U Ṱuṱuwedzwa Nga Zwi “Bvaho Milomoni Ya Vhana”
Nga December 2009, Khothe Khulwane ya Russia yo tikedza phetho ya u fhelisa ndangulo ya vhurereli ha Ṱhanzi dza Yehova dza Taganrog ngei Russia, ya ita uri vha dzhielwe Holo ya Muvhuso nahone ha dovha ha ambiwa uri khandiso dzashu dza 34 dzi na khombo kha vhathu. Yeneyo phetho na zwinepe zwa Dziṱhanzi u katela na vhana vhaṱuku zwo phaḓaladzwa kha Web site i re mulayoni ya Ṱhanzi dza Yehova.
Vhana ngei Australia
Nga murahu ha miṅwedzi i si gathi, Dzangano ḽi Langulaho ḽa Ṱhanzi dza Yehova dza ngei Russia ḽo wana bogisi ḽi re na vhurifhi vhu bvaho kha muṅwe muṱa wa Dziṱhanzi wa Queensland ngei Australia, we wa vhala muvhigo wa phetho ye ya dzhiiwa nga Khothe. Honoho vhurifhi ho ri: “Vhahashu vha funwaho, vhana vhashu Cody na Larissa vho kwamiwa vhukuma nga lutendo na milingo ye khonani dzashu dza Russia dza sedzana nayo. Vho ṅwala dzikhadi na marifhi nahone vho rumela zwifhiwa uri zwi ṋewe vhana vha ngei Taganrog u itela u vha ḓivhadza uri hu na vhaṅwe vhana vhane vha dzula kule navho, vhane vha shumela Yehova nga u fulufhedzea nahone vha khou humbula nga havho. Vha khou vha rumela dzindumeliso dza lufuno.”
Musi vho no wana zwenezwo zwifhiwa, vhana vha ngei Taganrog vho ola zwifanyiso zwe vha zwi rumela na marifhi u itela u livhuha muṱa u re Australia. Muṅwe wahashu o no shuma ngei davhini ḽa Russia o ṱuṱuwedzwa nga maipfi a bvaho “milomoni ya vhana” nahone a ṅwalela Cody na Larissa vhurifhi a ri: “Ni nga vha no zwi ṱhogomela uri a zwi takadzi kha vhana na vhahulwane u ṱarafelwa zwe vha si zwi ite. Vhahashu vha tshinnani na vha tshisadzini vha ngei Taganrog a vho ngo tshinya tshithu, fhedzi vho dzhielwa Holo yavho ya Muvhuso. Zwenezwi zwo vha ṱungufhadza vhukuma. Fhedzi zwi a vha ṱuṱuwedza u ḓivha uri hu na vhaṅwe vha re kha maṅwe mashango vhane vha humbula nga havho. Ri a livhuha lufuno na mafunda a vhoiwe!”—Ps. 8:2.
Vhana vha Russia vhe vha wana zwifhiwa zwi bvaho kha vhana vha Australia
Vhukuma ri tshipiḓa tsha vhahashu vha shango ḽoṱhe, nahone u funana hashu hu ḓo ri thusa u kona u sedzana na milingo na thaidzo dza vhutshilo. Naho nyambedzano ya khothe yo sumbedza uri khandiso dza Ṱhanzi dza Yehova dzi sumbedza vengo, fhedzi vhana vhashu vho sumbedza u funana hu sa londwi uri vha bva mashangoni o fhamba-fhambanaho, na uri vha na mvelele dzi sa fani, nahone zwenezwo zwi sumbedza vhungoho ha maipfi a Yesu ane a ri: “Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.”—Yoh. 13:35.
