Abddiyya 1:1-21
1 Abddiyyu* beꞌido ajjuutaa:
Ubbaa Haariya Goday Yihoowi Edomabaa yootidobaa Abddiyyu hagaadan giis:
“Nuuni Yihoowi yootido issibaa siyida,Issi uri deretukko kiitettiis:
‘Denddite, biidi Edoma* olanawu giigettoos.’”
2 Xoossay hagaadan gees: “Hekko! Taani nena deretu giddon pattennaba kessaas;Eti nena keehi karidosona.
3 Zaallaa kooppuwan qosettada deꞌiyagoo,Xoqqasan uttada ne wozanan,‘Tana duge saꞌawu ooni wottana danddayii?’ giyagoo,Ne wozanaa otoroy nena balettiis.
4 Neeni argganttaadan xoqqasan deꞌiyakkokka,*Woy ne keettaa xoolinttetu giddon keexxiyakkokka,Taani nena yaappe duge wottana,” yaagees Yihoowi.
5 “Kaysoti woy bonqqiyageeti qammi neekko yiyakko,Eti koyiyobaappe harabaa wuuqqiyonaa?
Woy woyniya shiishshiyageeti neekko yiyakko,
Eti pushaluwa* ashshokkonaa?Shin ne morkketi nena muleera xayssana.*
6 Morkketi Eesawa patipannidi koyidosona,
Geemmi uttida A buquraa keehi amottidosona!
7 Eti nena bantta biittaappe kessidosona.
Ne exati* ubbay nena balettidosona.
Nenaara saro deꞌiya asati ne bolli denddidi xoonidosona.
Nenaara miyageeti neeyyo gitiya yeggana,Shin neeni hegaa akeekakka.
8 Yihoowi hagaadan gees: “Taani he gallassi,Hayyo eriyageeta Edomappe xayssikkinaa?Qassi deree dariyo Eesawa biittaappe akeekaa xayssikkinaa?
9 Laa Temanaa, ne olanchchati shabbirettana,Ayssi giikko, deree dariyo Eesawa biittan deꞌiya ubbay muleera xayana.
10 Ne ishaa Yaaqoobawu iitabaa oottido gishshawu,Neeni yeellaa maayana,Qassi neeni merinawu xayana.
11 Neeni A miyyiyan eqqennan ixxido wode,Allagati A olanchchata omooddido wode,Hara biittaa asati* Yerusalaame penggiyara gelidi A bolli saamaa yeggido wode,Neeni etadan hanadasa.
12 Neeni waanada ne ishay waayettiyo wode ufayttay?Neeni waanada morkketi Yihudaa asaa woriyo wode ililay?Qassi neeni waanada eti azzaniyo wode otoruwan haasayay?
13 Ta asaa bashshaa wode neeni waanada eta pengge yay?Neeni waanada ta asaa bashshaa wode ufayttay?Qassi neeni waanada eta bashshaa wode etawu deꞌiya alꞌꞌobaa ekkay?
14 Neeni waanada ta asaa giddoppe baqatiyageeta woranawu ogee ballattiyosan eqqay?Qassi ta asay waayettiyo wode neeni waanada etappe attidaageeta aatta immay?
15 Yihoowi dereta ubbaa xayssiyo gallassay matattiis.
Neeyyokka neeni oottidoogaadan hanana.
Neeni haratu bolli oottidobawu neeyyo kushiya zaarana.
16 Ayssi giikko, ne asay ta geeshsha deriyan uyidoogaadan,Dereti ubbay Xoossaa hanqquwa ubbatoo woyniyadan uyana.
Ee, eti uyana, ubbakka ganana,Qassi eti mule deꞌi erennabadan xayana.
17 Shin baqatidaageeti Xiyone Deriyan deꞌana,Qassi Xiyonee geeshsha gidana;Hegaadankka, Yaaqooba keettay* ba laataa zaarettidi ekkana.
18 Yaaqooba keettay tama mala gidana,Yooseefa keettay laco mala gidana,Qassi Eesawa keettay dala* mala gidana;Eti Eesawa keettaa xuuggananne xayssana,Qassi Eesawa keettaappe ooninne attenna;Yihoowi hegaa yootiis.
19 Eti Negebanne deree dariyo Eesawa biittaa ekkana,Shefelanne Pilisxxeematu biittaakka ekkana.
Eti Efireema biittaanne Samaariya biittaa ekkana,Qassi Biniyami Giliꞌada ekkana.
20 Siraafita gakkanawu deꞌiya Kanaanetu biittay,He qatuwappe* kessido Israaꞌeela asaabaa gidana.
Qassi Negeba katamati Yerusalaameppe omooddettidi Sefaradan deꞌiya asaabaa gidana.
21 Hegaa bollikka, deree dariyo Eesawa biittaa asaa bolli pirddanawuAshshiyageeti Xiyone deriya kiyana,Qassi kawoy Yihoowa gidana.
Footnotes
^ Birshshettay “Yihoowa Aylliya.”
^ Mise, “O.”
^ Woykko geella, “xoqqasan paalliyakkokka.”
^ Woykko “woyniyappe amaridaagaa.”
^ Woykko geella, “Eti ay keenaa xayssanee?”
^ Woykko “Nenaara maacettidaageeti; nenaara hashetiyageeti.”
^ Woykko “Morkketi.”
^ Woykko “zerettay.”
^ Woykko “utula.”
^ Woykko “mino gimbbiyappe.”
