Yaalepelinwaaya Agalata 4:1-31
4 Vano, kinnahima weera, yoohiyeriwa yakhala ya mwaana mukhaanini, nnaamweera itthu sootheene sireene sawawe, owo khanvirikana ni kaporo.
2 Mene owo onlamuleliwa ni atthu enanwehaweha ni enthokorora itthu sawe mpaka nihiku apapawe yaathanliyaaya.
3 Vamoha-moharu-tho, emaara naaraahu anamwane* naalamuleliwa ni mikhalelo sa elapo ela.
4 Ekwanelakaru etempu, Muluku aamurumiha Mwanawe yoowo aayarinwe ni mwali oohipatxeriwa* ni mwaana owo anniiwelela Nlamulo na Mose.
5 Weera anivuluxe hiyo naari akaporo a nlamulo na Mose anithumaka weera nikhale anamwane awe.
6 Woona weera nyuwo anamwane, Muluku oorumiha munepa awe wootteela omwinnyalaawe Mwanawe weera okhale vamurimani vahu, ni munepa owo onnakhuwela weeraka: “Aba,* Tiithi!”
7 Nto nyuwosa vano khaiyene akaporo, mene mwa anamwane a Muluku, ni mwaareene weera anamwane a Muluku, Muluku ohoovahani-tho yoohiyeriwa.
8 Menento emaara mwahaamusuwenlaanyu Muluku, nyuwo mwaari akaporo amiluku eethiru.
9 Mwa yeeyo, vanonto mmusuwenlaanyu Muluku, naari neere, musuwelinwaanyu ni Muluku, munwera moota heeni otthikela weettela itthu sa mulaponi, seethiru, sihinvareleya muteko ni otthuna okhala akaporo a itthu sene seiya?
10 Nyuwo munnuupuwelela mwa nthiti mahiku, minyeeri, etempu ni iyaakha soothanleya.
11 Kinnoova weera wiilipihera waka wookhaviherani okhala wa vasiiyoni vene.
12 Asinna, kinnootxonttelani weera: Mukhale ntoko miyo, woona weera miyo-tho kaari ntoko nyuwo. Nyuwo khamukipakenle etthu yoonanara.
13 Mene musuweleke weera waari mwaha wa ovoreiwa kaakhanlaakano eparakha yoowoolaleerani mitthenka sooreera mwa ekwaha yoopatxera.
14 Ni nnaamweera eretta aka yookumihenreni maxupo, nyuwo khamwaakikosoopa mookiramusa naari khamwaakithannye miyo; mene nyuwo mukaakhenle ntoko nlaika na Muluku, naari ntoko Kristu Yesu.
15 Khalayeene nyuwo mwaari oohakalala. Vanonto ohakalala wanyu iwe ori woowi? Miyo kinnaroromela weera khalayeene nyuwo mwaari oolikaneene mpaka osonyola maitho anyu weera mukivahe miyo, wakhala weera waamutthuneya opaka eyo weera mukikhavihere.
16 Neereke vano miyo kookhala mwiittani anyu mwaha woowooleelani ekhaikhai?
17 Atthu awo ennapaka ele enweraaya weera ekuxe mirima sanyu, mene khaiyene empaka eyo ni yootthuna weera yookhavihereni; opwaha mwa yeeyo, awo empaka eyo weera yoorakameliheni wa miyo weera mwaatthareke yaawo.
18 Mweekhaikhai, ti wooreera weera mutthu iilipihereke okuxa murima anyu ni yootthuna yooreera, ohiya paahi kakhala ni nyuwo, mene mwa etempu yootheene.
19 Anamwane aka oosiveleya, wootthikela-tho okivoreya, onnakivoreyavo ni ovoreya iwo onlikana ni ovoreya onoonaawe muthiyana ohalenle oyara. Ni kineereke ovirelela woona ovoreya nno mpaka nyuwo woonihera mikhalelo sa Kristu.
20 Moota kaatthunaaka okhala viinaano vaava iwo ni nyuwo ni wuuluma woovirikana ni nyuwo, mwaha wooweera miyo nkiniiwexexa etthu enweereelani.
21 Mukileele nyuwo muntthuna otthara nlamulo: Khamusuwenle ele ninhimaaya Nlamulo?
22 Mwa ntakihero, yoolempwa weera Abrahamu aakhalano anamwaane eeli asilopwana, mmoha aayarinwe ni kaporo ni mukina ni muthiyana ootaphuwa;
23 mwaana akaporo aayarinwe ni otthuna wa atthu, mene mwaana a muthiyana ootaphuwa aayarinwe mwaha wa natiri a Muluku.
24 Etthu ela, ethoonyero; woona weera asithiyana ala eeli enthoonyera mavarihano meeli, nivarihano nimoha na omwaako Sinayi nenno nnaakumihera anamwaane weera ekhale akaporo, nivarihano nno ninlikana ni Agari.
25 Agari onthoonyera mwaako Sinayi yoowo ori wArabia, ni mahikwaano ommuthoonyera Yerusalemu yoowo vano ori kaporo vamoha ni anamwane awe.
26 Mene Yerusalemu a wiirimu tootaphuwa ni owo eri ameyahu.
27 Mweekhaikhai, yoolempwa weera: “Muhakalale nyuwo muthiyana oohiyara, ni ohintale omuyara mwaana! Mutthape moohakalala nyuwo muthiyana muhintale woona ovoreya wooyara; woona weera anamwane a muthiyana oohiiwa, khekhweñye waatta waapwaha anamwane a muthiyana ori ni aiyawe.”
28 Vano nyuwo asinnaka, nyuwo anamwane muyarinwe mwaha wa natiri a Muluku, hiihaale ntoko aaraawe Isaki.
29 Mene, ntoko yeereñyaaya etempu ele, mwaana aayarinwe ntoko eñyariwaaya anamwane akina, aapatxera omuttharatthara mwaana aayarinwe ni owera wa munepa wootteela, hiiho-tho, enneereya mahikwaano.
30 Vano Soolepa sinhima eheeni? Sinhima weera “Mmoomole kaporo muthiyana vamoha ni mwanawe mwaamulopwana, woona weera mwaana mwaamulopwana akaporo owo khawa akawana yoohiyeriwa ya mwaana mwaamulopwana a muthiyana ootaphuwa.”
31 Tivanto asinna, hiyo khaiyene anamwane akaporo, mene na anamwane a muthiyana ootaphuwa.
