2 Juan 1:1-13
1 Tikang ha tigurang nga tawo, para ha pinili nga babaye ngan ha iya mga anak, nga akon gud hinigugma, ngan diri la ako, kondi han ngatanan liwat nga nahibaro han kamatuoran.
2 Hinigugma namon kamo tungod han kamatuoran ha amon kasingkasing nga magpapadayon ha waray kataposan.
3 Ngan makakarawat naton an diri-matupngan nga pagkabuotan, kalooy ngan kamurayawan tikang ha Dios nga Amay ngan tikang kan Jesu-Kristo nga iya Anak, upod an kamatuoran ngan gugma.
4 Nalilipay gud ako kay nahibaroan ko nga an iba han imo mga anak naglalakat ha kamatuoran, uyon ha nakarawat naton nga sugo tikang ha Amay.
5 Salit yana naghahangyo ako ha imo, pinili nga babaye, nga higugmaon naton an usa kag usa (diri ako nagsusurat ha imo hin bag-o nga sugo, lugod an aton nakarawat ha tinikangan).
6 Ngan an gugma nangangahulogan nga magpadayon kita ha paglakat uyon ha iya mga sugo. Ini nga sugo iyo nabatian ha tinikangan basi kamo magpadayon ha pagpakita hin gugma.
7 Kay damu nga paralimbong an nakikita na ha kalibotan, ngan diri hira nagpapahayag nga hi Jesu-Kristo kinanhi sugad nga tawo. Amo hira an paralimbong ngan antikristo.
8 Magbantay kamo basi diri mawara ha iyo an mga butang nga amon ginpangalimbasogan nga tumanon, kondi basi makarawat niyo an bug-os nga balos.
9 An ngatanan nga nagpapasobra ha katutdoan han Kristo ngan diri padayon nga nasunod hito diri inuuyonan han Dios. An padayon nga nasunod hito nga katutdoan amo an inuuyonan han Amay ngan han Anak.
10 Kon may bisan hin-o nga kumada ha iyo ngan diri niya dara ini nga katutdoan, ayaw gud hiya pasudla ha iyo balay o pangumustaha.
11 Kay an nangungumusta ha iya nakikigbahin ha iya maraot nga mga buhat.
12 Bisan kon damu pa an akon igsusumat ha iyo, diri ko karuyag nga igsurat la ito gamit an papel ngan tinta, lugod naglalaom ako nga makakada ha iyo ngan makaistorya mismo kamo, basi mapuno kamo hin kalipay.
13 Nangungumusta ha imo an mga anak han imo bugto nga babaye, an usa nga pinili.
