Yaalepelinwaaya Aefeso 5:1-33
5 Mwa yeeyo, mmutakiheke Muluku, ntoko anamwane awe oosiveleya,
2 ni nvireleleke woonihera nsivelo, hiiho ntoko Kristu-tho onisivenlaawe hiyo,* ni iivaherenraawe ntoko makeya mwaha wa hiyo ni yoovaha yoowinkhela ohoolo wa Muluku.
3 Okonihana woohireerela,* mikhalelo sootheene soonanara, ni ohikwaneya, mikhalelo sene seiya, sihiromoliwe variyari vanyu. Mwaha wooweera owo khaiyene mukhalelo enooniheraaya atthu oororomeleya,
4 naari mukhalelo woohoona wuuliha muru, matthekulelo aalolo, naari iperwa soohuureya, eyo tiiyo, itthu soohireerela; mene, muulumeke masu oomuxukurela Muluku.
5 Nyuwosa moosuwela ni munniiwexexa nnene weera: khaavo mutthu onkonihana woohireerela,* ompaka itthu soonanara, naari oohikwaneya, eyo tiiyo, onaakokhorela amiluku eethiru, oneera okhaleno yoohiyeriwa Moomweneni wa Kristu ni wa Muluku.
6 Ahikhale mutthu onoowokani ni masu eethiru, mwaha wooweera itthu sene seiya simmweeriha Muluku waanyoonyeriwa ale ehimmwiiwelela.
7 Tivawonto, muhipakeke itthu awo empakaaya;
8 woona weera nyuwo mwaari epiphi, nto vano muri ntoko muthuko mwaha wooweera munaatthara Apwiya. Nvirelele weetta ntoko anamwane a muthuko,
9 mwaha wooweera okhala moovarihana ni muthuko ontaphulela okhala ooreera murima mwa itthu ni mikhalelo sootheene, okhala axariya ni okhala moovarihana ni ekhaikhai.
10 Nwehexexeke woohihiyerereya weera moone waari weera soopaka sanyu sinnaasivela Apwiya naari hooye.
11 Muhiye ovara miteko sa weepiphini seiyo sihinvareleya muteko, mene mweereke woonihera weera ti soonanara.
12 Woona weera itthu awo empakaaya weephiini ti soowuuliha muru, mpaka khasimphwanela oromola.
13 Vano, waara onnamwaleela itthu soonanara, nto mwaha wa yeeyo, itthu soonanara sinnooniheriwa ni waara iwo.
14 Tivanto eneeriwaaya weera: “Nvinye nyuwo munkona, ni nkavinyani mookhwaani. Nto Kristu onkela woomwaleelani.”
15 Mwa hiiho, nwehexexeke nnene moota muneettaanyu, weera muheetteke ntoko alolo, mene ntoko atthu a miruku,
16 nvarelaka muteko nnene etempu anyu,* woona weera mahiku ala toonanara.
17 Muhiye okhala atthu oohikhala miruku, mene mwaasaaseke osuwela ele emmusivela Yehova.*
18 Opwaha mwa yeeyo, muhihapaliweke, mwaha wooweera ohapaliwa onnamweeriha mutthu opaka itthu soohuureya, mene musareye munepa wootteela.
19 Mulipihaneke mukina ni mukhwaawe mwiipaka itxipo sa masalmu, munvuwihaka Muluku mwiipaka itxipo soomukokhorela Muluku. Mmwiipele Yehova* ntoko muniipa itxipo vamurimani vanyu.
20 Opwaha mwa yeeyo, mmuxukureleke Muluku mwaha wa itthu sootheene moorweela mwa nsina na Apwiya ahu Yesu Kristu.
21 Mwiiwelelaneke mukina ni mukhwaawe, mwaha woomuttittimiha wanyu Kristu.
22 Muthiyana ootheliwa awiiweleleke aiyawe, ntoko hiiho onwiiwelelaawe Apwiya,
23 mwaha wooweera mulopwana oothela ori muhooleli aamwaarawe,* hiiho ntoko Kristu oraawe muhooleli a* muloko ni nvuluxa a erutthu ela.
24 Hiiho ntoko muloko ommwiiwelelaaya Kristu, muthiyana ootheliwa-tho ontthuneya weera awiiweleleke aiyawe mwa itthu sootheene.
25 Nyuwo mulopwana oothela, nvireleleke waasivela amwaarinyu ntoko hiiho Kristu onsivelaawe muloko, aveleela ekumi awe mwaha wa muloko owo.
26 Owo opanke eyo atteelihaka muloko ni areerihaka ni masu a Muluku, ntoko onrapiha ni maahi.
27 Weera muloko okhale wootteela vamaithoni vawe, woohikhalano nlepa, woohikhalano mahinyaari naari woohikhalano etthu ekina yoonanara, mene okhale wootteela ni woohikhalano nthowa.
28 Vamoha-moharu, mulopwana oothela ontthuneya weera aasiveleke amwaarawe ntoko onsivelaawe erutthu awe. Mulopwana onaasivela amwaarawe, onniisivela mwaneenaawe,
29 woona weera khaavo mutthu* oniitta erutthu awe; mene owo onnatxiha ni onnakosoopa, ntoko hiiho Kristu oneerelaawe muloko.
30 Mwaha wooweera hiyo nneerela eparte ya erutthu awe.
31 “Tivawonto, mulopwana onkelaawe waahiya apapawe ni ameyawe ni onrowa okhala vamoha ni amwaarawe, ni ooweeli aya, enrowa okhala erutthu emoha paahi.”
32 Esiiri ela ya Muluku kinhimaaka, etokweene. Esiiri ene, woohima sa Kristu ni muloko.
33 Tivanto, mutthu ti mutthu a nyuwo aasiveleke amwaarawe, ntoko oniisivelaawe mwaneenaawe; nave-tho muthiyana ootheliwa ontthuneya weera aattittimiheke vantxipale aiyawe.
Footnotes
^ Apaale: “oosivenlaaweni nyuwo.”
^ Ekereku: “porneía.” Nwehe masu oowiiwanyeihiwa.
^ Nwehe masu oowiiwanyeihiwa.
^ Ni Ekereku: “muthumaka etempu.”
^ Naari: “muru wa amwaarawe.”
^ Naari: “muru wa.”
^ Naari: “mulopwana.”
