Ndi Ngani Mbingano Dzi Tshi Pwashea?

“Ha ḓa Vhafarisei [ha Yesu], vha mu linga vha ri: Naa ndi zwone naa arali munna a tshi ṱala musadzi wawe arali hú na tshe a mu dina ngatsho’?”—Mateo 19:3.

VHAṄWE vhathu vhe vha tshila misini ya Yesu vho vha vha sa fulufheli uri mbingano i nga vha ya tshoṱhe. Yesu o vha vhudza a ri: “Naa a no ngo vhala zwauri, o vhumbaho muthu, o mbo ḓi vhumba munna na musadzi, A amba a ri: Ndi zwone zwiné munna a ḓo ṱutshela khotsi-awe na mme-awe ngazwo’ a nambatela musadzi wawe; huno vhuvhili havho vha ḓo vha ṋama nthihi! Ndi zwone-ha a vha tsha ḓo vha vhavhili, vha ḓo vha ṋama nthihi. Huno zwino, zwo vhofhekanywaho nga Mudzimu muthu a songo zwi fhandakanya.” * (Mateo 19:4-6) Zwi tou vha khagala uri Mudzimu o vha a tshi ṱoḓa uri mbingano dzi vhe dza tshoṱhe.

Mashangoni manzhi ṋamusi, mbingano dzi ṱoḓaho u vha phesenthe dza 40 kana dzi fhiraho dzenedzo dzi a ‘fhandakana,’ vhavhingani vha fheleledza vho ṱalana. Naa nyeletshedzo ya Bivhili malugana na mbingano yo fhelelwa nga tshifhinga? Naa mbingano dzi pwashea nga ṅwambo wa uri yeneyi ndugiselelo i na vhuleme?

Ṱhogomelani tshifanyiso tshi tevhelaho: Kha ri ri miṱa mivhili i renga goloi dzi fanaho. Vhavhingani vha muṱa wa u thoma vha ṱhogomela zwavhuḓi goloi yavho nahone vha i reila nga vhulondi. Goloi yavho a i tshinyali. Vhavhingani vha muṱa wa vhuvhili a vha ḓiṋei tshifhinga u itela u ṱhogomela goloi yavho nahone vha sokou reila vha sa londi. Goloi yavho i mbo ḓi tshinyala nahone ya litshiwa henefho. Vhuleme ho bveledzwa nga mini—nga goloi kana nga vhaṋe vhayo? Zwi tou vha khagala uri vhaṋe vhayo ndi vhone vha re na mulandu.

Nga hu fanaho, u pwashea ha mbingano a zwi ambi uri yeneyi ndugiselelo i na vhuleme. Mbingano nnzhi dzine dza bvelela dzi khwaṱhisedza yeneyi mbuno. Dzenedzo mbingano dzi ita uri hu vhe na dakalo na vhudziki kha vhathu, miṱa na vhadzulapo. Fhedzi u fana na goloi, mbingano i fanela u ṱhogomelwa zwavhuḓi misi yoṱhe u itela uri i vhe ya tshoṱhe.

Hu sa londwi uri ni kha ḓi tou bva u vhingana kana no no fhedza mahumi manzhi a miṅwaha no vhingana, nyeletshedzo ya Bivhili malugana na nḓila ine na nga ṱhogomela na u khwaṱhisa mbingano ngayo i a shuma zwa vhukuma. Ṱhogomelani dziṅwe tsumbo kha zwiṱoho zwi tevhelaho.

[Ṱhaluso i re magumoni a siaṱari]