Yaalepelinwaaya Aefeso 3:1-21
3 Vano, miyo Paulo, kitthukinwe mwaha wookhala mutthareli a Kristu Yesu, ni mwaha woowoolaleerani nyuwo atthu a maloko makina* mitthenka sooreera woohima sa Kristu Yesu . . .*
2 Moohihovela, nyuwo mohiiwa weera miyo kohaakhela muritti woowookhaviherani nyuwo ottottela mureerelo oreera murima otokweene wa Muluku.
3 Ni weera, moorweela mwa yoowooniheriwa, koosuwelihiwa esiiri ya Muluku. Ntoko koolepenlaakani mwa mukwasu.
4 Nto, mwaasomaka vale ekaarta ela, munimoonelela moota miyo kiniiwexexaaka esiiri ya Muluku emmuhima Kristu.
5 Esiiri ela ya Muluku, khayaasuwelihinwe maloko akhalayi, ntoko esuwelihinwaaya mahiku ano arummwa oororomeleya ni maprofeta a Muluku moorweela mwa munepa awe wootteela,
6 esiiri ene ya Muluku tiila: atthu ale ehikhanle ayuda eri oowiiraana ni Kristu Yesu, enoohiyeriwa* yoohiyeriwa emoharu Kristu oraaweno ni enkela weerelaka eparte erutthu emoha. Awosa enimwaakhela itthu imoha-moharu Muluku onilaihenraawe mwaha wa mitthenka sooreera.
7 Miyo kookhala murumeyi a esiiri ela ya Muluku, mwaha wa oreera murima otokweene wa Muluku. Owo okivanhe yoovaha* ela avarelaka muteko owera wawe.
8 Nnaamweera miyo kireene murumeyi ooyevaxa variyari va arumeyi oororomeleya, koovahiwa muritti moorweela mwa oreera murima otokweene wa Muluku weera kaalaleereke mitthenka sooreera atthu ehikhanle ayuda woohima sa mareeliho Kristu onvahaawe.
9 Miyo kintthuna oweeriha atthu woona moota Muluku yoowo opattunxe itthu sootheene onooniheraawe esiiri awe. Yeeyo aasunkaawe* mwa etempu yintxipale.
10 Muluku opanke eyo weera vano, moorweela mwa muloko, ikuvernu ni anamalamulela* eri wiirimu esuwele osuwela wawe,* weiwo onooneya mwa mikhalelo sintxipale soovirikana.
11 Eyo ennavarihana ni yootthuna yoohimala aaraaweno, yootthuna eyo enkela okwanihereya moorweela mwa Kristu Yesu Apwiya ahu.
12 Ni ti moorweela mwa yoowo, nikhanlaahuno otaphuwa nno, woowuuluma ni omwaattamela Muluku mootaphuwa ni moohihovela, mwaha wooweera ninnamuroromela Kristu.
13 Tivanto, kinnoovekelani weera muhikhulumuwe mwaha wa maxupo kinvirihaaka weera kookhavihereni.* Woona weera maxupo awo enneeriha nyuwo ottottopeliwa.
14 Tivanto kinkokhoraaka ohoolo wa Atiithi,
15 mwaha wooweera ti yoowo okumihenre* imusi sootheene wiirimu nave elapo ya vathi.
16 Kinnanvekela Muluku weera moorweela mwa ovuwa wawe otokweene, alipihe mirima sanyu avarelaka muteko munepa awe.
17 Ni weera Kristu vamoha ni nsivelo nikhale vamurimani vanyu moorweela mwa nroromelo nanyu, ni yootthuna weera nyuwo mukhaleno mikakaari ni mulipihiwe va alseerseni,
18 weera nyuwo nwere wiiwexexa nnene sene, mookhuveyani, mweerakameloni, orakama waya, ni wiixera waya, ntoko eniiwexexaayano atthu ootheene oororomeleya,
19 ni weera musuwele osivela wa Kristu weiwo ompwaha osuwela wootheene. Hiiho nyuwo munookhalano itthu sootheene sooreera Muluku onvahaawe.
20 Muluku onnikhavihera hiyo avarelaka muteko owera wawe, pooti owera opaka itthu sintxipale opwaha iye ninvekelaahu naari nnuupuwelaahu.
21 Tivawonto, owo onnaphwanela ovuwihiwa mwaha wa muloko ni mwaha wa Kristu Yesu mahiku ootheene. Amem.
Footnotes
^ Naari: “ehikhanle ayuda.”
^ Masu ala enkhala ntoko ennavirerelela eversu 14.
^ Naari: “enoovahiwa.”
^ Naari: “yoovaha ya mahala.”
^ Naari: “aavinthaawe.”
^ Ikuvernu ni anamalamulela enhimmwa va, apaale enhimmwa malaika a wiirimu.
^ Naari: “wa Muluku.”
^ Naari: “muttottele mureerelo.”
^ Ni Ekereku: “ovanhe nsina.”
