Ekaarta yoopatxera ya Timotiyu 4:1-16
4 Masu oowuupuxeriwa ni Muluku* yaahima khalayiru moowiiwanyeya weera muhoolo, yamphiya etempu atthu akina yaakelaaya ohiya ororomela, yiiweleleke mitthenka soowootha seiyo sinkhala ntoko sinkhuma wa Muluku. Nave yaamukela wiiwelela itthu mademooniyu enxuttihaaya,*
2 ewiiwelelaka anamootha yaawo murima aya olepeleleñye ntoko ohisinwe ni eyuuma yooviha.
3 Awo ennaakhoottihera atthu othelana ni ennaalamula atthu weera ehitxeeke sootxa seiyo Muluku opattunxaawe weera etxeeke ale erino nroromelo ni osuwela wa ekhaikhai emuxukurelaka Muluku.
4 Soopattuxiwa sootheene sa Muluku ti sooreera, khiyaavo ya yeeyo nneeraahu nikhootteke naakhelaru ni mavekelo ni oxukurela,
5 woona weera sootteelihiwa ni masu a Muluku ni mavekelo.
6 Mwaavaha asinna miruku iya, nyuwo munookhala murumeyi oororomeleya a Kristu Yesu, yoowo onooxuttihani masu enookhaviherani okhalano nroromelo, yaawo nyuwo munttharaanyu moororomeleya.
7 Mwa yeeyo, musepeke soohimmwa soowootha seiyo sinanveeha Muluku, seiyo enhimaaya asithiyana akina oowuuluvala. Opwaha mwa yeeyo, mukhaleno yooluluwanya ya omoova Muluku ni moonihereke eyo.
8 Mutthu ontthimaka onnakhavihera erutthu awe okhala yoolipa, mene khenlipa wa mahiku ootheene. Menento ororomeleya onnamukhavihera mutthu wa mahiku ootheene, woona weera onnamphwanyiha mareeliho viinaano va ni onimwaakhela-tho mareeliho muhoolo.
9 Masu ala toororomeleya ni a ekhaikhai, hiyo nintthuneya ororomelaka moomalela.
10 Tivawonto nniilipiheraahu ovara muteko, ni ninnapaka ele ninweraahu, woona weera yooweherera ahu enlipa ni Muluku mukumi, yoowo ori Nvuluxa aatthu a mikhalelo sootheene, otepaxa wene ale eri oororomeleya.
11 Nvireleleke owooperera atthu ni mwaaxuttiheke itthu iya.
12 Muhimuhiye mutthu ooramusakani mwaha wookhala mmiravo. Opwaha mwa yeeyo, mukhale ntakihero nooreera wa atthu ale oororomeleya, moorweela mwa muulumelo anyu ni mwa mapakelo anyu itthu, mwa nsivelo nanyu, mwa nroromelo nanyu, ni mikhalelo sanyu sooreera.
13 Mpaka miyo ophiya weiwo, nvirelele osoma mmulokoni,* owooperera atthu weera epake itthu sooreera ni oxuttiha.
14 Muhihiye owera weiwo nvahinwaanyu moorweela mwa eprofesiya ni emaara yeeyo asitokweene a mmulokoni yoothanliyaayani ewiiyaatherakani matata aya.
15 Mphimeleleke itthu sene seiya; ni mukhaleleke nthiti, weera okela wanyu vahoolo moomunepani wooniweke ni atthu ootheene.
16 Mwiikosoope mwaneene anyu ni moota munxuttihaanyu. Nvireleleke okwanihera itthu iya, mweera hiiho, nyuwo munimwiivuluxa mwaneene anyu ni munoovuluxa ekumi ya atthu ale enwiiwelelani.
