Roome Asaassi Xaafettidaagaa 12:1-21
12 Hegaa gishshawu, ta ishatoo, Xoossay qarettiyo gishshawu, intte intte bollaanne intte deꞌuwa Xoossaa ufayssiya geeshsha yarshshodan ayyo yarshshana mala inttena woossays. Yaatidi intte kumetta qofan ayyo goynnite.*
2 Qassi ha saꞌaa asaa* qulliyogaa aggite, shin intte qofaa laammidi intteyyokka ooraxxite; yaatikko, Xoossay koyiyo loꞌꞌobaa, A ufayssiyabaanne wottiyobi baynnabaa intte paacci erana.
3 Xoossay taayyo kehido laggetiyabi baynna kehatettan taani intteyyo hagaa yootays; inttessi ubbaassi Xoossay likkidi immido* ammanuwadan suure qofay intteyyo deꞌanaadan qoppiteppe attin, inttena xeellana bessiyogaappe aattidi xeelloppite.
4 Issi bollaa giddon daro shaahoti deꞌikkonne, he shaahoti ubbay issi malabaa oottennaagaadan,
5 nuuni cora gidikkokka, Kiristtoosaara issuwa gidiyo gishshawu issi bolla, qassi shaahoti issippe gaytti uttidosona.
6 Xoossay nuuyyo kehido laggetiyabi baynna kehatettaadan nuussi dumma dumma imotay imettido gishshawu, he imotay hiraagaa* yootiyogaa gidikko, nuuyyo imettida ammanuwadan simi hiraagaa yootoos;
7 woy he imotay haggaazaa gidikko, simi haggaazoos; woy tamaarissiya asi, simi tamaarisso;
8 woy minttettiya* asi simi minttetto;* immiya* asi simi ufayssan immo; galchchan sintta xeera gidiya asi simi minnidi hegaa ootto; qarettiya* asi simi wozanappe qaretto.
9 Intte wozanappe* siiqettana koshshees. Iitabaa ixxite; loꞌꞌobaa baqqi oyqqite.
10 Issoy issuwara ishanttudan gomppan mishettidi siiqettite. Harata bonchchanawu sintta xeera gidite.*
11 Minnidi* oottite, azalloppite.* Ayyaanan suullite. Yihoowayyo* aylledan oottite.
12 Sinttappe demmanaban* ufayttite. Waayettiyo wode genccite. Minnidi woossite.
13 Geeshshatuyyo koshshiyagaadan immite. Harata imattiyo ogeta koyite.
14 Inttena naaqqiyageeta anjjiyogaa aggoppite; eta qanggoppite.
15 Ufayttiyageetuura ufayttite; yeekkiyageetuura yeekkite.
16 Inttena xeelliyogaadan harata xeellite; gitabaa qoppoppite, shin gita gidennabaa dosidi hegaa kaallite. Hayyo keehi eriya asadan inttena xeelloppite.
17 Ooyyonne iitabaa iitaban zaaroppite. Asay ubbay loꞌꞌobadan xeelliyobaa* qoppite.
18 Asaa ubbaara saro deꞌanawu intteyyo danddayettida ubbabaa oottite.
19 Ta siiqotoo, intte haluwa kessoppite, shin Xoossay ba hanqquwa bessanaadan aggi bayite; ayssi giikko, “Yihoowi,* ‘Haluwa kessiyagee tana; taani bessiyabaa qanxxana’ yaagees” geetettidi xaafettiis.
20 Shin “ne morkkee namisettikko, miza; I saamettikko, uyiyobaa imma; ayssi giikko, neeni yaatiyogan A liiphiyan tamaa bonqquwa kuurana.”*
21 Asi oottiyo iitaban xoonettoppite, shin loꞌꞌobaa oottidi iitabaa xoonana danddayeeta.
Footnotes
^ Woykko “geeshsha haggaazaa haggaazite.”
^ Woykko “ha wodiya, ha ubbabaa maaraa.” Qonccissuwa xeella.
^ Woykko “gishido.”
^ Woykko “Xoossay erissidobaa.”
^ Woykko “mintti zoriya.”
^ Woykko “mintti zoro.”
^ Woykko “gishiya.”
^ Woykko “maariya.”
^ Mise, “shollooretetti baynnan.”
^ Woykko “sinttatite.”
^ Woykko “Wozanappe.”
^ Woykko “Intte oottiyoban azzalloppite.”
^ Woykko “Hidootan.”
^ Woykko “qoppiyobaa.”
^ Hegeekka, izawu wozanay minnidaagaa seerissanawu.
