Ekaarta yoopatxera ya Timotiyu 3:1-16
3 Masu ala teekhaikhai ni oororomeleya: Akhala mulopwana ontthuna okhala mutokweene onhoolela, owo oniilipihera ovara muteko wootepa ooreera.
2 Mutokweene onhoolela, ontthuneya weera eettiheke nnene sene ekumi awe weera atthu ehimphwanyeno mathowa ni akhaleke mulopwana a muthiyana mmoha paahi, oowiisuumaaliha, oottittimiheya, oowaakhela aletto ni oowera oxuttiha.
3 Nave-tho, ahikhaleke namuhapaliwa, naari mutthu oowali. Mene akhaleke mutthu oomaala ni a murettele. Ni ahisiveliweke musurukhu.
4 Ni akhaleke mulopwana onhoolela nnene sene etthoko awe ni anamwane awe ootheene ekhaleke oowiiwelela ni erino mikhalelo sooreera.
5 (Wakhala weera mulopwana khanwera ohoolela nnene etthoko awe, onkela ohoolela hayi muloko wa Muluku?)
6 Ahikhaleke mulopwana opatisinwe* viinaano, weera ahiisunnuwihe amorelaka mmuraakhoni mmoharu yoowo omorenlaawemo Diabo.
7 Opwaha mwa yeeyo, atthu ehikhanle a mmulokoni entthuneya omuhelelaka onamoona wooreera, weera ehimuulumeke moonanara ni weera ahimorele mmuraakhoni mwa Diabo.
8 Emoha-moharu-tho, arumeyi ookhavihera entthuneya weera ekhaleke asilopwana oororomeleya; ni oohootha; ni oohiwura vantxipale eviinyu,* naari ahikhaleke mutthu ompaka etthu weera awootothe atthu akina ni owiiyera.
9 Evarexexeke esiiri ya Muluku ya nroromelo, ekhalakano yoosuweliha ya murima yooreera.
10 Awo entthuneya wooniwa toko, wakhala weera ennaphwanela okhala arumeyi ookhavihera, avinyaka pooti okhala arumeyi ookhavihera wakhala weera khiyaanoono mulattu.
11 Vamoha-moharu-tho, athiyana entthuneya weera ekhaleke oowiisuumaaliha, oohaapa ni oororomeleya mwa itthu sootheene.
12 Murumeyi ookhavihera akhaleke mulopwana a muthiyana mmoha paahi ni aakosoopeke nnene anamwane awe ni etthoko awe.
13 Alopwana enanvarela muteko nnene Muluku, ennaphwanya nttittimiho ni awo enoowera wuuluma moohihovela woohima sa omuroromela waya Kristu Yesu.
14 Miyo kinnoolepelani itthu iya, nnaamweera kisuwelaka weera moohipisa va, kinimoowa iwo,
15 kipanke eyo weera wakhala weera miyo kinoopisa owa iwo, nyuwo musuweleke moota muntthuneyaanyu weettaka variyari va emusi ya Muluku, eyo tiiyo, mmulokoni mwa Muluku mukumi, yoowo ori marimpu ni alserse a ekhaikhai.
16 Khaavo onvaanya esiiri ela etokweene yonvuwiha Muluku: ‘Yesu ohooniheriwa ntoko mutthu, ookhalihiwa naxariya moorweela mwa munepa, aakhumelela malaika, oolaleiwa wa yaale ehikhanle ayuda, oororomeliwa mulaponi, ohaakheliwa wiirimu ni ovuwa.
