Ekaarta yoopatxera ya Timotiyu 2:1-15
2 Tivawonto, etthu yoopatxera kinoovekelaakani ti yooweera, mmutxontteleke Muluku, nvekeleke, mmuxukureleke Muluku mwaha wa atthu, a makhalelo ootheene,
2 waahela mpuwa mamwene ni atthu ootheene enlamulela,* weera nivireleleke okhala oomaaleleya ni a murettele, ninvarelaka muteko Muluku ni murima wootheene.
3 Muluku ori Nvuluxa ahu ennamusivela etthu eyo ni ennamuhakalaliha.
4 Owo ontthuna weera atthu a makhalelo ootheene evuluwe ni ekhaleno osuwela weekhaikhai.
5 Woona weera Muluku ori mmoha paahi, ni ole onwiiraaniha atthu ni Muluku ori mmoha-tho: mutthu ene yoowo, Kristu Yesu,
6 yoowo ovanhe ekumi awe ntoko nlivo noowaavuluxa atthu ootheene. Atthu enookela ohima eyo etempu yoophwanelela.
7 Ti mwaha ene yoola Muluku okithanliyaawe weera kihelele onamoona sooweereya iya sa ekhaikhai ni okhala murummwa. Aani, kinhima ekhaikhai, nkinootha, eyo yoheereya weera kaakhavihere ale ehikhanle ayuda okhalano nroromelo ni osuwela ekhaikhai.
8 Nto, kintthuna weera nenne nri nipuro munthukumanaanyu alopwana evekeleke, epakeke eyo ni murima wooreera ni ehikhanleno isara ni ehivaanyihanaka.
9 Emoha-moharu-tho, asithiyana entthuneya weera ewareke ikuwo soophwanelela, sooreerela ni soottittimiheya.* Weera ephwaneliwe, awo khentthuneya otthava* maihi mwa moota woothanleya, naari ni ewooru, naari ni epeerola naari ni ikuwo soorikaxa,
10 mene ntoko omphwanelelaaya wa athiyana emmukokhorela Muluku, ophwaneliwa waya okhaleke ovara miteko sooreera.
11 Asithiyana entthuneya weera ekhaleke oomaala emaara enxuttihiwaaya.* Ni entthuneya weera ewiiweleleke asilopwana woohiikhupanyera.
12 Miyo nkinaakhulela weera asithiyana exuttiheke mmulokoni naari waahoolela asilopwana, mene awo entthuneya weera ekhaleke oomaala.
13 Woona weera Muluku aapatxenre ompattuxa Adamu, avinyaka, anampattuxa Eva.
14 Mene, khaiyene Adamu aawokinwe, mene muthiyana aawokinwe moomalela ni anakhala namattheka.
15 Mene muthiyana onookhala oovareleleya aayara anamwane, eyo enimweereya wakhala weera owo onoovirelela okhala oororomela, a nsivelo, okhala ooreera* vamaithoni va Muluku, ni okhalano muupuwelo wooreera.
