pinaagi ha iyo, ngan paghimayaon liwat kamo kahiusa niya, uyon ha diri-matupngan nga pagkabuotan han aton Dios ngan han Ginoo nga hi Jesu-Kristo.
