Tiitussi 2:1-15
2 Shin neeni tumu* timirttiyara maayiyabaa tamaarissiyogaa aggoppa.
2 Cimida attumaageeti awudekka banttana naagana koshshees; qassi bonchchettiya asa, suure qoppiyageeta gidananne ammanuwan, siiquwaninne genccan mino gidana koshshees.
3 Hegaadankka, cimida maccaageeti geeshshatuyyo bessiyabaa haniyageeta, zigirennaageeta, daro ushshawu aylle gidennaageetanne* loꞌꞌobaa tamaarissiyageeta gidana koshshees.
4 Yaatikko, bantta azinaanne bantta naata siiqanaadan, eti yelaga macca asata zorana* danddayoosona.
5 Hegaadankka, suure qoppiyageeta, qofaaninne oosuwan geeshsha,* son minnidi oottiyageeta,* loꞌꞌo asa, qassi bantta azinawu haarettiyageeta gidanaadan eta zorana danddayoosona; yaatikko, asi Xoossaa qaalaa borennan aggana danddayees.
6 Hegaadankka, yelaga attuma asati suure qoppiyageeta gidanaadan minttada zoriyogaa aggoppa.
7 Qassi neeni ubbaban loꞌꞌo ooso oottiyogan waatanaakko bessana koshshees. Geeshsha gididabaa* akeekan tamaarissa.
8 Asi borana danddayenna loꞌꞌo* qaalan tamaarissa; yaatikko, phalqqiyabaa yootiyageeti nuna boriyo* gaaso xayidi yeellatana danddayoosona.
9 Aylleti bantta godata ufayssanawu koyidi ubbaban etawu haarettana bessees; qassi eta bolli iitabaa haasayananne
10 etabaa wuuqqana bessenna; muleera ammanettana bessees; eti yaatikko, nuna ashshiya Xoossay tamaarissiyobaa loꞌꞌotettaa ubba ogiyan bessana danddayoosona.
11 Xoossay ubba qommo asaa ashshiyogaappe denddidaagan, laggetiyabi baynna A kehatettaa beꞌana danddayettees.
12 Nuuni Xoossaa toochchiyabaanne ha saꞌaa asaa iitabaa amuwa ekkennan ixxanaadan, qassi suure qoppiyageetanne xillo gididi, haꞌꞌi ha wodiyan* Xoossaayyo ammanettidi deꞌanaadan he kehatettay tamaarissees.
13 Qassi nuuni wolqqaama Xoossaynne nuna ashshiya Yesuus Kiristtoosi bantta gitatettaa bessana wodiya naagoos.
14 Yesuusi iita ooso ubbaappe nuna laꞌa kessanawu,* qassi loꞌꞌobaa oottanawu wozanappe koyiya asaa, ba dumma aquwa baayyo geeshshanawu ba shemppuwa nuussi aatti immiis.
15 Neeyyo maatay deꞌiyo gishshawu, hegeeta tamaarissiyogaa, qassi harata zoriyogaanne* seeriyogaa aggoppa. Ooninne nena karoppo.
Footnotes
^ Woykko “maaddiya.”
^ Woykko “haarettennaageetanne.”
^ Woykko “suure qoppiyogaa doommanaadan oottana; tamaarissana.”
^ Woykko “qoppiyobaaninne oottiyoban geeshsha.”
^ Woykko “bantta keettaa loytti oyqqiyageeta.”
^ Woykko geella, “Geeshshatettan.”
^ Woykko “maaddiya.”
^ Woykko “iita asa giyo.”
^ Woykko “ha ubbabaa maaran.” Qonccissuwa xeella.
^ Mise, “wozanawu.”
^ Woykko “minttettiyogaanne.”
