Yaalepelinwaaya Agalata 3:1-29
-
Ovirikana okhanle variyari va otthara Nlamulo ni nroromelo (1-14)
-
Naxariya onookhalano ekumi mwaha wa nroromelo (11)
-
-
Yoolaihera aalaiherinwaawe Abrahamu khenlipa ni Nlamulo (15-18)
-
Osuulu wa Abrahamu: Kristu (16)
-
-
Nikhummaayawo Nlamulo ni yoolakela ya Nlamulo (19-25)
-
Anamwane a Muluku moorweela mwa nroromelo (26-29)
-
Osuulu wa Abrahamu: ale emmutthara Kristu (29)
-
3 Nyuwo akristu a wAgalata mwa alolo!* Nyuwo mohiiwanyeihiwa nnene woohima sa okhwa wa Yesu Kristu vamwirini. Vanonto, taani yoola oweerinheni okhalano mukhalelo ola woonanara?
2 Yookhala etthu emoha kintthunaaka wookohani:* Neereke mwaakhenle munepa wootteela mwaha wootthara itthu sinoopereriwa mu nlamuloni, naari mwaha woororomela mitthenka sooreera mulaleerinwaanyu?*
3 Neereke nyuwo khamwiiwexenxe?* Woopatxerani nyuwo mwaaroromela munepa wootteela, menento vano nyuwo muntthara miruku sa atthu.
4 Neereke nvirinhe maxupo ale vasiiyoni vene? Miyo kinnaroromela weera hooye, khaiyene waari vasiiyoni vene!
5 Vanonto, neereke ole onoovahani munepa wootteela ni ompaka miteko sootikhiniha variyari vanyu ompaka eyo mwaha wa nyuwo otthara nlamulo, naari ompaka eyo mwaha wa nyuwo ororomela mitthenka sooreera mulaleerinwaanyu?*
6 Ni ti yeeyo yaamweerenle Abrahamu: Owo “aamuroromela Yehova,* ni mwaha wa yeeyo aahooniwa okhala naxariya.”
7 Mweekhaikhai, nyuwo moosuwela weera ale erino nroromelo eri anamwane Abrahamu.
8 Yoolepa emoha yooniheraka weera Muluku muhoolo aakela waahimaka okhala anaxariya atthu a maloko makina* moorweela mwa nroromelo naya, aamuleela varaatxiru mitthenka sooreera Abrahamu eeraka: “Moorweela mwa nyuwo, maloko ootheene enooreelihiwa.”
9 Vanonto, ale erino nroromelo, ennareelihiwa ntoko hiihaale Abrahamu oreelihinwaawe, mwaha wookhalano nroromelo.
10 Ootheene ale enroromela otthara nlamulo aatakhaliwa, woona weera yoolempwa: Ootakhaliwa ootheene ale ehintthara itthu sootheene silempwale murooluni mwa Nlamulo.
11 Opwaha mwa yeeyo, hiyo ninnawera woona weera Muluku khammuhima mutthu okhala naxariya mwaha wootthara nlamulo, mwaha wooweera “Naxariya, anaakhale mwaha wa nroromelo nawe.”
12 Nlamulo khaninlipa ni ororomela. Opwaha mwa yeeyo, “ole onrowa opaka itthu iya onookhalano ekumi mwaha wa itthu sene seiya.”
13 Nave-tho yoolempwa: “Ootakhaliwa mutthu ole othomeiwale vamwirini.” Kristu onthuma anivuluxaka mootakhaliwani mwahu ni Nlamulo. Owo ohaakhulela otakhaliwa vanipuroni vahu.
14 Eyo yeereñye hiiho weera atthu ale ehikhanle ayuda yaakhele yoolaihera aalaiherinwaawe Abrahamu mwaha wa Kristu Yesu, nave-tho weera hiyo naakhele munepa wootteela wa Muluku olaihenraawe ovaha mwaha wa ororomela wahu.
