Qofaa Payyatettaa
Qohiya qofaa eqettanaadan Geeshsha Maxaafay nuna zorees; qassi maaddiya qofaa qoppanaadan nuna minttettees.
HANQQUWAA
GEESHSHA MAXAAFAY YOOTIYO MAARAA: “Wolqqaama asa gidiyoogaappe, hanqqettanau eesotenna asa gidiyoogee lo77o.”—Leemiso 16:32.
HEGEE WOYGIYOOGEE? Nuuni nu qofaa teqqiyoogaa tamaariyo wode goˈettoos. Nuuni ubbay hanqqettanaadan oottiya gaasoy issi issitoo deˈana danddayees; shin nuuni nu hanqquwaa teqqana xayikko, hegee daro metuwaa kaalettana danddayees. Asay hanqqettiyo wode ubbatoo maara qoppenna; qassi guyyeppe zilˈˈettanaadan oottiyaabaa darotoo haasayeesinne oottees.
NEENI AY OOTTANA DANDDAYAY? Neeni ne huuphiyaa naagennaagaa bessiyaabaa oottanaappe kasetada ne hanqquwaa teqqiyoogaa tamaara. Issi issi asay hanqqettiya asay mino giidi qoppees; shin tumuppe eti laafa. Geeshsha Maxaafay, “Ba huuphiyaa naagenna asi dirssai meqqido katamaa mala” yaagees. (Leemiso 25:28) Issibaa haasayanaappe woy oottanaappe kasetidi tumu hanidabay aybakko shaakki eriyoogee hanqquwaa teqqanawu maaddiya issi oge. “Aawussi de7iya aadhdhida eratettai hanqquwaa mitissees.” (Leemiso 19:11) Nu qofaa naaganawu maaddiya aadhdhida eratettaa demmana mala, nuuni issibaa naaˈˈu uraappe loytti siyana koshshees.
GALATAA
GEESHSHA MAXAAFAY YOOTIYO MAARAA: “Galatite.”—Qolasiyaasa 3:15.
HEGEE WOYGIYOOGEE? Ufayttana danddayiyay galatiya ura xalla geetettees. Daafabay gakkin, dosiyo asi hayqqido woy alˈˈobay bayido issi issi asaykka hegee tuma gidiyoogaa yootana. Eti banttappe xayidabaa ubbatoo qoppiyoogaappe banttawu deˈiyaabawu galatiyoogee, bantta qofaa naagidi genccanaadan keehi maaddidoogaa yootoosona.
NEENI AY OOTTANA DANDDAYAY? Galla galla, neeni galatanaadan oottiyaabaa qoppa woy xaafa. Yaatiyoogee gitaba xallaana gidana koshshenna. Away kiyiyo wode beettiya loˈˈiya meraa, siiqiyo asaara ufayssiyaabaa haasayiyoogaa, nu deˈuwan hara gallassaa demmidoogaa mala guuttabatakka wotta dentta qoppa. Neeni hegeeta qoppikko, qassi eta demmoogawu galatikko, hegeeti neeni ufayttanaadan oottana danddayoosona.
Neeni ne soo asaanne ne laggeta aybissi galatiyaakko qoppiyoogee nena keehi maaddana danddayees. Hara asaa neeni nashshiyo issibaa akeekiyo wode, he uraara gayttada woy dabddaabbiyan, imeeliyan woy kiitaa xaafada kiittiyoogan hegaabaa awu yoota. Hegee intte dabbotay minnanaadan oottennan waayi aggana; qassi neeni haratuyyo loˈˈobaa oottaydda deˈiyo gishshawu ufayttana.—Oosuwaa 20:35.
GEESHSHA MAXAAFAY YOOTIYO HARA MAARATA
Neeni eriyo qaalan cenggurssan giigida Geeshsha Maxaafaa dawunlode oottana danddayaasa. Hegee jw.org saytiyan 40 gidiya qaalan deˈees
PALAMAA AGGAAGA.
“Ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga.”—LEEMISO 17:14.
SINTTANAABAA XEELLIYAAGAN BESSENNABAWU HIRGGOPPA.
“Wonttobau hirggoppite; aissi giikko, wonttoi bau hirggana; gallassa ubbaukka gidiya a huuphe waayee de7ees.”—MAATIYOOSA 6:34.
ISSIBAA OOTTANAAPPE KASETADA LOYTTA QOPPAPPE ATTIN, HE WODE NEESSI SIYETTIDAAGAADAN SOHUWAARA OOTTOPPA.
“Nena adussi qoppiyoogee naagana; akeekaikka nena saro ashshana.”—LEEMISO 2:11.
Hageeta Beˈadii?
BEEGOTTITE!
Unˈˈettiyoogaappe Woppaa Demma
Neeni unˈˈettiyoogaa suure xeellanawunne geella poxxanawu maaddiya oosuwan peˈana danddayiya amarida maarata qonccissana.
