Dooriyo Wodee Haˈˈa

“Xoossai asaa ba leemisuwan medhdhiis; i a Xoossaa leemisuwan medhdhiis; i eta attumaasanne maccaasa medhdhiis.”—Doomettaabaa 1:27.

GEESHSHA MAXAAFAA doomettan deˈiya ha erettida qaalati, Xoossay ‘a wodiyan wodiyan loyttidi oottido’ gitabatuppe issuwaa—polo gidida azinaanne machiyo, Addaamanne Hewaano deˈuwau ehiidoogaa qonccissoosona. (Eranchchaa 3:11) Xoossaa Yihooway eta Medhidaagaa gidiyoogaadan, etassi: “Yelettite; corattite; ha sa7aa kumitenne haarite; abbaa moliyaa, saluwaa kafuwaanne biittaa bolli woxxi qaaxxiya, paxa de7⁠iya mereta ubbaa haarite” yaagiis.—Doomettaabaa 1:28.

Koyro azinaassinne macheessi yootido ha qaalan, Xoossay etassi halchidobaa erissiis. Eti corattana koshshees; qassi kumetta biittaa banttassinne bantta naatussi gannate oottana koshshees. Eti ha wodiyan hayqqana giidi Xoossay kasetidi kuuyibeenna. Hegaappe, Xoossay issi maalaalissiyaabaa etassi qaalaa geliis. Eti suurebaa dooriyoogaaninne Xoossaara moggottidi deˈiyoogan, polo sarotettaaninne ufayssan merinau deˈana danddayoosona.

 Eti iita dooro dooridosona; hegaappe denddidaagan cimatettaynne hayqoy asaa naata ubbaa gakkees. Ba soo asau huuphe gidida Iyyoobi: “Maccaasappe yelettida asa baree qantta; hegaa keesaikka metuwan kumi uttiis” yaagiis. (Iyyooba 14:1) Asaa naata ha metuwan yeggiday aybee?

Geeshsha Maxaafay: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagidi qonccissees. (Roome 5:12) “Issi asa” geetettidaagee, deexxenna, qoncce gidida Xoossaa azazuwaa eriiddi kanttanau doorida Addaama. (Doomettaabaa 2:17) Addaamee gannate saˈan merinau deˈiyo injjiyaa ba dooruwan aggi bayiis. I alˈˈo laatay ba naatuppekka halanaadan oottiis; qassi nagaraanne hayquwaa eta laatissiis. Ubbabay hidooti baynnaba milatiis. SHin hidooti deˈanee?

Ooraxissiyo Wodiyaa

SHaˈan qoodettiya layttappe guyyiyan, yexxiyaagee Xoossaa ayyaanay denttettin: “Xilloti biittaa laattananne yan merinau de7ana” yaagidi xaafiis. (Mazamure 37:29) Edenen gelido qaalay polettanaagaa ammanttanau, Xoossay mata wode oottanabaa ba Qaalan: “Eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7⁠enna. Aissi giikko, ceegabai xayiis” yaagidi ufayssiya ogiyan qonccissiis. Kaallidi Xoossay ba huuphe: “Taani ubbabaa ooraxissais” yaagiis.—Ajjuutaa 21:4, 5.

Ubbabau a wodee wodee deˈiyo gishshau, Xoossay qaalaa gelido ufayssiyaabay polettanaadan ooraxissiyo wodee awude yaanee? yaagiya oyshay denddees. Ha maxeetiyaa attamissiya Yihoowa Markkati, nuuni deˈiyoy Geeshsha Maxaafay ‘wurssetta gallassa’ giyo wodiyaana gidiyoogaanne ‘ubbabaa ooraxissanau’ Xoossay tangguwaa ekkiyo wodee matattidoogaa asaa akeekissanau baaxetiiddi takkidosona. (2 Ximootiyoosa 3:1) Geeshsha Maxaafaa pilgganaadaaninne neeni sinttappe demmana danddayiyo ufayssiyaabaa tamaaranaadan minttettoos. Neeni: “GODAI beettiyo wode a koyite; matan de7⁠iyo wode a xeesite” yaagiya ha shoobiyaa ekkanaadankka minttettoos. (Isiyaasa 55:6) Neeni merinaa deˈuwaa hidootaa demmanay qaadaana gidennan ne dooruwaana!

[Sinttaa 8n deʼiya misiliyaa qonccissuwaa]

“Taani ubbabaa ooraxissais”