Yaalepelinwaaya Aefeso 6:1-24
6 Nyuwo anamwane, nwiiweleleke apapinyu ni ameyanyu moovarihana ni otthuna wa Apwiya, woona weera eyo etthu yooreera opaka.
2 “Mwaattittimihe ameyanyu ni apapinyu,” nna nlamulo noopatxera nimphwanyiha mareeliho ala:
3 “Weera itthu sootheene siweettelekeni nnene ni nvirelele okhala mwa mahiku mantxipale elapo ela ya vathi.”
4 Nyuwo asitiithi, muhaanyoonyiheke anamwane anyu, mene mwaahuweke mwaaleelaka yaawo nnene ni mwaaxuttihaka* moovarihana ni moota Yehova* onhimaawe.
5 Nyuwo akaporo, nwiiweleleke mapatarawu anyu* a vathi va, ni mwaattittimiheke ni nwooveke ni murima anyu wootheene, ntoko mummwiiwelelaanyu Kristu,
6 mene muhiwiiweleleke paahi weera mooniwe ni atthu akina, ni weera mwaasivelihe atthu awo; opwaha mwa yeeyo, mukhale oowiiwelela ntoko akaporo a Kristu, mpakaka yootthuna ya Muluku ni murima* wootheene.
7 Munvareleke muteko patarawu anyu* ni yootthuna yooreera, ntoko munanvarela Yehova* ohiya atthu.
8 Ntoko nyuwo munsuwelaanyu, akhale kaporo naari mutthu ootaphuwa, onkela otthuveliwa ni Yehova* moovarihana ni etthu yooreera ompakaawe.
9 Nave nyuwo mapatarawu* mwaakosoopeke nnene anamuteko* anyu muhiwoopopihaka, woona weera moosuwela weera nyuwo vamoha naawo, murino Pwiya mmoharu wiirimu yoowo ohikhanleno nthalu.
10 Vano, Apwiya yoovaheeni owera moorweela mwa ikuru saya itokweene.
11 Nware ikaruma sootheene sa ekhotto sinkhuma wa Muluku, weera nwere owina miraakho sa Diabo ni mukhale oolipa;
12 mwaha wooweera ninwana ekhotto, ni ekhotto eyo khaiyene weera ninwana ni atthu, mene ninwana ni mademooniyu eri wiirimu, yaawo eri anamalamulela ni asitokweene enlamulela elapo ela eri mweepiphini.
13 Tivawonto, nware ikaruma sootheene sa ekhotto sinkhuma wa Muluku, weera nwere onwina mwiittani owo, vaavo onkelaawe oweererakani* ni weera nwere okhala oolipa mpankeene itthu sootheene.
14 Tivanto, mwiilipiheke munwanreene sintu a ekhaikhai muyuununi mwanyu, nave-tho nware yoowara ya eyuuma enkosoopa ekakasa, eri exariya,
15 nave-tho nware isapatu, eyo tiiyo, okhala oolikaneene olaleya mitthenka sooreera sa murettele.
16 Opwaha itthu sootheene iya, mukuxe eskuudu etokweene yoowiisaakiha, nri nroromelo, weera nwere otxipiha mavaka ootheene a mooro a mutakhali.
17 Nave-tho, nware mmuruni mwanyu ekapaseeti, ori ovuluwa, nave mukuxe espaata* ya munepa, eyo tiiyo, masu a Muluku.
18 Etempu yootheene, munvekeleke Muluku moovarihana ni munepa awe, nvarelaka muteko moota wootheene wa mavekelo ni wootxonttela. Vano, mukhale oowehaweha ni muhihiye otxonttela weera ekhaviheriwe ale oororomeleya.
19 Mukivekeleleke-tho miyo, weera emaara kinkelaaka wuuluma* kiwereke wuuluma moolipa murima vaavo kinkelaaka waasuweliha atthu esiiri ya Muluku ya mitthenka sooreera,
20 Muluku okiruminhe miyo olaleya mitthenka iya sooreera. Tivanto, kitthukinwaaka ni ikorenti iya. Mukivekeleleke miyo wa Muluku weera kiwereke wuuluma woohima sa mitthenka sooreera ntoko omphwanelelaaya woohoova.
21 Tikhiko ori munna oosiveleya ni murumeyi oororomeleya Aapwiya, onimoosuwelihani woohima sa miyo ni moota itthu sinkeettelaaya.
22 Tivawonto kimmurumihaaka owa iwo nyuwo muraanyu weera ooleeleni moota hiyo nraahu ni weera alipihe mirima sanyu.
23 Murettele ni nsivelo vamoha ni nroromelo, ninkhuma wa Muluku Tiithi, ni wa Pwiya ahu Yesu Kristu nikhale ni nyuwo asinna.
24 Oreera murima otokweene wa Muluku okhale ni atthu ootheene ale emmusivela Pwiya ahu Yesu Kristu woohihiyerereya.
Footnotes
^ Naari: “mwaavahaka miruku.”
^ Ni Ekereku: “atthu.” Naari: “yaale munaavarelaanyu muteko, asipwiya anyu.”
^ Ni Ekereku: “ekumi.” Nwehe masu oowiiwanyeihiwa.
^ Naari: “ole munanvarelaanyu muteko, pwiya ayu.”
^ Naari: “asipwiya, munvareliwa muteko.”
^ Naari: “akaporo.”
^ Ni Ekereku, nihiku nooxupa.
^ Naari: “ekatana.”
^ Naari: “ohula eyano aka.”
