Yaalepelinwaaya Aefeso 2:1-22
2 Nnaamweera khalayi mwaari ookhweene mwaha wa soottheka sanyu, Muluku ohoovahani ekumi.
2 Khalayi, nyuwo mwaakhala moovarihana ni elapo ela, ni mwannapaka itthu namalamulela a elapo ela ontthunaawe. Owo onnalamulela munepa* onweettiha atthu oohiiwelela ni onnamwara-mwareya ntoko epheyo.
3 Mweekhaikhai, ootheene hiyo neetta moovarihana ni sootthuna sa erutthu ahu, nipakaka itthu erutthu ahu yaatthunaaya ni naapaka itthu moovarihana ni minyuupuwelo sahu. Ovinyera eyareliwo ahu, naaphwanela Muluku onnyoonyeriwa hiyo* ntoko atthu akina.
4 Mene, Muluku toomoriwa ikharari vantxipale ni mwaha wa onisivela wawe vantxipale,
5 owo oonivaha ekumi vamoha ni Kristu, nnaamweera hiyo naakhwiiyeene mwaha wa soottheka sahu. Nyuwosa moovuluxiwa mwaha wa oreera murima otokweene wa Muluku.
6 Opwaha mwa yeeyo, Muluku oonikhaliha akumi ni oonivaha nipuro nookilaathi wiirimu, mwaha wooweera ooniiraaniha ni Kristu Yesu,
7 Muluku ompaka eyo weera elapo enyowani enwa,* owo oonihere oreera wawe murima vantxipale, anipakela vale itthu sooreera, hiyo nri oowiiraana ni Kristu Yesu.
8 Nto mwaha wa oreera murima otokweene iwo wa Muluku, nyuwosa moovuluxiwa mwaha wa nroromelo, mene, ovuluxiwa wanyu iwo khaiyene nwenre mwaha wa ikuru sanyu; mene, owereñye mwaha wa yoovaha ya Muluku.
9 Ovuluxiwa nno, khokhumelenle mwaha wa miteko sanyu, eyo yeereñye weera ahikhale mutthu aneera akhaleno mathowa oowiittottopela.
10 Hiyo nipakinwe ni Muluku, owo onipanke weera nivareke miteko sooreera seiyo Owo aareherenraawe weera nivareke, mwaha wooweera na atthareli a Kristu.
11 Vano, muupuweleke weera nyuwo khaiyene muyuda, ni weera, ale “yiinelinwe” ni atthu, enwiitthanani nyuwo mutthu “oohiineliwa.”
12 Etempu eyo, nyuwo khamwaamusuwenle Kristu, ni mwaamwalana ni nloko na ana a israeli ni khamwaasuwenle nivarihano ni yoolaihera Muluku aavanhaawe* atthu awe. Mwaakhala elapo ela muhikhanleno yooweherera ni khamwaamusuwenle Muluku.
13 Mene, moowiiraana ni Kristu Yesu, nyuwo khalayi mwahaamusuwenle Muluku, vano, moomusuwela mwaha wa ephome ya Kristu.
14 Woona weera owo, murettele ahu ni ti yoowo iiraaninhe ikhurupu piili ekhala emoha, ni ti yoowo onyaanyale exiri* yeeyo yaamwalanyiha ayuda ni atthu ehikhanle ayuda.
15 Aveleelakaru erutthu awe, owo oomaliha ikano ni soowooperera saari Munlamuloni na Mose. Nlamulo nene ti nenna naakumihera wa ikhurupu iya piili. Avinyaka vaavo, ohaakuxa atthu awo aahela* ekhurupu emoha enyowani. Mweekhaikhai, ikhurupu iya piili, atthareli awe. Nto Kristu oowiiraaniha atthu awo,*
16 ni moorweela mwa okhwa wawe vamwirini wa nihaaxero,* ookhavihera ikhurupu iya piili okhalano murettele ni Muluku ntoko erutthu emoha, ni owo oomala-maliha ohiiwanana waya.
17 Wa ale yaari oorakamelana ni yoowo, owo aahoowa ni aahaalaleera mitthenka sooreera sa murettele, ni woohima sa ale yaari vakhiviru, owo aalalenre murettele;
18 eyo eneereya hiiho mwaha wooweera moorweela mwa makeyaawe, onnawereya ootheene hiyo nri ikhurupu piili iya waavekela Atiithi a wiirimu, mwaha wooweera ootheene hiyo naakhenle munepa wootteela mmoha paahi.
19 Vano, nyuwo khamuhiyene atthu oohisuweliwa naari anamarwa, mene vano nyuwo muri vamoha ni ale oororomeleya ni munneerela eparte emusi ya Muluku.
20 Nyuwosa moolipihiwa va alserseni,* eyo tiiyo, arummwa ni maprofeta, nto woohima sa Kristu Yesu, owo nluku noolipiha empa ya alserse owo.
21 Ni moovarihana ni owo, empa yootheene, iparte sootheene, siri soowiiraana ni sinnakela vahoolo weera ekhale etemplu yootteela ya Yehova.*
22 Mwaha wooweera nyuwo muri oowiiraana vamoha ni Kristu, Muluku ohookhalihani nyuwo vamoha ni atthu akina empa owo onkhalaawe mwaha wooweera munepa awe wootteela ori ni nyuwo.
Footnotes
^ Munepa onhimmwa va, onhimmwa moota woowuupuwela wa atthu.
^ Naari: “waakhela esara ya Muluku.”
^ Naari: “itempu sa muhoolo.” Nwehe masu oowiiwanyeihiwa.
^ Naari: “aalaihenraawe.”
^ Eyo tiiyo, mukuso waari variyari.
^ Naari: “ookuxa ikhurupu iya piili anahela.”
^ Naari: “ohiiraaniha ikhurupu iya piili.”
^ Nwehe masu oowiiwanyeihiwa.
^ Naari: “vamathipeloni.”
