Ekaarta yoopatxera ya Timotiyu 5:1-25
5 Muhimuximweleke moowuuma murima mulopwana oowuuluvala. Opwaha mwa yeeyo, munvaheke miruku mooreera murima ntoko mwaakelaanyuno waavaha apapinyu; amiravo, mwaavaheke miruku ntoko mwaakelaanyuno waavaha asinninyu.
2 Athiyana oowuuluvala, mwaavaheke miruku ntoko mwaakelaanyuno waavaha asimaaye; asimwali, ntoko mwaakelaanyuno waavaha asirokorinyu, mooreera murima.
3 Mwaattittimiheke ni mwaakosoopeke asinaamukhweli asithiyana enkhala meekhaaya.*
4 Mene, wakhala weera muthiyana naamukhweli ookhalano anamwane ni osuulu, awo entthuneya omoovaka Muluku, yoonihereke eyo yaakosoopaka atthu a veemusini vaya. Ni yaavaheke apapaya ni ameyaya itthu sinaathowa, waahela mpuwa annaaya,* woona weera etthu eyo, ennamusivela Muluku.
5 Vanonto, muthiyana naamukhweli ohikhanleno etthu, yooweherera awe onkhala Muluku ni onnavekela ni omutxonttela ohiyu ni othana.
6 Mene, muthiyana naamukhweli ontthuna okwanihera sootthuna sawe,* nnaamweera areene mukumi, owo ohookhwa wa mukhalelo woomunepani.
7 Tivawonto, mwaaxuttihe itthu iya* weera ehikhaleno mathowa.
8 Vano, wakhala weera mutthu khankosoopa emusi awe, otepaxa-wene atthu enkhala vatthokoni vawe, owo oohiya ororomela ele hiyo ninroromelaahu, ni owo tootepa wuuma murima ompwaha mutthu ohikhanleno nroromelo.
9 Mwaaheleke mpuwa asithiyana asinaamukhweli yaawo erinono iyaakha soophiyeraka 60,* ekhaleke asithiyana yaarino mulopwana mmoha,*
10 ni yaawo ensuweliwa mwaha wa miteko saya sooreera, yaahunwe anamwane aya, yaari oowaakhela aletto, yaarapiha manaani aatthu oororomeleya, yaakhavihera atthu oohaawa ni yiivaherera ovara miteko sootheene sooreera.
11 Menento, muhaakontariki valistani asithiyana asinaamukhweli oohuuluvala, woona weera ntthuno naya nookonihana naaphwanya vale vamoha ni onvarela waya muteko Kristu, awo enoorowaka otthunaka otheliwa.
12 Asithiyana awosa enniithoriha mwaneene aya mwaha woohiya nroromelo yaaraayano* woopatxerani.
13 Opwaha mwa yeeyo, mwa etempu emoharu, awosa-tho ennaxuttera okhala atthu ooreesi erooka empa ni empa, ohiya paahi oxutteraru oreesi, awo-tho enxuttera onamootha ni enniivoleihera nyaha sa atthu akina, yuulumaka itthu yahaatthuneyaaya wuuluma.
14 Nto, etthu kintthunaaka ti yooweera, asinaamukhweli oohuuluvala etheliweke, yaayareke anamwane ni ekosoopeke vaate vaya weera ehinvahe namavaanyiha eparakha yoowaathoriha.
15 Mweekhaikhai, asithiyana akina asinaamukhweli, aahiya weetteela ephiro yooreera enamutthara Satana.
16 Wakhala weera vaate va muthiyana mmoha mukristu ookhalavo muthiyana mmoha naamukhweli, owo tontthuneya omukhavihera naamukhweli owo. Woona weera owo khaiyene muritti wa muloko. Eera hiiho, muloko onoowera waakhavihera asithiyana akina asinaamukhweli oohaawa yaawo ehikhanleno mutthu oowaakhavihera.
17 Asitokweene a mmulokoni enhoolela nnene sene muloko, entthuneya weera ettittimihiweke vantxipale, otepaxa wene ale envara muteko ni nthiti, yuulumaka masu a Muluku ni exuttihaka.
18 Soolepa sinhima weera: “Emaara emompe ennyikalaaya eso, muhitthuke eyano aya,” nave-tho sinnahima: “ole onvara muteko onnaphwanela oliviwa.”
19 Wakhala weera mohiiwa etthu ootheriwaka mutokweene a mmulokoni, ohikhanle weera aakhala anamoona eeli naari araru, muhaakhulele.
20 Mwaattaruxeke ale empaka yoottheka ohoolo wa atthu ootheene weera ale enoona yooveke.
21 Kinnawoopererani nnene sene ohoolo wa Muluku, wa Kristu Yesu ni wa malaika oothanliwa, weera mutthareke miruku iya woohikhala nthalu naari othanyana.
22 Muhaakuveke onvaha muritti* mutthu ori poothe, naari muheereleke eparte soottheka sa atthu akina; mukhalekeno mukhalelo wooreera.
23 Muhiwureke maahiru, nwureke-tho vakhaaniini eviinyu, mwaha wa mmirimani mwanyu,* ni mwaha woowaattela ovoreiwa wanyu veeli-veeli.
24 Soottheka sa atthu akina sinnasuweliwa ni atthu ootheene ni awo ennathorihiwa moowaakuveya; menento soottheka sa atthu akina sinooneya evinreene etempu.
25 Emoha-moharu-tho, mitthenka sooreera soosuweliwa ni atthu ootheene, ni nnaamweera sihisuweliwaka, iyo khasinvirelela ovithiwa.
Footnotes
^ Naari: “oohaawa.” Eyo tiiyo, ehikhanleno mutthu oowaakhavihera.
^ Naari: “avovo aya.”
^ Apaale sinhimmwa sootthuna sa okonihana.
^ Naari: “miruku, malamulo ala.”
^ Ni Ekereku: “muthiyana aarino mulopwana mmoha.”
^ Naari: “yaari oororomeleya wa asiñyaya.”
^ Naari: “woomuhiya natiri yammannaaya.”
^ Ni Ekereku: “Muhaakuveke omwiiyaathera matata.”
^ Naari: “nipwiipwi nanyu.”
