Yaalepelinwaaya Aefeso 1:1-23
1 Miyo Paulo, ni yootthuna ya Muluku, kamurummwa a Kristu Yesu, ekaarta ela kinaalepela ale oororomeleya a miloko sa wEfeso, ni eri atthareli oororomeleya a Kristu Yesu:
2 Oreera murima otokweene wa Muluku ni murettele wa Muluku, Tiithi ahu, ni wa Apwiya Yesu Kristu, okhale ni nyuwo.
3 Munvuwihe Muluku yoowo ori Tiithi Aapwiya ahu Yesu Kristu. Mwaha wooweera owo oonivaha hiyo nri atthareli a Kristu mareeliho ootheene enkhuma wiirimu avarelaka muteko munepa awe.
4 Woona weera, Muluku onithanliye weera nikhale oowiiraana ni Kristu elapo ehinaaye opattuxiwa, weera nikhale ootteela, ni oohittheka ohoolo wawe, mwaha woomusivela Muluku.
5 Tivanto, moovarihana ni yootthunaawe ni ele yaamusivela, Muluku oothanla mwaneene awe weera nikhale anamwane awe moorweela mwa Yesu Kristu,
6 eyo yeereñye weera atthu envuwiheke Muluku, woona weera owo onvarela muteko Mwanawe ommusivelaawe ni yootthuna weera anoonihere hiyo oreera wawe murima otokweene.
7 Oreera murima wa Muluku, otokweene! Mwaha wa Muluku oliva nlivo moorweela mwa ephome ya Mwanawe, ephiro yoohuliwa weera nivuluxiwe, naari neere, weera soottheka sahu sileveleliwe.
8 Owo oonoonihera vantxipale oreera wawe murima ni oonivaha osuwela wootheene ni miruku* sooreera
9 anisuwelihaka esiiri ya Muluku ya ele ontthunaawe. Etthu eyo, ennavarihana ni ele emmusivela ni ontthunaawe opaka
10 yootthunaawe ti yooweera akumihere moota wooweettiha itthu, yeeyo enkela weereya omamaliheroni wa etempu othanliyaawe. Owo onoothukumanya itthu sootheene mwa Kristu: itthu siri wiirimu ni itthu siri valaponi. Aani, mwa yoowo,
11 nraahu oowiiraana ni nithanlelinwaahu yoohiyeriwa, owo aanithanla varaatxiru moovarihana ni yootthunaawe. Owo onnathanla okwanihera itthu sootheene moovarihana ni yootthunaawe.
12 Hiyo toopatxera onweherera Kristu, ni Muluku oonithanla weera nimuttottopeleke mwaha wa otokweene awe.
13 Nyuwosa-tho, mwannanweherera Kristu. Mwiiwakaru masu a ekhaikhai, eyo tiiyo, mitthenka sooreera woohima sa ovuluxiwa wanyu. Nave-tho, moorweela mwa Kristu, Muluku ohoohelani ethoonyero avarelaka muteko munepa awe wootteela aalaihenraawe, owo opanke eyo mmuroromelakaru Kristu.
14 Munepa wootteela onkhala ntoko natiri onoonihera weera hiyo nnimwaakhela ele Muluku onilaihenraawe.* Muluku opanke eyo weera aavuluxe atthu awe moorweela mwa nlivo. Ni etthu eyo, enimweeriha weera Muluku avuwihiwe.
15 Tivawonto, ovinya emaara kiiwalaaka woohima sa waaroromela wanyu Apwiya Yesu ni nsivelo nootheene munwooniheraanyu atthu ootheene oororomeleya,
16 nkihiñye omuxukurela Muluku mwaha wa nyuwo. Ni kinnavirelela wooromolani mmavekeloni mwaka,
17 weera Muluku oovuwa, ori Tiithi Aapwiya ahu Yesu Kristu, oovaheeni osuwela ni wiiwexexa itthu onooniheraawe.
18 Muluku onnahula mirima sanyu weera nyuwo nwereke woona ni osuwela yooweherera owo owiitthanenlaaweni, ni itthu sootepa oreera owo aalaihenraawe atthu oororomeleya.
19 Ni weera nyuwo, musuwele owera otokweene owo onoonihenraawe hiyo nri atthareli a Kristu. Owera iwo, wooneñye moorweela mwa itthu owo opankaawe avarelaka muteko owera wawe otokweene,
20 ni owera wene weiwo, ti weiwo owo ovarenlaawe muteko weera anvinyererihe Kristu mookhwaani, ni wiirimu Owo oomukilaathiha moono woolopwana.
21 Weiwo, owo oomukhaliha mutokweene opwaha ikuvernu sootheene, otokweene wootheene, owera wootheene, olamulelo wootheene, ni masina ootheene, ohiya paahi elapo ela,* mene-tho elapo enwa.
22 Nave-tho, Muluku onvaha owera woolamulela itthu sootheene, ni oomukhaliha muhooleli a itthu sootheene sinvarihana ni muloko,
23 yoowo ori erutthu awe, osareñye itthu simmuhima yoowo. Kristu owo onnakwanihera itthu sootheene.
Footnotes
^ Naari: “minyuupuwelo.”
^ Naari: “onroromelinhaawe.”
^ Enhimmwa emalihero ya itthu soonanara sa elapo ela. Nwehe masu oowiiwanyeihiwa.
