Yaalepelinwaaya Agalata 6:1-18
6 Asinnaka, wakhala weera mutthu onneettela ephiro yoohireerela nnaamweera mwaneene ahonne eyo, nyuwo muneettihiwa ni munepa wootteela wa Muluku, ontthuneya omukhavihera mutthu owo weera atthikele weettela ephiro ya ekhaikhai. Mene mpakeke eyo mooreera murima. Ni mwiikosoope weera nyuwo-tho muhimorele vamuraakhoni.
2 Nvirelele okhaviherana mukina ni mukhwaawe mwaavirihaka maxupo, wakhala weera munoopaka eyo, munookwanihera nlamulo na Kristu.
3 Wakhala weera mutthu onniisoona okhala ootthuneya, mene ahikhanleene etthu, owo onimweera wiiwoka mwaneene awe.
4 Menento, yoole ori mutthu awehexexeke soopaka sawe. Mwa hiiho, onoohakalala mwaha wa miteko sawe, ohiya mwaha woowiilikanxera ni atthu akina.
5 Woona weera yoole ori mutthu, onkela oteexa muritti awe.
6 Nave-tho yoole ori mutthu onxuttihiwa masu a Muluku, akawane itthu sooreera oraaweno ni muhusiha awe.
7 Muhiiwoke: Muluku khantheelihiwa. Woona weera ele mutthu onaalaawe, ti yeeyo enexa onhephaawe;
8 mutthu ootheene ole ontthara sootthuna sa erutthu, yoohepha awe enkela okhala okhwa. Mene ole ontthara munepa wootteela wa Muluku, onoophwanya* ekumi yoohimala enkumiheriwa ni munepa owo.
9 Tivanto, nihikhulumuwe opaka itthu sooreera, woona weera nnoohepha etempu yoophwanelela, naahikhulumuwa vale.
10 Tivawonto, nakhalano eparakha yoowaapakela itthu sooreera atthu akina, naapakeleke atthu ootheene, otepaxa wene asinna nraahuno nroromelo nimoha.
11 Ekaarta ela, koolepenleni ti miyo ni ntata naka, nwehe moota sunnunwaaya ileetera.
12 Atthu ale entthuna waasiveliha atthu, ti yaawo enwoopererani nyuwo weera mwiineliwe. Mwaha wooweera awo khentthuna ottharatthariwa mwaha woomutthara Kristu yoowo okhwiiye vamwirini.*
13 Naari atthu yaawo yiinelinwe, khentthara Nlamulo, awo entthuna weera mwiineliwe weera awo ekhalekeno mathowa oowiittottopela mwaha wa etthu yeerihinwaaya erutthu anyu.
14 Woohima sa miyo, miyo nkinkela wiittottopela ohikhanle mwaha wa Apwiya ahu Yesu Kristu, yaawo ekhwiiye vamwirini,* wa miyo moorweela mwa yoowo elapo yoolamuliwa okhwa, mene vamaithoni va elapo, miyo koolamuliwa okhwa mwaha wa yoowo.
15 Wiineliwa, ohiineliwa, khaiyene etthu, menento etthu yootthuneya okhala mutthu munyowani* ni Muluku.
16 Ootheene ale enkhala moovarihana ni nlamulo na mukhalelo ola, aani, Israeli a Muluku, ekhaleno murettele ni omoriwa ikharari.
17 Ovinyera viinaano va mpaka muhoolo, ahikhale mutthu aneera akikumihere maxupo, woona weera kookhalano ithoonyero mweerutthuni mwaka sinoonihera weera miyo kaporo a Yesu.
18 Asinna, mukhalelo anyu wooreera munooniheraanyu oreelihiwe ni oreera murima otokweene wa Apwiya ahu Yesu Kristu okhale ni nyuwo. Amem.
Footnotes
^ Naari: “onoohepha.”
^ Naari: “mwiri wa nihaaxero.” Nwehe masu oowiiwanyeihiwa.
^ Naari: “mwiri wa nihaaxero.” Nwehe masu oowiiwanyeihiwa.
^ Naari: “yoopattuxiwa enyowani.”
