Yohaannisi Xaafido Naaꞌꞌanttoogaa 1:1-13
1 Taani cima bitanee* tumuppe siiqiyonne ta xalaala gidennan, tumaa eridaageeti ubbaykka siiqiyo, doorettida maccaaseeyyonne I naatuyyo hagaa xaafays;
2 nu wozanan deꞌiyanne merinawu an deꞌana tumaa gaasuwan nuuni inttena siiqoos.
3 Xoossay Aawaynne A Naꞌay Yesuus Kiristtoosi nuuyyo he tumaanne siiquwa immana. Eti nuuyyo laggetiyabi baynna kehatettaa kehana, nuna maarananne nuuyyo sarotettaa immana.
4 Ne naatuppe amaridaageeti Aaway nuna azazidoogaadan tumaa ogiyan hemettiyogaa taani erido gishshawu, keehi ufayttays.
5 Simi maccaasee, nuuni issoy issuwa siiqana mala haꞌꞌi nena oychchays. (Taani neeyyo xaafiyoy nuuyyo doomettaappekka imettidaagaappe attin, ooratta azazo gidenna.)
6 Qassi siiqoy hagaa, hegeekka, I azazidoogaadan ubbatoo hemettiyogaa. Intte doomettaappe siyido azazoy hagaa: awudekka siiqettite.
7 Ayssi giikko, Yesuus Kiristtoosi ashuwan yiidoogaa ekkenna, balettiya daroti saꞌan daridosona. Cimmiyageenne Kiristtoosaara gaaddetiyagee hegaa.
8 Intte huuphessi naagettite; yaatikko, kumetta woytuwa ekkeetappe attin, nu oosuwa ayfee intteppe halenna.
9 Kiristtoosi tamaarissidoban deꞌennanne hegaappe kanttidi biya ooyyonne Xoossay baawa. I tamaarissidoban deꞌiya asassi Aawaykka Naꞌaykka deꞌoosona.
10 Ooninne inttekko yiyabanne he timirttiya eheennaba gidikko, A intte son mokkoppite woy saro gooppite.
11 Ayssi giikko, A saro giya ooninne I oottiyo iitabaa kaafees.
12 Taani intteyyo xaafiyo darobay deꞌikkonne, inttekko baada inttenaara baazzan haasayanawu koyaysippe attin, woraqataaninne qalamiyan xaafanawu koyikke; yaanikko intte poli ufayttana.
13 Doorettidaari ne michchee naati neeyyo sarotaa kiittoosona.
Footnotes
^ Woykko “Cimay.”
