Ekaarta yoopatxera ya Timotiyu 1:1-20
1 Miyo Paulo, murummwa a Kristu Yesu, moorweela mwa yoothanla ya Muluku, Nvuluxa ahu, ni Kristu Yesu moorweela mwa yoowo nraahuno yooweherera,
2 kinoolepelani nyuwo Timotiyu,* mwanaka a ekhaikhai nraahuno nroromelo nimoharu:
Oreera murima otokweene wa Muluku, ikharari ni murettele onkhuma wa Muluku, Tiithi, ni wa Kristu Yesu Pwiya ahu, okhale ni nyuwo.
3 Hiihaale ntoko miyo koovekenlaakani weera nyuwo muhale wEfeso vaavo miyo kaahalelaaka vakhaaniini orowa oMasedonia, vano miyo, kinoovekelani weera mwaavahe miruku mooluluwanya atthu ale enxuttiha sooxuttiha ikina.
4 Muhiiweleleke soohimmwa soowootha naari wiiwa ekontariwaka masina a makholo anyu akhalayi seiyo sihinkela wookhaviherani etthu. Itthu iyo khasinkumihera ovuluwa ntoko ontthunaaweno Muluku woohima sa nroromelo. Opwaha mwa yeeyo, itthu iyo, sinkumihera ovaanyihana.
5 Mweekhaikhai, yootthuna ya yooxuttiha ela,* nsivelo, nenno ninkhuma vamurimani wooreera, mwa yoosuweliha ya murima yooreera ni nroromelo na ekhaikhai noohootha.
6 Menento, atthu akina aahapuxiwa enhiya ovarela muteko itthu iya. Vano awo, envaanyihana itthu sa ethiru.
7 Awo ennatthuna wiikhaliha alipa ooxuttiha nlamulo, mene kheniiwexexa naari khesuwenle etthu enhimaaya naari itthu seiyo awo enxuttihaaya moowiilipihera, khesuwenle.
8 Hiyo noosuwela weera Nlamulo ti nooreera wakhala weera mutthu onnatthara nnene.
9 Ni noosuwela weera nlamulo khanipakelinwe anaxariya, mene epakelinwe atthu oonanara murima, atthu oohiiwelela, oohimuttittimiha Muluku, ni anamattheka, oohiroromeleya,* atthu ehinttittimiha itthu sa Muluku, ale enwiiva apapaya naari ameyaya. Nave-tho epakelinwe anamwiiva,
10 atthu enkonihana woohireerela,* ale enkonihana alopwanaru naari athiyanaru, ale enaavara atthu weera yaatumihe, anamootha, ale anlipela vasiiyoni vene, ni itthu sootheene sinvirikanyiha sooxuttiha sa ekhaikhai.*
11 Sooxuttiha seiyo sinvarihana ni mitthenka sooreera sa Muluku ahu oohakalala, seiyo kiroromelinwaaka.
12 Kinnamuxukurela Kristu Yesu, Pwiya ahu, yoowo okivanhe owera, mwaha wooweera ookoona okhala oororomeleya, akivahaka ovara muteko wa Muluku,
13 nnaamweera khalayi miyo kanveeha Muluku ni kaattharatthara atthareli awe ni kaari oowiisoona. Mwa itthu sootheene iya, Muluku ookimorela ikharari, woona weera miyo kaapaka itthu iye kihisuwelaka ni nkaarino nroromelo.
14 Mene Apwiya aakoonihera oreera murima vantxipale miyo, ni mwaha wookhala mutthareli a Kristu Yesu, kookhalano nsivelo ni nroromelo.
15 Masu ala teekhaikhai, nave nroromeleke ni murima wootheene weera: Kristu Yesu ohoowa mulaponi weera aavuluxe anamattheka. Wa anamattheka ene yaala, miyo kitempexa.
16 Nto, ntoko namattheka ootepaxa, koomoreliwa ikharari weera moorweela mwa miyo, Kristu Yesu awoonihereni opixa wawe murima wootheene, weera kikhale ntakihero nooreera wa atthu ootheene ale emmuroromela owo weera yaakhele ekumi yoohimala.
17 Vano, Mwene a mahiku ootheene, ohinkhwa, ohinooneya, Muluku mmoharu, avahiwe nttittimiho ni ovuwa wa mahiku ootheene. Amem.
18 Vano, Timotiyu mwanaka, kinoovahani miruku iya* kittharaka iprofesiya seiyo soohimani nyuwo, weera muttharaka iyo, nvirelele owana ekhotto yooreera,
19 mukhalakano nroromelo ni yoosuweliha ya murima yooreera, seiyo atthu akina ekhonttaaya ni eweerinhe oyeleela nroromelo naya ntoko naviyu ottantte* mphareya.
20 Hemineyo ni Alexandre enneerela eparte ya atthu ene yaawo, ni miyo koowinnyerera yaawo wa Satana, weera nttaruxo naaxuttihe ohinveeha Muluku.