15 Asinna, miyo kinuuluma ni nyuwo kivarelaka muteko niphwanaphwaniho na etthu enweereela atthu: napakiwa vale nivarihano, nnaamweera nipakinweene ni atthu, khaavo onwera otxipiha naari waatxeerera.
16 Vano, Abrahamu ni osuulu* awe, yaalaiherinwe anatiri ala. Yoolepa khenhima weera: “Ni asusulwaawe”* ntoko eri atthu antxipale. Opwaha mwa yeeyo, ohima eneera: “Ni osuulu* awe,” emuhimaka mutthu mmoha, mutthu ene yoowo Kristu.
17 Opwaha mwa yeeyo, kinnahima weera: Natiri a Muluku ori oopatxera, nto nlamulo nikhumelenle sivirakaru iyaakha 430. Nto mwaha wa yeeyo, nlamulo khaninwera omaliha yoolaihera ya Muluku naari omutxipiha natiri owo.
18 Vano, waari weera Muluku khanvaha yoohiyeriwa moorweela mwa nlamulo, tthiri yoohiyeriwa eyo khenwa moorweela mwa yoolaihera. Menento, mooreera murima Muluku onvaha Abrahamu yoohiyeriwa moorweela mwa yoolaihera.
19 Nlamulo naavaheriwa heeni? Naavahinwe ni yootthuna weera sooniheriwe itthu soonanara atthu empakaaya, mpaka owa osuulu* yoowo waalaiherinwe.* Nlamulo nno, naasuwelihinwe ni malaika avareliwaka muteko mulipa oowiiraaniha.
20 Nivarihano napakiwa ni mutthu mmoha, khantthuneya mulipa oowiiraaniha, ni Muluku opanke eyo meekhaawe.
21 Neereke Nlamulo ninnanvaanyiha natiri a Muluku? Hooye! Vano waari weera noovahiwa nlamulo ninwera ophwanyiha ekumi, exariya yaakela owa moorweela mwa nlamulo.
22 Mene Soolepa sohoonihera weera atthu ehiiwale elamuleliwaka ni yoottheka. Mwa hiiho, atthu ale erino nroromelo pooti ophwanya itthu sooreera elaiherinwaaya atthu ale emmuroromela Yesu Kristu.
23 Menento, nihinaayeene omuroromela Kristu, naawehawehiwa ni nlamulo ni neettihiwa ni nlamulo nno, niwehereraka ele Muluku aakelaawe onsuweliha.
24 Vano Nlamulo naakhala mulipa ooneettiha mpaka wa Kristu, weera nooniwe okhala anaxariya moorweela mwa nroromelo.
25 Vanonto nneettelaahu nroromelo, khanimmutthuna-tho mulipa ooneettiha.
26 Mwaha woomuroromela wanyu Kristu Yesu, ootheene nyuwo mwa anamwane a Muluku.
27 Ootheene nyuwo mpatisinwe mwa Kristu, monwara Kristu.
28 Khakhanle muyuda naari mukereku, kaporo naari atthu ootaphuliwa mookaporoni naari mulopwana naari muthiyana, ootheene nyuwo muri mutthu mmoha, mwiiranneene ni Kristu Yesu.
29 Opwaha mwa yeeyo, waareene weera mummutthara Kristu, ootheene nyuwo mwa osuulu* wa Abrahamu, nave nyuwo munimwaakhela yoohiyeriwa emoharu aalaiherinwaawe Abrahamu.
Footnotes
^ Naari: “khamuniisuwela.”
^ Ni Ekereku: “kintthunaaka oxuttera ni nyuwo.”
^ Naari: “mwiiwalaanyu.”
^ Naari: “mwa alolo.”
^ Naari: “mwiiwalaanyu.”
^ Naari: “ehikhanle ayuda.”
^ Ni Ekereku: “mmiso.”
^ Ni Ekereku: “mmiso.”
^ Ni Ekereku: “mmiso.”
^ Ni Ekereku: “mmiso.”
^ Naari: “waamanelinwe natiri.”
^ Ni Ekereku: “mmiso.”
