Ekaarta yoopatxera ya Timotiyu 6:1-21
6 Woohima sa ale eri akaporo, yaattittimiheke mapatarawu* weera nsina na Muluku ni sooxuttiha sawe sihuulummweke onyala.
2 Opwaha mwa yeeyo, woohima sa ale enanvarela muteko munna, entthuneya weera ehimusasaaliheke* mwaha wookhala munna. Ohiya opaka eyo, awo entthuneya weera evareke muteko nnene sene mwaha wooweera mutthu onttottela mureerelo muteko awo envaraaya, munna oosiveleya emmukokhorelaayano Muluku vamoha.
Nvireleleke oxuttiha itthu iya ni nwooperereke opaka itthu iya.
3 Akhala mutthu onxuttiha sooxuttiha ikina ni ahinaakhulela miruku sooreera* sinkhuma wa Apwiya ahu Yesu Kristu, naari ahinaakhulela sooxuttiha sinoonihera moota wonvarela muteko Muluku,
4 mutthu owo onniisunnuwiha vantxipale ni khaniiwexexa etthu. Mutthu owo omusivela ovaanyihana ni onyakulihana woohima sa masu. Itthu iya sinnaweeriha atthu okhalano nrima, onyakulihana, owuuluma moohireerela* atthu akina, ni khenaaroromela atthu akina,
5 itthu iya-tho sinnaweeriha atthu ale erinono minyuupuwelo soonanara ni ehiniiwexexa ekhaikhai, onyakulihana veeli-veeli woohima sa nyaha sahaaphwanela onyakulihana,* awosa enoona weera mwaha wonvarela muteko Muluku, onimwaaphwanyiha mureerelo.
6 Mweekhaikhai, wakhala weera mutthu onnamukokhorela Muluku ni onnahakalala ni itthu oraaweno, mutthu owo onnaphwanya mireerelo sintxipale.
7 Woona weera emaara naayariwaahu khanaawiihale etthu. Nave-tho, emaara yeeyo ninkhwaahu khaninkuxa etthu vamoha ni hiyo.
8 Hiiho, wakhala weera nookhalano yootxa ni soowara,* nnookhala oohakalala mwaha wa itthu iyo.
9 Menento, woohima sa atthu ale entthuna okhala a muhakhu, enneereriwa ni ennamorela vamuraakhoni wootthuna itthu sintxipale sihikhanle sootthuneya ni soonanara seiyo sinaakumihera maxupo ni okhwa.
10 Osiveliwa musurukhu mukakaari wa itthu sootheene soonanara; tivawonto, atthu antxipale mwaha woosiveliwa ni musurukhu aahiya ororomela ni ahiikumihera maxupo mantxipale.
11 Mene nyuwo mummukokhorela Muluku, mutthaweke itthu sene seiya. Menento, mwaasaaseke exariya* ni onvarela muteko Muluku, nroromelo, nsivelo, ovilela ni okhalano murima woomaala.
12 Nwane ekhotto moowiilipihera weera mwaakihere nroromelo na ekristu. Nvarexexeke ekumi yoohimala yeeyo mwiitthanelinwaanyu ni Muluku ni ekumi mulaleñyaanyu ohoolo wa anamoona antxipale.
13 Ohoolo wa Muluku yoowo onkhaliha ikumi itthu sootheene, ni wa Kristu Yesu yoowo ohelenle onamoona wooreera ohoolo wa Ponsio Pilatu, kinnawoopererani weera:
14 mwiiweleleke nlamulo moomalela ni woohikhalano nthowa mpaka emaara Apwiya Yesu Kristu enkelaaya wiisoonihera.
15 Owo toohakalala ni Pwiya Oowera, onimwiisoonihera etempu yoophwanelela. Owo Mwene a mamwene enlamulela ni Pwiya aasipwiya enlamulela,
16 owo khankhwa ni onkhala mapuro oovuwa atthu ehinweraaya ophiyavo, mapuro ene yaawo khaavo mutthu otonko woona naari khenooniwa. Yoowo avahiwe nttittimiho ni owera wa mahiku ootheene. Amem.
17 Mwaavahe miruku* ale eri anamuhakhu elapo ela* weera ehikhaleke oowiisunnuwiha* ni weera yooweherera aya ehilipeke ni mihakhu simmala, mene elipeke ni Muluku yoowo onnikhaliha a muhakhu, anivahaka itthu sootheene seiyo sinneeriha okhala oohakalala.
18 Mwaaleele-tho weera epakeke itthu sooreera, ni ekhale anamuhakhu mwa miteko sooreera, ekhalaka oovaha ni ekawanaka itthu eraayano ni atthu akina,
19 opaka eyo, onkela olikanaka ni wiithukumanyera mihakhu sinkhuma wa Muluku. Eyo entaphulela weera ennampaka alserse ooreera a muhoolo weera evarexexe ekumi ya ekhaikhai.
20 Nyuwo Timotiyu, muhihiye etthu mwaakhenlaanyu wa Muluku. Muhiiweleleke masu a eethiru enanvirikanyiha Muluku ni minyuupuwelo sa atthu eniihima okhala “oosuwela”, mene osuwela waya onnavirikanyiha ekhaikhai.
21 Mwaha wootthara sooxuttiha sa atthu ntoko awo, atthu akina aahiya ororomela.
Oreera murima otokweene wa Muluku okhale ni nyuwo.
Footnotes
^ Naari: “ale enaavarelaaya muteko.”
^ Naari: “emuttittimiheke.”
^ Naari: “soovareleya muteko.”
^ Naari: “owoothera, masu ooveeha.”
^ Naari: “mikhaanini.”
^ Apaale: “nipuro.” Ni Ekereku: “etthu yoowiikhuneela.”
^ Nwehe masu oowiiwanyeihiwa.
^ Naari: “Nwooperere.”
^ Nwehe masu oowiiwanyeihiwa.
^ Naari: “oowiisoona.”
