Yaalepelinwaaya Agalata 2:1-21
2 Vano, sivirakaru iyaakha 14, kaatthikela-tho oYerusalemu ni Barnaba, ni kaamukuxa-tho Tito.
2 Miyo, kaaronwe oYerusalemu iwo mwaha wooweera Apwiya yaarookileela weera miyo kannatthuneya orowa iwo. Ni kaahaasuweliha asinna mitthenka sooreera kinaalaleeraaka atthu ehikhanle ayuda. Mitthenka iya, kaalenle paahi asitokweeneru a mmulokoni. Kaapanke hiiho weera kisuwele waari weera etthu kimpakenlaaka Muluku ti yooreera naari yoonanara. Waari weera kherenre, tthiri kaavara mahala.
3 Mene, nnaamweera vareene hiiho, Tito yoowo aari vamoha ni miyo, khaanyesererinwe weera iineliwe, nnaamweera aari mukereku.
4 Mwaha ola, waakhumelenle mwaha wa asinna oowootha,* yaawo yaavolonwe mmulokoni ni yootthuna weera enihottele. Awo yaatthuna onanariha otaphuwa nraahuno mwaha wookhala atthareli a Kristu Yesu. Ni yaatthuna weera ntthikele okhala akaporo a nlamulo.
5 Mene hiyo, khanaakhulenle eyo naari mwa etempu* vakhaaniini mano, weera ekhaikhai woohima sa mitthenka sooreera evirelele okhala ni nyuwo.
6 Vano, woohima sa atthu ale yooniwa okhala etthu,* khayaakixuttinhe etthu enyowani, aani, miyo nkimpwattha makhalelo heeni awo yaaraayano khalayi woona weera Muluku khammuthoriha mutthu awehaka mikhalelo sa omokoni.*
7 Mene awosa yaahoona weera miyo koovahiwa muteko woowaalaleera mitthenka sooreera atthu oohiineliwa,* ntoko hiiho Pedru aavahinwaawe muteko woowaalaleera atthu oowiineliwa.
8 Ole onvanhe Pedru owera wookhala murummwa oowaalaleera atthu oowiineliwa, ookivaha-tho miyo owera weera kaalaleereke atthu a maloko makina,*
9 awo yaahoonelela weera Muluku annakoonihera oreera wawe murima otokweene. Vano, Yakobe, Kefa* ni Yohani yaawo yaari ntoko asitokweene, yaakiiyaathera ntata noolopwana miyo ni Barnaba ni yaaheera: khavamwaha, nyuwo munkela waalaleeraka atthu oohiineliwa,* ni hiyo ninkela waalaleeraka ayuda.*
10 Mene awosa yaanivekela weera nihittiwaleke waakhavihera asinna oohaawa, ni ti yeeyo miyo kiniilipiheraaka opaka vantxipale.
11 Menento, Kefa* aphiyakaru wAntiyokiya, miyo kanvaha miruku, mwaha wooweera etthu aapakaawe khayaarenre.
12 Woona weera, ehinaaye ophiya asilopwana a muloko aaraawe Yakobe, Kefa annatxa vamoha ni atthu yahaakhanle ayuda, mene asilopwana ale ephiyakaru, owo aahiya otxa naawo ni aavalaana ni atthu awo yahaakhanle ayuda, awoovaka atthu oowiineliwa.
13 Ayuda akina-tho yaavoleela mukhalelo* ene yoole, mpaka ni Barnaba aavoleela mukhalelo ene yoowo.
14 Mene, miyo koonakaru weera etthu awosa yaapakaaya khayaavarihana ni mitthenka sooreera sa ekhaikhai ninlaleyaahu, miyo kaamweerela Kefa,* ohoolo wa atthu ootheene: “Nyuwo nnaamweera mureene muyuda, munkhala ntoko atthu ehikhanle ayuda, ni khamunkhala ntoko muyuda. Vanonto, onwereya hayi nyuwo waanyesereriha atthu ehikhanle ayuda okhala moovarihana ni sookhovelela sa ayuda?”
15 Hiyo nri ayuda, khaninlikana ni atthu ale ehikhanle ayuda yaawo eri anamattheka.
16 Hiyo noosuwela weera khaiyene weera mutthu onhimmwa okhala naxariya mwaha wootthara ele nlamulo nnoopereraaya, mene onnahimmwa okhala naxariya mwaha woomuroromela Kristu Yesu. Tivawonto, nimuroromeleke Kristu Yesu weera nihimmwe okhala anaxariya mwaha woomuroromela Kristu, ohiya mwaha wootthara ele nlamulo nnoopereraaya. Woona weera khaavo mutthu aneera ahimmwe okhala naxariya mwaha wootthara ele nlamulo nnoopereraaya.
17 Vano, wakhala weera hiyo-tho ninnooniwa okhala anamattheka, nnaamweera niilipiheraka weera nihimmwe okhala anaxariya moorweela mwa Kristu, neereke Kristu onniruma okhala anamattheka? Hooye!
18 Miyo kaalipihaka-tho veeli itthu seiye miyo kinyaanyalaaka, eyo enoonihera weera miyo kinnatthekela Nlamulo.
19 Woona weera nkintthara Nlamulo, miyo kookhwela Nlamulo weera kikhale mukumi moorweela mwa Muluku.
20 Vano, miyo kookhomeliwa vamoha ni Kristu. Hiiho miyo nkiniikhalela mwaneene aka mene Kristu onkhala mwa miyo. Mweekhaikhai, vano kinkhala ntoko mutthu mwaha woomuroromela Mwaana a Muluku, okisivenle ni ovaherenre ekumi awe mwaha wa miyo.
21 Miyo nkinkhootta oreera murima otokweene wa Muluku; mwaha wooweera wakhala weera exariya* emphwanyiwa mwaha wootthara nlamulo, tthiri Kristu okhwiiye vasiiyoni vene.
Footnotes
^ Naari: “oohiroromeleya.”
^ Ni Ekereku: “ewoora emoha.”
^ Eyo tiiyo, ale yaahoolela mmulokoni.
^ Naari: “mikhalelo sinooneya.”
^ Naari: “ehikhanle ayuda.”
^ Naari: “ehikhanle ayuda.”
^ Iitthaniwa-tho Pedru.
^ Naari: “ehikhanle ayuda.”
^ Naari: “oowiineliwa.”
^ Iitthaniwa-tho Pedru.
^ Naari: “musapo.”
^ Iitthaniwa-tho Pedru.
^ Nwehe masu oowiiwanyeihiwa.
