Yaalepelinwaaya Agalata 1:1-24
1 Miyo Paulo, murummwa, khaiyene kithanlinwe ni atthu naari ni mutthu, mene kithanlinwe okhala murummwa ni Yesu Kristu ni Muluku, Tiithi, yoowo onvinyererinhe Yesu mookhwaani.
2 Miyo vamoha ni asinna ootheene eri ni miyo, ninnarumihela isalaamu sahu miloko sa wAgalata:
3 Oreera murima otokweene wa Muluku ni murettele onkhuma wa Muluku, Tiithi ahu, ni wa Apwiya Yesu Kristu, okhale ni nyuwo.
4 Moovarihana ni yootthuna ya Muluku Tiithi ahu, Kristu ohiivaherera mwaha wa soottheka sahu, weera anivuluxe elapo ela yoonanara;*
5 avuwihiwe Muluku wa mahiku ootheene. Amem.
6 Kiri ootikhiniheya ni nyuwo mwaha wooweera munnahiya weettela moowaakuveya ele muxuttihinwaanyu ni Ole owiitthanneni moorweela mwa oreera murima otokweene wa Kristu, ni vano muntthara mitthenka mikina.
7 Khaiyene weera sirookhala mitthenka mikina sooreera, mene aakhala atthu akina entthuna wookumiherani maxupo ni entthuna woohapuxani weera muheetteleke mitthenka sooreera woohima sa Kristu.
8 Menento, yoole ori mutthu, nikhale hiyo, ekhale malaika a wiirimu, eneera yoolaleereni mitthenka sooreera ohiya iya noolalenraahuni, mutthu owo ootakhaliwa.
9 Ntoko nihimmaahu woopatxerani, kinnatthikela-tho ohima keeraka: Mutthu ori poothe oneera oolaleereni mitthenka sooreera ohiya iya nyuwo mwaakhulenlaanyu, mutthu owo ootakhaliwa.
10 Vano, neereke atthu kintthunaaka oweeriha ororomela, naari kintthuna omuroromeliha Muluku? Naari neereke kintthuna waasiveliha atthu? Nto waareene weera kintthuna waasiveliha atthu, tthiri miyo khaiyene kaporo a Kristu.
11 Vano asinna, kintthuna weera musuwele weera mitthenka sooreera koolalenraakani, khasinkhuma wa atthu;
12 mwaha wooweera mitthenka iya nkivahinwe ni atthu, naari nkixuttihinwe ni mutthu, mene Yesu Kristu okisuwelinhe.
13 Moohihovela, nyuwo mohiiwa woohima sa mukhalelo kaaraakano khalayi emaara keettelaaka ettiini ya ayuda ni weera miyo kannattharatthara vantxipale muloko wa Muluku ni yootthuna weera kimalamalihe.
14 Ni weera miyo kannakela vahoolo mwa ettiini ya ayuda waapwaha atthu antxipale a nloko naka yaarino iyaakha imoha-moharu ni miyo, woona weera miyo kannakhalelaxa nthiti sookhovelela sa makholo aka.
15 Mene Muluku yoowo okithanliye kihinaayeene oyariwa, akiitthanakaru moorweela mwa oreera Wawe murima otokweene, ohoona okhala wooreera
16 okisuweliha Mwanawe, weera miyo kaalaleereke atthu ehikhanle ayuda* mitthenka sooreera woohima sa mwaana owo. Miyo nkaakenle onvekela miruku mutthu* mukina;
17 naari nkaakenle oYerusalemu waakoha ale yaari arummwa khalayeene okipwaha miyo, mene kaakenle wArabia, avinyaka kaatthikela oDamasku.
18 Vano, simalakaru iyaakha tthaaru, kaarowa oYerusalemu omuxekura Kefa* ni kaakhala ni yoowo mpuwa mwa mahiku 15.
19 Mene, nkaawonne arummwa akina ahikhanle Yakobe munnaya Apwiya.
20 Vano, woohima sa itthu kinoolepelaakani, kinnoororomelihani vamaithoni va Muluku weera nkineera wootha.
21 Avinyaka vaavo, kaarowa mittetthe sa wAsiria ni oSilisia.
22 Mene atthareli a Kristu a miloko sa oYudeya, khayaakisuwenle.
23 Atthareli ene yaala, yaamweera wiiwa paahi weera: “Mulopwana ole aatthuna omaliha ettiini ahu ni anttharatthara, vano, owo onlaleya mitthenka sooreera.”
24 Hiiho, awo yaapatxera onvuwiha Muluku mwaha wa miyo.
Footnotes
^ Naari: “emalihero ya itthu soonanara sa elapo ela.” Nwehe masu oowiiwanyeihiwa.
^ Naari : “a maloko makina.”
^ Ni Ekereku: “erutthu ni ephome.”
^ Iitthaniwa-tho Pedru.
