Yaalepelinwaaya Agalata 5:1-26
5 Kristu, oonivuluxa weera nihikhale-tho veeli akaporo a nlamulo. Tivanto, mwiilipihereke weera muhitthikele-tho okhala veeli akaporo.
2 Mukiiwe! Miyo Paulo, kinnooleelani weera, mwiineliwa vale, etthu opankaawe Kristu khenkela woophwanyihani mureerelo nyuwo.
3 Miyo kinnahima veeli weera yoole ori mulopwana oniineliwa, ontthuneya weera atthareke Nlamulo nootheene.
4 Nyuwo muniilipihera weera muhimmweke okhala naxariya mwaha wootthara nlamulo; moovalaana ni Kristu. Nyuwo mookhootta oreera murima otokweene wa Kristu.
5 Woohima sa hiyo nneettihiwa ni owera* wa Muluku, ninnaweherera vantxipale exariya enkhumelela mwaha wa nroromelo.
6 Vano, wa ale eri oowiiraana ni Kristu Yesu, yiineliwe, ehiineliwe khaiyene etthu, etthu entthuneya, okhalano nroromelo nnooniheriwa ni osivela.
7 Nyuwo mwanneettela ekhaikhai nnene sene. Vanonto, taani owootxeelinheni ovirelela wiiwelela ekhaikhai?
8 Sooxuttiha sa ale enookhoottiherani weettela ekhaikhai, khasinkhuma wa Muluku yoowo owiitthanneni.
9 Efaramenta vakhaaniini ennanyaruwiha ephepa yootheene ya tiriku.
10 Kinnaroromela weera nyuwosa muri atthareli Aapwiya, khamunkela wuupuwelaka moota mukina;* mene ole onooxupani, onoothorihiwa wa moota omphwanelaaya.
11 Asinna ni asirokora, waari weera miyo nlelo kinlaleya* wiineliwa, awosa khayaakela okittharattharaka. Nave, sooxuttiha* saka woohima sa okhwa wa Yesu vamwirini,* khasaakela waakwattulihaka atthu.
12 Miyo kannatthuna weera alopwana yaale eneerera wooxupani, yiithikinle elopwana aya yootheene.*
13 Asinna, nyuwo mwiitthanelinwe otaphuwa. Mene, muhivareleke muteko otaphuwa nno ntoko eparakha weera mpakeke sootthuna sanyu sa erutthu.* Opwaha mwa yeeyo, nsivelo niweerihekeni waavarela muteko atthu akina ntoko akaporo.
14 Woona weera Nlamulo nootheene nlupaanyinwe* ni yooruma emoha ela: “Mmusivele mukhwiinyu ntoko muniisivelaanyuno.”
15 Mene, wakhala weera munoovirelela omanana mukina ni mukhwaawe, ntoko munimweera olumana mukina ni mukhwaawe, mwiiwehexexe* weera olumana wanyu, muheere wiivana mukina ni mukhwaawe.
16 Mene kinnahima weera: Nvireleleke weettihiwa ni munepa wa Muluku, nto mwapaka eyo, khamunkela opakaka sootthuna sa erutthu.
17 Mwaha wooweera sootthuna sa erutthu, ti soovirikana ni sootthuna sa munepa wootteela wa Muluku. Nave-tho, sootthuna sa munepa wootteela wa Muluku, ti soovirikana ni sootthuna sa erutthu. Iya khasinvarihana ekina ni ekhwaaya. Tivawonto nyuwo muhimpakaanyu itthu muntthunaanyu opaka.
18 Opwaha mwa yeeyo, wakhala weera nyuwo muneettihiwa ni munepa wootteela wa Muluku, khamunnyesereriwa-tho otthara Nlamulo.
19 Sootthuna sa erutthu sinnooneya nnene sene. Sootthuna sene sa erutthu tiiya: okonihana woohireerela,* itthu soonanara, mweettelo woonanara onoonihera ohuuliwa muru,*
20 waakokhorela amiluku eethiru, onammunepani,* wiittana, onyakulihana, ehatxe,* wooniherana isara, ohiiwanana, okumihera okawanyeya, otthara sooxuttiha sa atthu,
21 nrima, ohapaliwa, ifeesta soohireerela ni itthu ikina ntoko seiya. Miyo kinnooleelani woohima sa itthu sene seiya ntoko koolenlaakani khalayi weera: Atthu empaka itthu sene seiya, khenvolowa Moomweneni wa Muluku.
22 Nto,* soowiima* sa munepa wootteela wa Muluku, tiiya: Nsivelo, ohakalala, murettele, opixa murima, oreera murima, opaka itthu sooreera, nroromelo,
23 omaala, wiihiiha. Khanaavo nlamulo ninkhoottihera mikhalelo iya.
24 Ni ale eri atthareli a Kristu Yesu, aakhomela vamwirini erutthu aya yoottheka, vamoha ni sootthuna saya ni soowinlela saya.
25 Wakhala weera nneettihiwa ni munepa wootteela wa Muluku, nintthuneya-tho weera nivireleleke weettihiwa ni munepa owo wa Muluku.
26 Nihiweeriheke atthu akina otthuna okuphana* mukina ni mukhwaawe, ni nihikhalelaneke nrima mukina ni mukhwaawe weera nihikhale oowiisoona.
Footnotes
^ Naari: “munepa wootteela.”
^ Naari: “moovirikana ni miyo.”
^ Naari: “kinxuttiha.”
^ Naari: “soolaleya.”
^ Naari: “vamwirini wa nihaaxero.” Nwehe masu oowiiwanyeihiwa.
^ Naari: “yiikhalinhe oohiwera okona ni muthiyana.” Mwa yeeyo ekhale oohiphwanelela okwanihera nlamulo yaattharaaya.
^ Eyo tiiyo, erutthu yoottheka.
^ Naari: “ninkwaniheriwa.”
^ Naari: “mwiikosoope.”
^ Ni Ekereku: “porneía.” Nwehe masu oowiiwanyeihiwa.
^ Ni Ekereku: “asélgeia.” Nwehe masu oowiiwanyeihiwa.
^ Onhela mpuwa okhwiri, anahako. Nwehe masu oowiiwanyeihiwa.
^ Naari: “nrima.”
^ Naari: “Opwaha mwa yeeyo,”
^ Naari: “mikhalelo.”
^ Naari: “owinana.”
