“Naa ni humbula uri a ni ṱoḓi Mudzimu? Vhathu vhanzhi vha humbula nga u ralo.” Enea ndi maipfi e a vha o ṅwalwa kha khunguwedzo i re kha bodo ye ya badelelwa nga tshigwada tsha vhathu vha sa tendi kha Mudzimu. Vhenevha vhathu vha vhona uri a vha na tshiitisi tsha u ṱoḓa Mudzimu.

Kha ḽiṅwe sia, vhanzhi vhane vha amba uri vha tenda kha Mudzimu vha dzhia phetho dzine dza lwisana na zwilinganyo zwawe. Mubishopo muhulwane wa Katolika ane a pfi Salvatore Fisichella o amba zwi tevhelaho nga ha miraḓo ya kereke yawe: “Arali muthu o ri sedza a nga kha ḓi sa ri dzhia sa Vhakriste ngauri matshilele ashu a fana na a vhathu vha si vhatendi.”

Vhaṅwe vho farakanea vhukuma; a vha na tshifhinga tsha Mudzimu. Vha mu vhona e kule vhukuma kana a sa swikelelei uri a nga kona u vha thusa vhutshiloni havho. Vhenevho vhathu vha humbula Mudzimu arali vhe khomboni fhedzi, kana hu na zwine vha zwi ṱoḓa—vha ita u nga Mudzimu ndi mushumeli ane a dzula o lindela u ita zwine vha funa.

Vhaṅwe a vha vhoni ṱhoḓea ya u ita zwine vha funzwa kerekeni, khamusi ndi nga nṱhani ha uri a vha vhoni zwi tshi vhuyedza. Sa tsumbo, Vhakatolika vha phesenthe dza 76 vha ngei Dzheremane vha tenda uri zwi a ṱanganedzea uri munna na mufumakadzi vha dzule vhoṱhe vha songo vhingana—eneo mavhonele a lwisana na pfunzo ya kereke yavho na Bivhili. (1 Vhakorinta 6:18; Vhaheberu 13:4) Vhukuma, a si Vhakatolika fhedzi vhane vha tshila nga nḓila ine ya si tendelane na zwine vha zwi tenda. Vhafunzi vha kereke dzo fhamba-fhambanaho vha a tenda uri matshilele a miraḓo ya kereke dzavho a a fana na a vhathu “vha sa tendi kha Mudzimu.”

Dzenedzi tsumbo dzi ita uri hu takuwe mbudziso ine ya ri: Naa Mudzimu ri a mu ṱoḓa zwa vhukuma? Yeneyi thaidzo ndi kale i hone. Yo bvelela lwa u thoma kha masiaṱari a u thoma a Bivhili. U itela u wana phindulo ya yeneyi mbudziso, kha ri ṱhogomele zwiṅwe zwo ṅwalwaho Bivhilini kha bugu ya Genesi.