Yaalepelinwaaya Aefeso 4:1-32
4 Tivawonto, miyo Paulo kitthukinwe mwaha wa Apwiya, kinnootxonttelani weera mukhaleke moovarihana ni moota mwiitthanelinwaanyu,
2 mukhaleke oowiiyeviha ni oomaala, nave-tho oopixa murima nvilelanaka mukina ni mukhwaawe, musivelanaka.
3 Mwiilipihereke weera nvirelele okhala oowiiraana, mukhalakano murettele mukina ni mukhwaawe.
4 Eri erutthu emoha, ni munepa wootteela mmoha wa Muluku, ntoko hiiho yooweherera eraaya emoha yeeyo nyuwo mwiitthanelinwaanyu;
5 ori Pwiya mmoha, nroromelo nimoha, ni opatiso mmoha;
6 Muluku ori mmoha yoowo ori Tiithi aatthu ootheene, owo mutokweene opwaha itthu sootheene, nave onnavara muteko aavarelaka muteko atthu ootheene, ni onnavarela muteko ikuru sawe weera apake itthu sootheene.
7 Yoole ori mutthu a hiyo, aakhenle oreera murima otokweene wa Muluku moovarihana ni moota Kristu onvanhaawe oreera murima iwo.*
8 Soolepa sinhima weera: “Owo awelakaru osulu, aahaataphula ootthukiwa, ni ohaarumiha* atthu awo ntoko mareeliho.”*
9 Vano, masu ooweera “owo aawela” entaphulela eheeni? Entaphulela weera owo aakhuruwela elapo ya vathi.
10 Yoole aawiiye elapo ela ya vathi, oowela-tho nipuro noosuluxa,* weera apake* itthu sootheene.
11 Ni owo ohaavaha akina okhala arummwa, akina maprofeta, akina anamalaleera,* akina akukhuli ni akina anamahusiha.
12 Owo opanke hiiho weera, aweerihe* ale oororomeleya weetta mooreerela, evaraka muteko wookhavihera ni olipiha erutthu ya Kristu,
13 awo enoopaka eyo mpaka ootheene hiyo nikhaleno nroromelo nimoha ni nimusuwele nnene Mwaana a Muluku. Weera nikhale atthu atokweene emmwaattamela Kristu mwa mikhalelo sootheene.
14 Nto, nihikhaleke ntoko anamwane, eyo tiiyo, niheereke otthara paahi sooxuttiha soowootha sa atthu enaawoka akhwaaya, weera nihikhaleke ntoko paarku ori mphareya yoowo onkakheliwa ninno-ninno ni epheyo vamoha ni mutekuteku wa maahi.
15 Menento, nihimeke ekhaikhai, nihiyeke nsivelo nneerihaka wunnuwa mwa itthu sootheene moovarihana ni Kristu, ori muru.*
16 Moorweela mwa yoowo, erutthu yootheene ennavarana nnene, ni yeele eri eparte ennakhavihera erutthu. Vano, yeele eri eparte ya erutthu yaavaraka nnene muteko aya, eyo ennakhavihera erutthu okhala yoowunnuwa ni yoolipa mwa nsivelo ni weera erutthu yootheene ekhale yoolipa mwa nsivelo.
17 Tivawonto kinooleelaakani ni kinwoopereraakani mwa Apwiya weera: muheetteke ntoko eneettaayano atthu oohiroromela yaawo entthara minyuupuwelo saya soonanara.
18 Awosa muupuwelo aya oneettihiwa ni epiphi ni aarakamela ekumi Muluku onvahaawe, woona weera awo khentthuna omusuwela Muluku mwaha woohitthuna waya wiiwa.
19 Atthu ene yaawo aahiya weettela mikhalelo sootheene sooreera, khenuuliwa muru, nave ennatthara mweettelo woohireerela onoonihera ohuuliwa muru,* ennapaka itthu sootheene soonanara ehikwaneyaka.
20 Nyuwosa mooxuttera ni moosuwela weera Kristu khampaka hiiho,
21 Yesu oxuttinhe ekhaikhai, waari weera nyuwo mwiiwale ni muxuttihinwe ni yoowo, tthiri nyuwo moosuwela nnene itthu sene seiya.
22 Nyuwo mooxuttihiwa weera muntthuneya ohiya omutthu wa khalayi yoowo onvarihana ni mweettelo anyu wa khalayi, mwaha wooweera soopaka sanyu sa khalayi ti soonanara woona weera mwaawokiwa ni sootthuna sanyu.
23 Ni nvirelele oreherera* mukhalelo anyu woowuupuwela
24 ni nware omutthu onyowani yoowo opakinwe ni yootthuna ya Muluku mwa exariya ya ekhaikhai ni ororomeleya.
25 Vanonto, woona weera moohiya wootha, muulumeke ekhaikhai mukina ni mukhwaawe, woona weera nri atthu nneerela eparte erutthu emoha.
26 Munyoonyiweke, menento muhittheke. Muhihiye nsuwa nneelaka ninlelo mureene oonyoonyiweene;
27 weera muhinvahe eparakha Diabo.
28 Ole ori namwiiya, ahiye wiiya; opwaha mwa yeeyo, iilipihereke ovara muteko wooreera ni matata awe weera akhaleno etthu yoowaavaha ale enhaawela.
29 Mmwaano mwanyu ehikhumeke masu oonanara, mene muulumeke itthu sooreera sinaalipiha atthu ntoko onreerelaaya, weera ale enwiiwelelani ewere ottottela mureerelo.
30 Muhiriipihe murima wa Muluku, mukhoottaka munepa wootteela yoowo mwiiyaatherinwaanyu ntoko ethoonyero ya nihiku munkelaanyu ovuluxiwa.
31 Muhiye mukhalelo wa oruttu,* owali, onyoonyiwa, waakhulana, masu ooruwana vamoha ni mikhalelo sootheene soonanara.
32 Mene mureerelaneke murima mukina ni mukhwaawe, mmorelaneke ikharari mukina ni mukhwaawe, mulevelelaneke mukina ni mukhwaawe moomalela hiiho ntoko Muluku oolevelenlaaweni moomalela moorweela mwa Kristu.
